COLOMBO, Sri Lanka—Chivula chikuru chikati chawa mu chigaŵa chapakati pa mapiri gha Aranayaka, ku Sri Lanka, mapiri ghakamba kudilimuka na kuwundira vikaya vyakufupi. Mapiri agha ghali pa mtundu wa makilomita pafupifupi 100 (mamayilosi 62) kufuma ku Colombo, uwo ni msumba ukuru wa charu cha Sri Lanka. Pa ngozi iyi, ŵanthu 100 ŵakafwa ndipo ŵanyake 350,000 ŵakasuzgika munthowa zakupambanapambana. Pa May 15, chivula chikuru chikamba kulokwa mu tawuni ya Kilinochchi ndipo chikalokwa kwa maora 24. [Vula iyi yikanjira pasi mamimita 373 (pafupifupi mayinchesi 15)] Boma likati iyi ni ngozi yikuru chomene kuchitika ku Sri Lanka kufuma apo kukaŵira tsunami mu 2004.

Ofesi ya Ŵakaboni ŵa Yehova ku Sri Lanka yikati palije Kaboni uyo wakafwa pa ngozi iyi, kuti waka Ŵakaboni pafupifupi 200 ŵakasoŵa pakukhala chifukwa nyumba zawo zikanangika. Nyumba ya Ufumu, panji kuti nyumba yakusoperamo, ku Kaduwela, iyo yili pa mtunda wa makilomita pafupifupi 15 (mamayilosi 9) kufuma ku Colombo, nayo yikabira mu maji, mamita ghaŵiri (mafiti 6).

Mwaluŵiro Ŵakaboni ŵa Yehova ŵakakhazikiska komiti yakovwira pa masoka kuti yovwire kusanga na kupeleka wovwiri wakwenelera ku ŵanthu awo ŵakhwaskika. Nyumba ya Ufumu ya ku Kotahena ndiyo ŵakasungirangamo katundu, nga ni maji, vyakuvwara, kweniso munkhwala. Ŵakaboni ŵanandi ŵakajipeleka pa ntchito yakovwira Ŵakaboni ŵanyawo kweniso ŵazengezgani ŵawo.

Nidhu David, muyowoyeri wa Ŵakaboni ŵa Yehova ku Sri Lanka, wakati: “Tikulutilira kulombera mabanja ghanandi agho ghasuzgika chifukwa cha ngozi iyi. Kweniso, tikovwira kunozga nyumba iyo zili kunangika, tikupeleka chakurya, na vyakuvwara. Ŵanthu ŵakulumba chomene mtima wakujipeleka uwo Ŵakaboni ŵa Yehova ŵalongora pa nyengo ya masuzgo iyi.”

Mungayowoya na:

International: David A. Semonian, Ofesi ya Chimanyisko, 1-718-560-5000

Sri Lanka: Nidhu David, 94-11-2930-444