Ao! Ne aumai te Tusi Tapu mai te Atua “telā e fakamafanafana ne ia a tino loto vāi‵vai.” (2 Kolinito 7:6) E tiga loa e se fai te Tusi Tapu mo fai se tusi mō tino ma‵saki ki te mafaufau, kae ko oti ne fesoasoani atu ki tino e tokouke ke manumalo i lagonaga fia fakamate. E mafai foki o fesoasoani atu ki a koe a pati fakatonutonu aoga i ei.

•  Ne a pati fakatonutonu aoga e maua i te Tusi Tapu?

•  E mata, e isi ne tala i te Tusi Tapu e uiga ki tino kolā ne ma‵nako ke ‵mate latou?

•  Ne a tusi fai‵tau i te Tusi Tapu e mafai o fesoasoani ke ‵teke atu koe ki lagonaga fia fakamate?

•  Kae e a māfai ko fai mai sou taugasoa, “Au ko fia mate”?

•  Kae e a māfai ko oti ne taumafai au o fakamate i aso mua?

• ● Fakaasi ou lagonaga.

   Pati i te Tusi Tapu: “A te taugasoa tonu e fakaasi atu ne ia te alofa i taimi katoa, kae fai pelā me se taina ne fanau mai mō taimi o te puapuaga.”—Faataoto 17:17.

   Tena uiga: E ‵tau o maua ne tatou a te fesoasoani o nisi tino māfai ko loto mafatia.

   Kafai e se fakaasi atu ou lagonaga, ko tauave ne koe se amoga telā ka se mafai ne koe o amo. Kae kafai e fakaasi ou lagonaga, ka gasolo o māmā a te amoga tenā kae maua ne koe se kilokiloga ‵lei.

   ‵Tofo te mea tenei: Faipati ki se tino i te aso nei, kāti se tino i te kāiga io me se taugasoa telā e fakatalitonugina. a E mafai foki o tusi ne koe ki lalo ou lagonaga.

• ● ‵Sala ki se fesoasoani mai tokita.

   Pati i te Tusi Tapu: “A tino kolā e malosi ‵lei e se ma‵nako ki se tokita, kae ko tino fua kolā e ma‵saki.”—Mataio 9:12.

   Tena uiga: E ‵tau o ‵sala ki se fesoasoani mai tokita māfai ko ma‵saki tatou.

   A lagonaga fia fakamate e mafai o fai pelā me se fakailoga o te masaki i feitu tau te mafaufau io me ko feitu tau lagonaga. E pelā mo masaki masani, e seai se pogai e ‵tau o ‵ma i ei. A te masaki i feitu tau te mafaufau io me ko feitu tau lagonaga e mafai o faka‵lei aka.

   ‵Tofo te mea tenei: ‵Sala fakavave ki te fesoasoani o se tokita.

• ● Masaua me e atafai mai te Atua.

   Pati i te Tusi Tapu: “E lima manu eva fo‵liki e mafai o ‵togi ki tupe fo‵liki e lua, i ne? Kae e se mafai o puli i te Atua se manu e tasi i a latou. . . . Sa ma‵taku; e sili atu te tāua o koutou i lō manu eva fo‵liki e uke.”—Luka 12:6, 7.

   Tena uiga: E tāua koe ki te Atua.

   E mafai o mafaufau koe me e seai se tino e atafai atu, kae lavea ne te Atua ou lagonaga logo‵mae. E atafai a ia ki a koe—faitalia me ko se toe fia ola koe. “A te loto telā ko fatifati kae tuki palapala, e te Atua, ka se ‵teke ne koe,” ko pati i te Salamo 51:17. E manako te Atua ke tumau koe i te ola me e alofa a ia ki a koe.

   ‵Tofo te mea tenei: Ke iloilo a fakamaoniga mai te Tusi Tapu me e alofa te Atua ki a koe. E pelā mo te mataupu e 24 o te tusi faka-te-Tusi Tapu ko te Draw Close to Jehovah.

• ● ‵Talo ki te Atua.

