A te fakalavelave lasi ko te ‵toe fakalavelave eiloa telā seki lavea aka eiloa ne tino. E ‵tusa mo valoaga i te Tusi Tapu, ka oko mai eiloa i “aso fakaoti,” io me ko “te taimi o te gataga.” (2 Timoteo 3:1; Tanielu 12:4) Ka fai eiloa pelā me ko te “fakalavelave telā ne seki tupu aka eiloa talu mai te kamataga o mea ne faite ne te Atua ke oko atu eiloa ki te taimi tenā. Kae ka se toe tupu eiloa se mea penā.”—Maleko 13:19; Tanielu 12:1; Mataio 24:21, 22.

Mea ‵Tupu i te taimi o te fakalavelave lasi

•   Fakaseaiga o lotu ‵se. Ka fakaseai fakapoi atu a lotu ‵se. (Fakaasiga 17:1, 5; 18:9, 10, 21) Ka fakaaoga ne te Atua a malo fakapolitiki kolā e sui ne te Malo ‵Soko ke fakataunu ne latou a tena loto mai te fakaseaiga o lotu ‵se.—Fakaasiga 17:3, 15-18. a

•   Oso atu ki te lotu tonu. A atufenua ‵kaufakatasi telā e fakasino ki ei te fakaasiga a Esekielu me ko “Koka mai te fenua o Makoka,” ka taumafai o fakaseai atu a latou kolā e aofia i te tapuakiga tonu. Kae ka puipui eiloa ne te Atua ana tino tapuaki katoa ke mo a ma fakaseai atu.—Esekielu 38:1, 2, 9-12, 18-23.

•   Fakamasinoga o tino kolā e ‵nofo i te lalolagi. Ka fakamasino ne Iesu a tino katoa kae ka “vaevae ne ia a tino, e pelā eiloa mo te tausi mamoe e ‵vae ne ia a mamoe mai kouti.” (Mataio 25:31-33) A te fakamasinoga ka fakavae eiloa ki a latou kolā ne ‵lago io me seki ‵lago atu ki “taina” o Iesu” ko latou kolā ka pule fakatasi mo ia i te lagi.—Mataio 25:34-46.

•   Fakamaopoopoga o pule lagolago i te Malo. Mō tino fakamaoni kolā ne filifili aka ke pule fakatasi mo Keliso, kafai ko oti atu olotou olaga mai te lalolagi nei, ka toe faka‵tu aka latou ki te ola i te lagi.—Mataio 24:31; 1 Kolinito 15:50-53; 1 Tesalonia 4:15-17.

•   Amaketo. A te “taua [tenei] i te aso lasi o te Atua Malosi Katoatoa” e taku foki ki te “aso o Ieova.” (Fakaasiga 16:14, 16; Isaia 13:9; 2 Petelu 3:12) A latou kolā ka fakamasino ne Keliso me ma‵sei, ka fakaseai atu. (Sefanaia 1:18; 2 Tesalonia 1:6-10) Ka aofia i te mea tenei a te fakaseaiatuga o malo fakapolitiki o te lalolagi tenei, telā e fakaata mai i te Tusi Tapu me ko te manu fekai telā e fitu ana ulu.—Fakaasiga 19:19-21.

Mea ‵tupu ma oti te fakalavelave lasi

•   ‵Loka faka‵mau a Satani mo ana temoni. Ka ‵sai eiloa ne se agelu malosi a Satani mo ana temoni i te “lua ‵poko,” se fakailoga o te sē gasuesue eiloa, io me ko ‵mate. (Fakaasiga 20:1-3) E pelā eiloa me ‵loka a Satani i te falepuipui i te taimi tenā; ka se mafai eiloa o fai ne ia se mea ki tino.—Fakaasiga 20:7.

•   Ko kamata te Afe Tausaga. Ka kamata te pulega o te Malo i te 1,000-tausaga telā ka maua i ei ne tino a fakamanuiaga e uke. (Fakaasiga 5:9, 10; 20:4, 6) Ka isi se aofaki lasi o te “vaitino tokouke” kolā ka “‵sao mai te fakalavelave lasi,” kae ka ola i te taimi e kamata ei te Pulega i te Afe Tausaga i te lalolagi.—Fakaasiga 7:9, 14; Salamo 37:9-11.