E Mata, e Nofo te Atua i so se Koga?
Te tali mai te Tusi Tapu
A te Atua e lavea ne ia a mea katoa kae mafai o fai ne ia so se mea i so se koga e manako a ia ki ei. (Faataoto 15:3; Epelu 4:13) Kae e se akoako mai i te Tusi Tapu me i te Atua e nofo i so se koga i so se taimi. Kae e fakaasi mai i ei me i a ia se tino telā e nofo i se koga mautinoa.
Foliga o te Atua: A te Atua se tino faka-te-agaga. (Ioane 4:24) E se lavea a ia ne tino. (Ioane 1:18) A fakaasiga e uiga ki te Atua kolā e tusi i te Tusi Tapu e fakaatai mai faeloa i ei me e nofo a ia i se koga mautinoa. E seai se fakaasiga e fakaata mai i ei me nofo a ia i so se koga.—Isaia 6:1, 2; Fakaasiga 4:2, 3, 8.
Te koga nofo o te Atua: E nofo te Atua i se koga o agaga, telā e ‵kese mai te koga e ‵nofo i ei ana mea faka-te-foitino ne faite. E isi loa se ‘koga nofo o te Atua i te lagi.’ (1 Tupu 8:30) E fakaasi mai i te Tusi Tapu se taimi ne olo atu ei a tino faka-te-agaga o “‵tu i olotou tulaga i mua o Ieova,” a e fakaasi mai i ei me e nofo te Atua i se koga mautinoa.—Iopu 1:6.
Kafai e se nofo te Atua i so se koga, e mata, e atafai tonu mai a ia ki a au?
Ao. E atafai malosi a te Atua ki tino taki tokotasi. E tiga loa e nofo a ia i te koga o agaga, kae e lavea ne te Atua a tino i te lalolagi kolā e ma‵nako tonu o fakafiafia a ia, kae toka faeloa o fesoasoani atu ki a latou. (1 Tupu 8:39; 2 Nofoaiga Tupu 16:9) Mafaufau la ki te auala e saga tonu mai ei a Ieova ki ana tino tapuaki fakamaoni:
Taimi e ‵talo koe: E lagona ne Ieova tau ‵talo i te taimi eiloa e faipati ei koe.—2 Nofoaiga Tupu 18:31.
Taimi e mafatia koe: “A Ieova e pili ki a latou kolā e loto mafatia; e fakaola ne ia a latou kolā ko fati‵fati olotou loto.”—Salamo 34:18.
Taimi e manako koe ki se takitakiga: Ka tuku atu ne Ieova ki a koe a te “‵loto o te malamalama kae akoako koe e auala i tena Muna ko te Tusi Tapu.—Salamo 32:8.
Manatu sē ‵tonu me i te Atua e nofo i so se koga
Manatu sē tonu: A te Atua e nofo i so se mea ne faite ne ia.
Manatu tonu: A te Atua e se nofo i te lalolagi io me se isi koga i te iunivesi. (1 Tupu 8:27) Se mea tonu me i fetū mo nisi mea aka ne faite e folafola atu ei “a te ‵malu o te Atua.” (Salamo 19:1) Kae ko te Atua e se nofo i ana mea ne faite e pelā me se tino ‵lomi ata e mafai o sae sena ata i loto i tena ata ne ‵lomi. E tonu, e mafai o iloa ne tatou a te tino ‵lomi ata mai tena ata ne ‵lomi. I se auala tai ‵pau, a mea e lavea ne tatou i te lalolagi e fakaasi mai ei a “uiga sē lavea” o te ‵tou Mafuaga, e pelā mo tena malosi, tena poto, mo tena alofa.—Loma 1:20.
Manatu sē tonu: E ‵tau o nofo a te Atua i so se koga ko te mea ke iloa ne ia a mea katoa kae ke maua foki ne ia te malosi katoatoa.
Manatu tonu: A te agaga tapu o te Atua, io me ko tena malosi galue, ko te ‵mana o te Atua telā e fakaaoga ne ia. E auala i tena agaga tapu, e mafai o lavea ne te Atua a mea kae fai foki so se mea i so se koga, i so se taimi e aunoa mo te nofo tonu i konā.—Salamo 139:7.
Manatu sē tonu: E akoako mai te Salamo 139:8 me i te Atua e nofo i so se koga me e fai mai i ei: “Kafai e fanaka au ki te lagi e nofo koe i konā, kae kafai e fakatoka ne au toku moega i te Tanuga, kiloke! e nofo koe i konā.”
Manatu tonu: E se faipati te tusi faitau tenei e uiga ki te koga e nofo i ei a te Atua. E akoako mai i pati fakauiga konā, me e seai se koga e tō ‵mao ki te Atua ke faigata o fesoasoani mai a ia ki a tatou.
a A Ieova ko te igoa o te Atua telā e fakaasi mai i te Tusi Tapu.
You May Also Like
TALI KI FESILI MAI TE TUSI TAPU
Se a te Agaga Tapu?
Se mea ‵lei eiloa ke fakasino a te Tusi Tapu ki te agaga tapu me ko “lima” o te Atua.
MATOU
Fakamolemole ke Āsi Atu se Tino
Sau‵tala ki se fesili faka-te-Tusi Tapu, io me tauloto e uiga ki Molimau a Ieova.