Kwamba pa October 14 m’paka pa December 16, 2023, ku La Modelo ku Barcelona, Spain, kukaŵa chiwoneskero cha mutu wakuti “Ŵakajalirika mu Jele Chifukwa cha Chipulikano chawo.” La Modelo ni malo agho pakwamba likaŵa jele kweni pasono ni malo ghakuwoneskerako vinthu vyakale kweniso vya mitheto. Chilato cha chiwoneskero ichi chikaŵa chakuti chisambizge ŵanthu, kusazgapo ŵalaraŵalara ŵaboma, nkhwantha na ŵasambizgi pa kugomezgeka uko Ŵakaboni ŵa Yehova ŵachiwukirano ŵakalongora, pakulutilira kuleka kunjilirapo pa vya charu.

Chiwoneskero ichi chikuyowoya za nkhani ya ŵabali ŵithu ŵa ku Spain awo ŵakajalirika mu jele kwambira mu ma 1930 chifukwa chakukana kunjira usilikari. Kufuma waka mu ma 1960 na 1970, chiŵelengero cha ŵabali awo ŵakaŵa ku jele chikaŵa pafupifupi 1,000. Ndipo pa ŵabali aŵa, ŵabali ŵakujumpha 40 ŵakaŵa ku jele la ku La Modelo.

Ivyo ŵakabatika mu malo agha, vikalongosora chifukwa icho Ŵakaboni ŵakusankha kuleka kunjilirapo pa nkhondo chifukwa cha ivyo ŵakugomezga, kweniso vikalongosoranga umo umoyo ukaŵira ku Ŵakaboni ŵachiwukirano aŵa apo ŵakaŵa mu jele. Chifukwa cha chikanga icho ŵabali ŵakugomezgeka aŵa ŵakalongora kwa vyaka vinandi, vikapangiska kuti mu 1984 boma la Spain lidumure kuti ŵanthu ŵali na wanangwa wakusankha kuleka kunjira usilikari chifukwa cha vigomezgo vya chisopa chawo.

Profesa Miguel Ángel Plaza wakusanda vya mdauko wakachemeka kuti wakayowoyepo pa mwambo wakujulira chiwoneskero ichi. Iyo wakaŵa kuti wayowoyapo nawo kale Ŵakaboni ŵa Yehova ŵanandi awo ŵakajalirika ku jele la ku La Modelo. Pakuyowoya za ivyo vikachitikira Ŵakaboni aŵa, iyo wakati: “Palije na yumoza uyo wakayowoya vyakususkana nawo panji kuyowoya mazgu ghaheni pa ivyo ŵakakumana navyo ku La Modelo. Nanga nkhu ŵalinda awo ŵakaŵalaŵiliranga ku jele ŵakaŵayowoyerapo viheni yayi. Waliyose wakamwemweteranga apo wakalongosoranga ivyo vikamuchitikira.” Ŵanyake awo ŵakaŵapo pa mwambo uwu wakaŵa Mubali  Fernando Trepat, uyo wakaŵa yumoza mwa Ŵakaboni awo ŵakajalirika ku La Modelo. Iyo wakayowoya kuti: “M’paka sono, nangauli pajumpha vyaka 50, nichali wakukhorwa kuti ulongozgi wa mu Baibolo ukanovwira kusankha mwakwenelera. Nanga ni mwahuno ningasintha yayi ivyo nkhasankha.”

Mubali David Báidez, uyo wakalongozganga chiwoneskero ichi wakayowoya kuti: “Nangauli chiwoneskero ichi chikuyowoya za ivyo vikachitika kumanyuma kweni mutu wake ngwa panyengo yake. Pasono pali Ŵakaboni ŵa Yehova ŵakujumpha 200 mu vyaru vyakupambanapambana, awo ŵali mu jele chifukwa cha ivyo ŵakugomezga kufuma mu Baibolo.”

Ndise ŵakukondwa chifukwa cha kugomezgeka kweniso kuzizipizga uko ŵabali ŵithu ku Spain ŵalongora kwa vyaka vinandi. Ndipo tilutilirenge kulombera awo ŵali ku jele mazuŵa ghano chifukwa cha chipulikano chawo.—Ŵahebere 13:3.