Pa January 18, 2021, khoti la ku Turkmenistan likeruzga kuti Mubali Azamatjan Narkuliyev wali na mulandu. Khoti ili likadumura kuti mubali uyu wakagwire jele vyaka viŵiri ku jele ilo kuli chivikiliro chikuru chifukwa chakukana kunjira usilikari chifukwa cha njuŵi yake. Aka nkhachiŵiri kujalirika mu jele chifukwa chakukana kunjira usilikari.

Azamatjan Narkuliyev

• Chaka cha kubabikira: 2000

• Mbiri yake: Wakabatizika mu 2018. Ŵanthu ŵakumanya kuti ni munyamata wa makhaliro ghawemi nga nkhujiyuyura na kulimbikira ntchito. Amama ŵake na ŵadumbu ŵake ŵaŵiri nawo Mbakaboni ŵa Yehova

Mubali Azamatjan, uyo wali na vyaka 20, wakamalizga kugwira jele ulendo wakwamba wati wakana kunjira usilikari pa January 7, 2020. Chifukwa chakuti ku Turkmenistan kuli dango lakuti para munthu wakana kunjira usilikari chifukwa cha ivyo ukugomezga ukupika mulandu maulendo ghaŵiri, ntheura Mubali Azamatjan wakachemekaso kuti wakanjire usilikari pati pajumpha waka myezi 5 kufuma apo ŵakamufumiskira mu jele. Ulendo uwu nawo ŵakakamupa mulandu chifukwa chakuti wakakana kunjira usilikari panji kugwira ntchito yiliyose yakukhwaskana na usilikari.

Ndipo pa December 20, 2020, wakwimira boma pa milandu wakamujulira mulandu unyake. Ŵamazaza ŵakamupokaso pasipoti yake.

Tikumulombera Mubali Azamatjan na ŵa mu banja lakwake, ndipo tikumanya kuti ŵatumbikikenge para ŵaŵikapo mtima kulutilira kugomezgeka. Baibolo likutisimikizgira kuti ‘uyo ngwakugomezgeka [Yehova] wakuchita nayo mwakugomezgeka.’—Salimo 18:25.