A Mikaele, ne fakasino atu ki ei a nisi lotu e pelā me ko “Mikaele Tapu,” se fakamaoniga me ne tuku atu te igoa tenā ki a Iesu mai mua kae mai tua ifo foki o tena olaga i te lalolagi. a Ne kinau a Mikaele mo Satani mai tua o te mate o Mose kae ne fesoasoani atu foki ki se agelu ke fakaoko atu te fekau a te Atua ki te pelofeta ko Tanielu. (Tanielu 10:13, 21; Iuta 9) Ne ola a Mikaele e ‵tusa mo te uiga o tena igoa​—“Ko oi e ‵Pau mo te Atua?”​—mai te ‵puluga ne ia o te pulega a te Atua mo te taua atu ki fili o te Atua.​—Tanielu 12:1; Fakaasiga 12:7.

 Mafaufau la ki te pogai e ‵lei ei ke fakaiku aka me i a Iesu ko Mikaele, te agelu pule.

•   A Mikaele ko “te agelu pule.” (Iuta 9) A te tofi “agelu pule,” e fakauiga ki te “pule o agelu,” kae e sae mai fua i fuaiupu e lua i te Tusi Tapu. I koga konā, a te pati e fakasino atu ki se tino e tokotasi, telā e fakaasi mai i ei me e tokotasi fua te agelu e tauave ne ia te tofi tenā. E tasi te fuaiupu mai i ei, e fai mai me i te Aliki ko Iesu telā ne toetu aka “ka fanaifo . . . mai te lagi kae kalaga o fakatonu mai, i te leo o te agelu pule.” (1 Tesalonia 4:​16) A Iesu e maua ne ia te “leo o te agelu pule” me i a ia ko Mikaele, te agelu pule.

•   E fakatonu ne Mikaele se kautau o agelu. “A Mikaele mo ana agelu ne taua mo te talako,” ko Satani. (Fakaasiga 12:7) Ne maua ne Mikaele se pulega lasi i te koga o tino faka-te-agaga, me ne taku a ia ki se “tokotasi o pelenise tāua” mo te “pelenise sili.” (Tanielu 10:13, 21; 12:1) Ne tuku atu a tofi konei ki a Mikaele e pelā me ko “te takitaki pule o te kautau o agelu,” e ‵tusa mo pati a David E. Aune, se tagata poto i te Feagaiga Fou.

   E taku mai i te Tusi Tapu se igoa fua e tasi o se tino telā e isi sena pulega ki se kautau o agelu. E fakasino atu ki “te taimi e fakaasi mai ei te Aliki ko Iesu mai te lagi fakatasi mo ana agelu ‵mana i se afi ‵ka ulaula, o tuku atu te taui ma sui.” (2 Tesalonia 1:​7, 8; Mataio 16:27) A Iesu ne “fanatu . . . ki te lagi, kae ne fai ke ‵nofo mai lalo i a ia a agelu, pulega mo tino pule.” (1 Petelu 3:​21, 22) E sē se mea ‵lei māfai e fakatoka ne te Atua a Iesu mo Mikaele ke fai mo takitaki o te kau agelu tapu. I lō te fai penā, se mea ‵lei ke fakaiku aka me i te avā igoa konā, ko Iesu mo Mikaele e fakasino ki se tino e tokotasi.

•   Ka “tu aka” a Mikaele i “se taimi o te puapuaga” telā e ‵tu ‵kese. (Tanielu 12:1) I te tusi o Tanielu, a te tugapati “tu aka” e masani o fakasino atu ki se tupu telā e tu aka ke gasuesue o fai se mea tāua ‵ki. (Tanielu 11:​2-4, 21) A Iesu, telā e taku ko “Te Muna a te Atua,” ka tu aka o fai se mea tāua ‵ki e pelā me ko te “Tupu o tupu” ke fakaseai a fili katoa o te Atua kae puipui foki a tino o te Atua. (Fakaasiga 19:11-​16) Ka fai eiloa a ia penā i “te ‵toe fakalavelave lasi telā ne seki tupu aka eiloa talu mai te kamataga o te lalolagi.”​—Mataio 24:21, 42.