   Pati i te Tusi Tapu: “‵Pei atu ne koutou otou manava‵sega katoa ki luga i [te Atua], me e atafai a ia ki a koutou.”—1 Petelu 5:7.

   Tena uiga: E ‵kami koe ne te Atua ke fakaasi atu mo te fakamaoni a mea kolā e ‵mafa i tou mafaufau.

   E mafai o tuku atu ne te Atua se lagonaga filemu mo te malosi ke kufaki i tou tulaga. (Filipi 4:6, 7, 13) I te auala tenei, e tausi ne ia a latou kolā e ka‵laga atu ki a ia mo te loto fakamaoni.—Salamo 55:22.

   ‵Tofo te mea tenei: ‵Talo ki te Atua i te aso nei. Fakaaoga tena igoa ko Ieova, kae fakaasi atu ki a ia ou lagonaga. (Salamo 83:18) Akai atu mō tena fesoasoani ke mafai ne koe o kufaki i tou tulaga.

• ● Mafaufau ‵loto ki te fakamoemoega i te Tusi Tapu mō aso mai mua.

   Pati i te Tusi Tapu: “E fai te fakamoemoega tenei e pelā me se taula mō ‵tou ola, e mautinoa kae ‵mautakitaki.”—Epelu 6:19.

   Tena uiga: E mafai o mafuli‵fuli ou lagonaga e pelā me se vaka i taimi o se matagi, kae ko te fakamoemoega i te Tusi Tapu e mafai o faka‵mautakitaki ne ia koe.

   A te fakamoemoega tenā e sē se moemiti fua kae e fakavae ki te tautoga a te Atua me ka fakaseai atu ne ia te māfuaga o ‵tou logo‵maega.—Fakaasiga 21:4.

   ‵Tofo te mea tenei: Tauloto ki mea e uke atu e uiga ki te fakamoemoega i te Tusi Tapu mai te faitau ki te mataupu e 5 o te polosiua ko Te Tala ‵Lei Mai te Atua!

• ● Fai se mea telā e fiafia koe ki ei.

   Pati i te Tusi Tapu: “A te loto fiafia se vailakau ‵lei.”—Faataoto 17:22.

   Tena uiga: Kafai e fai ne tatou a mea kolā e fia‵fia tatou ki ei, ka mafai o momea aka te ‵lei o ‵tou mafaufau io me ko lagonaga.

   ‵Tofo te mea tenei: Fai se mea telā e fiafia sāle koe ki ei. E pelā mo te fakalogologo ki pese ‵gali, faitau ki se mea fakamalosi loto, io me e fai se mea telā e fiafia koe ki ei. Ka gasolo aka koe o fiafia māfai e fai ne koe se mea ke fesoasoani atu ki nisi tino, faitalia me se tamā mea fua.—Galuega 20:35.

• ● Tausi faka‵lei tou malosi faka-te-foitino.

   Pati i te Tusi Tapu: “Me i fakamalosiga faka-te-foitino e aoga.”—1 Timoteo 4:8.

   Tena uiga: E maua ne tatou a mea aoga māfai e fakamalosilosi ‵tou foitino, lava te moe kae kai ki mea‵kai aoga.

   ‵Tofo te mea tenei: Ke sasale fakamakinikini, faitalia me mō se 15 minute fua.

• ● Masaua me i lagonaga mo nisi mea i te olaga e mafuli‵fuli.

   Pati i te Tusi Tapu: “E se iloa ne koutou te mea ka tupu ki otou ola ma taeao.”—Iakopo 4:14.

   Tena uiga: E mafai o se tumau—se fakalavelave faigata—ke oko foki loa ki se fakalavelave telā e foliga mai me ko tō faigata.

   Faitalia me e pefea te masei o tou tulaga i te aso nei, e mafai o mafuli i te aso taeao. Tela la, ‵sala ki auala ke mafai o kufaki i ei. (2 Kolinito 4:8) A tou tulaga faigata e mafai o mafuli fakamuli, kae e se mafai ne koe o ‵fuli a te tulaga māfai koe ko fakamate.

