E filifili ne te Atua se aofaki mautinoa o Kelisiano fakamaoni kolā ka faka‵tu aka ki te ola i te lagi māfai ko ‵mate latou. (1 Petelu 1:​3, 4) Kafai ko oti ne filifili latou, e ‵tau o fakatumau ne latou te lotou fakatuanaki mo amioga faka-Kelisiano ko te mea ke se galo i a latou a te lotou taui faka-te-lagi.​—Efeso 5:5; Filipi 3:​12-​14.

Ne a mea ka fai ne latou kolā e olo ki te lagi?

 Ka tavini fakatasi atu latou mo Iesu e pelā me ne tupu mo faitaulaga mō se 1,000 tausaga. (Fakaasiga 5:​9, 10; 20:6) Ka aofia latou i te “lagi fou,” io me ko te pulega faka-te-lagi telā ka pule ifo ki te “lalolagi fou,” io me ki tino i te lalolagi. Ka fesoasoani atu a pule faka-te-lagi konā ke toe faka‵foki atu a tino ki tulaga amio‵tonu kolā ne manako ki ei te Atua i te kamataga.​—Isaia 65:17; 2 Petelu 3:​13.

E tokofia ka faka‵tu aka ki te lagi?

 E fakaasi mai i te Tusi Tapu me e toko 144,000 a tino ka faka‵tu aka ki te ola i te lagi. (Fakaasiga 7:4) I te fakaasiga telā ne fakamau i te Fakaasiga 14:​1-3, ne lavea atu ne te apositolo ko Ioane me “ne tu mai te Tamā Mamoe i luga i te Mauga o Siona, kae ne ‵tu fakatasi mai mo ia te toko 144,000 o tino.” I te fakaasiga tenei, a “te Tamā Mamoe” ko Iesu telā ne toetu aka. (Ioane 1:​29; 1 Petelu 1:​19) A te “Mauga o Siona” e fakaata mai i ei a te tulaga maluga o Iesu mo te ‵toko 144,000 kolā ka pule fakatasi mo ia i te lagi.​—Salamo 2:6; Epelu 12:22.

 A latou “kolā ne kalagagina [kae] filifilia” ke pule fakatasi mo Keliso i te Malo ne fakasino atu ki a latou e pelā me ko te “lafu mamoe foliki.” (Fakaasiga 17:14; Luka 12:32) E fakaasi mai i te mea tenei me i a latou se aofaki foliki fua māfai e fakatusa ki te aofaki kātoa o mamoe a Iesu.​—Ioane 10:16.

Manatu ‵se e uiga ki a latou kolā e olo ki te lagi

 Manatu ‵se: A te 144,000 i te Fakaasiga se aofaki fakatusa, kae e sē se aofaki tonu.

 Manatu tonu: E tiga eiloa e aofia i te Fakaasiga a napa fakatusa, e isi foki eiloa ne napa ‵tonu. E pelā mo “igoa e 12 o apositolo e toko 12 a te Tamā Mamoe.” (Fakaasiga 21:14) Mafaufau ki te fakamaoniga me i te napa ko te 144,000 se aofaki tonu.

 E taku mai i te Fakaasiga 7:4 me i “te aofaki o latou kolā ne fakamailogagina [io me, kolā ko mautinoa ki te ola i te lagi], e toko 144,000.” Kae mai tua eiloa o te fuaiupu tenei, e isi se potukau i te lua telā e ‵kese: “se vaitino e tokouke, telā e se mafai o lau aka ne se tagata.” A latou kolā e aofia i te “vaitino tokouke” e maua foki ne latou te fakaolataga mai te Atua. (Fakaasiga 7:​9, 10) Kafai a te 144,000 se aofaki fakatusa, a te fakasino atu ki se potukau e aunoa mo se aofaki, ko tena uiga ka seai se ‵kese i te va o potukau e lua konā. a

 I tafa i ei, e fai mai me i te toko 144,000 “ne ‵togi mai i tino katoa e pelā me ne fuataga muamua.” (Fakaasiga 14:4) A te tugapati “fuataga muamua” e fakasino atu ki se tamā potukau ne filifili aka. E fakamatala faka‵lei mai i ei a latou kolā ka pule fakatasi mo Keliso i te lagi, ki tino e tokouke kolā ka ola i te lalolagi.​—Fakaasiga 5:​10.