APRIL 1, 2024
RUSSIA

“Ningathera Yayi”

JULANI

“Ningathera Yayi”

Khoti la Nikolaevsk-on-Amur ilo lili ku Chigaŵa cha Khabarovsk sonosono apa lipelekenge chigamuro chake pa mulandu wa Mubali Igor Kletkin, Mubali Nikolay Kononenko na Mudumbu Nadezhda Korobochko. Wakwimira boma pa milandu wachali wandapemphe chilango icho ŵanthu aŵa ŵangapika.

Vyakukhwaskana na ŵanthu aŵa

Igor Kletkin

Chaka chakubabikira: 1961 (Nikolaevsk-on-Amur)

Mbiri yake: Wakaŵa dilayivala

Amama ŵake ŵakati ŵapwetekeka chomene pangozi, Igor wakajifumbanga chifukwa icho vinthu vyanthena vikuchitikira. Wakawonga chomene wakati wasanga mazgoro ghakufuma mu Baibolo ghakupulikikwa makora. Mu 1999 wakabatizika kuŵa yumoza wa Ŵakaboni ŵa Yehova

Ivyo Wakayowoya

Kasi ntchivichi chikumovwirani kulutilira kuwona vinthu mwakwenelera pa nyengo yakusuzga iyi?

Nangauli vikuŵinya kutambuzgika, kweni nindatayepo chipulikano chane mwa Yehova. M’malo mwake nkhuwona nthambuzgo kuŵa chigaŵa cha uteŵeti wane kwa Yehova. Nkhukumbuka mazgu agho Yesu wakayowoya pa Yohane 15:20. Iyo wakati: “Usange ŵakanitambuzga ine, ŵatambuzgenge na imwe wuwo.” Ntheura ningathera yayi. Ningamuleka yayi Yehova, Yesu, kweniso ŵabali na ŵadumbu. Naŵikapo mtima kuŵa chiyelezgero chiwemi ku ŵanji.

Nadezhda Korobochko

Chaka chakubabikira: 1943 (Shakhty, Chigaŵa cha Rostov)

Mbiri yake: Wakaŵa akautanti. Ŵali na ŵana ŵanayi

Wakaŵazganga Baibolo kweni payekha wakatondeka kulipulikiska. Ntheura wakamba kusambira na Ŵakaboni ŵa Yehova. Wakakondwa chomene kumumanya Chiuta na mikhaliro yake. Wakabatizika mu 1996

Ivyo wakayowoya

Kasi mwasambira vichi vya Yehova apo mwasangana na suzgo iyi?

Suzgo iyi yanisambizga kuti Yehova wakuwona ivyo vikuchitika na kumanya umo nkhujipulikira. Pamanyuma wakunipa wovwiri uwo nkhukhumbikwira nadi. Nyengo zose Yehova wakunipa mtende para vikunisuzga kughanaghana mwakwenelera. Ndipo wakunovwira kukumbuka makora mavesi gha mu Baibolo agho ghakukolerana na masuzgo agho nkhujumphamo. Para nasangana na chiyezgo chikuru chomene ndipo nkhuwonaso mzimu wa Yehova ukunovwira chomene ndipo ivi vikunipangiska kuti nimugomezgenge chomene Yehova.

Tikuwonga chomene Yehova chifukwa cha kupwelelera na kovwira wose awo ŵakumugomezga na kuyowoya kuti: “Ndimwe Chiuta wane.”—Salimo 31:14.

Nyengo

October 11, 2021

Ŵapolisi ŵakasecha nyumba ya Igor na Nadezhda. Igor ŵakamujalira mu jele lakusungirako ŵanthu awo mulandu wawo underuzgike
October 12, 2021

Nadezhda ŵakamufumba mafumbo
October 13, 2021

Igor wakafumiskika mu jele
October 14, 2021

Igor na Nadezhda ŵakakanizgika kwenda
September 27, 2022

Nikolay ŵakamukanizga kwenda
January 16, 2023

Khoti likamba kutegherezga mulandu