   ‵Tofo te mea tenei: Faitau ki tala i te Tusi Tapu o tino kolā ne loto vāi‵vai kae ne ma‵nako ke ‵mate latou, kae onoono ki te auala ne ‵fuli olotou olaga ki se tulaga tai ‵lei atu—kae maise ki auala kolā ne seki mafau‵fau latou ki ei. Mafaufau ki nai fakaakoakoga.

 Ao. E fai mai i te Tusi Tapu e uiga ki tino kolā ne fai mai ne latou a pati tai ‵pau penei, “Au ko fia mate.” Ne seki ‵liko ne te Atua latou kae ne fesoasoani atu ki a latou. E mafai foki o fesoasoani atu a ia ki a koe.

Elia

•  ● Ko oi a ia? A Elia se pelofeta mafi. Kae ne maua foki ne ia a te loto vāivāi. “A Elia se tagata e isi ne ana lagonaga e penei mo tatou,” ko pati i te Iakopo 5:17.

•  ● Kaia ne fia mate ei a ia? I se taimi e tasi, ne maua ne Elia a lagonaga, me seai se tino e atafai atu, mataku, kae seai sena aoga. Tenā ne fakatagi atu a ia: “Ieova, na ave kea‵tea toku ola.”—1 Tupu 19:4.

•  ● Se a te mea ne fesoasoani atu ki a ia? Ne fakaasi atu ne Elia ana lagonaga ki te Atua. Ne fakamalosi atu pefea te Atua ki a ia? Ne fakaasi atu ne te Atua tena atafai e auala i se fakaasiga o Tena ‵mana. Ne fakamaoni atu foki ne ia ki a Elia me koi manakogina eiloa a ia kae ne tuku atu foki ne ia se tino fesoasoani atafai kae atamai.

•  ▸ Faitau e uiga ki a Elia: 1 Tupu 19:2-18.

Iopu

•  ● Ko oi a ia? A Iopu se tagata maumea mo se kāiga lasi, telā ne tavini fakamaoni atu ki te Atua tonu.

•  ● Kaia ne fia mate ei a ia? Ne mafuli fakavave te olaga o Iopu ki se tulaga matagā. Ne ‵galo ana kope katoa. Ne ‵mate ana tama‵liki katoa i se fakalavelave tupu fakafuasei. Ne maua ne ia se masaki fakalogo‵mae. Kae fakamuli loa, ne ‵losi atu i se auala sē ‵lei kae sē tonu me ne fakamāfua aka eiloa ne ia ana fakalavelave. Ne fai mai a Iopu: “Au e takalialia ki toku ola; e se manako au ke tumau i te ola.”—Iopu 7:16.

•  ● Se a te mea ne fesoasoani atu ki a ia? Ne ‵talo a Iopu ki te Atua kae faipati atu ki nisi tino. (Iopu 10:1-3) Ne fakamalosi aka a ia ne se taugasoa alofa atafai, ko Eliu, telā ne fesoasoani atu ke maua ne ia se kilokiloga ‵lei ki tena tulaga. Kae e sili i mea katoa, ne talia ne Iopu a pati fakatonutonu mo te fesoasoani mai te Atua.

•  ▸ Faitau e uiga ki a Iopu: Iopu 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Mose

•  ● Ko oi a ia? A Mose se takitaki o te kau Isalaelu i aso mua kae se pelofeta fakamaoni.

•  ● Kaia ne fia mate ei a ia? Ne uke ‵ki a tiute o Mose, kae ne fāmeo faeloa a tino e uiga ki a ia telā ne fi‵ta a ia i ei. Tenā, ne tagi atu ei a ia ki te Atua: “Fakamolemole ke na tamate ne koe au i te taimi nei.”—Numela 11:11, 15.

•  ● Se a te mea ne fesoasoani atu ki a ia? Ne fakaasi atu ne Mose ki te Atua ana lagonaga. Ne fesoasoani atu te Atua ki a Mose ke fakamāmā ana tiute ke mo a ma tō mafatia a ia.

•  ▸ Faitau e uiga ki a Mose: Numela 11:4-6, 10-17.