Mubali Jovidon Bobojonov Ŵangamujalira Mu Jele Chifukwa Chakukana Kunjira Usilikari

Pa Chitatu, April 1, 2020, khoti la ŵasilikari ilo lili ku Tajik mu msumba wa Dushanbe leruzgenge mulandu wa Mubali Jovidon Bobojonov uyo wakukana kunjira usilikari chifukwa cha njuŵi yake. Mubali Bobojonov walindilira myezi yakujumpha 5 kuti khoti leruzge mulandu wake. Panyengo yose iyi mubali uyu wanguŵa mu jele umo wayuzgikanga chomene.

Pa October 4, 2019, ŵasilikari mu msumba wa Khujand ŵakakora Mubali Jovidon Bobojonov wa vyaka 19, uyo panyengo iyi wakaŵa ku nyumba kwake. Ŵati ŵamukora ŵakaluta nayo ku ofesi ya ŵasilikari ndipo ŵakamujalira mu jele. Pati pajumpha mazuŵa ghaŵiri ŵakamuchichizga kukwera sitima ya pamtunda na kuluta nayo ku Lenin, ku sukulu ya ŵasilikari. Kufuma apo ŵakaluta nayo ku malo ghanyake gha ŵasilikari uko ŵakamuchichizganga kuti wavware yunifomu ya ŵasilikari kweniso kuti wayowoye chilapo chakuti wanjira usilikari. Pa January 28, 2020, ŵakati wali na mulandu.

Ŵapapi ŵa Jovidon awo Mbakaboni ŵa Yehova ŵalikupeleka madandaulo ghawo ku ŵalara ŵaboma ŵakupambanapambana ku Tajikistan nga nkhu ofesi ya pulezidenti na ku ofesi ya Umbuzimani (Ombudsman). Ŵalaraŵalara ŵaboma ku Tajikistan ŵakuti chifukwa chakuti mu charu mwawo mulije dango lakuti uyo wakana kunjira usilikari ŵangamupa ntchito zinyake, ndikuti ivyo Mubali Bobojonov wachita ni mulandu.

Tikumanya kuti Yehova wamupenge njombe Mubali Bobojonov chifukwa cha chikanga icho walongora, wapelekengeso nkhongono na mtende ku ŵa mu mbumba yakwake.—Salimo 29:11.