Ikai. E se fai mai te Tusi Tapu me e ma‵sei a tupe io me ko te māfuaga o mea ma‵sei katoa. A te tugapati masani “a tupe ko te māfuaga o mea ma‵sei katoa” se tugapati mai te Tusi Tapu telā e se siki katoatoa sāle mai ne tino kae fakamatala ‵se foki ne latou. A te ‵tonuga loa, e fai mai te Tusi Tapu “me i te manako ki tupe, ko te māfuaga tenā o mea ma‵sei katoa.” a—1 Timoteo 6:10, Tusi Tapu, Tuvalu, i a matou a mataimanu ‵kese.

•  Ne a pati i te Tusi Tapu e uiga ki tupe?

•  Kaia e fai mai te Tusi Tapu ke fakaeteete i te fiafai ki tupe?

•  E aoga pefea ki a tatou a pati fakatonutonu i te Tusi Tapu e uiga ki tupe?

•  Tusi fai‵tau i te Tusi Tapu e uiga ki tupe

 E fai ‵tonu mai te Tusi Tapu, me kafai e fakaaoga faka‵lei a tupe, e mafai o aoga, kae fai foki pelā me “se puipuiga.” (Failauga 7:12) E se gata i ei, e fakamālō mai te Tusi Tapu ki a latou kolā e fakaasi atu te kaimalie ki nisi tino, kae e mafai foki o aofia i ei a meaalofa tupe.—Faataoto 11:25.

 Kae e fai mai foki te Tusi Tapu ke fakaeteete tatou i te faiga o tupe mo fai te ‵toe mea tāua i te olaga. E fai mai penei: “Ke ‵kalo kea‵tea mai te fia‵fai ki tupe i otou olaga, kae ke lotoma‵lie ki mea ko maua ne koutou.” (Epelu 13:5) A te akoakoga ko te fakaaoga faka‵lei faeloa o tupe kae ke mo a ma kausaki atu ki koloa e uke. I lō te fai penā, e ‵tau mo tatou o lotoma‵lie ki mea kolā e ‵tau o maua, e pelā mo meakai, gatu, mo se fale.—1 Timoteo 6:8.

 A tino kaima‵nako ka se maua ne latou te ola se-gata-mai. (Efeso 5:5) A te pogai e tasi, me i te kaimanako se vaega o te ifo ki tupua, io me se tapuakiga ‵se. (Kolose 3:5) A te suā pogai, ona ko olotou taumafaiga ke maua a mea e ma‵nako latou ki ei, e fulitua sāle atu a tino kaima‵nako ki akoakoga fakavae ‵lei. A latou kolā e ‘ma‵nako ke mau‵mea vave latou ka se tumau i te ‵ma,’ ko pati i te Faataoto 28:20. E mafai foki o tofotofogina latou ke fai a amioga solitulafono e pelā mo te faimālō ki tupe fakakolekole, ‵fao mea, kaisoa, kaisoa tino, io me tatino.

 Kafai foki e se iku atu a te fiafai tupe ki te faiga o amioga ma‵sei, kae e mafai o maua mai i ei a nisi ikuga sē ‵lei. E fai mai te Tusi Tapu me i “tino kolā e ma‵nako ke mau‵mea latou e ‵to atu ki te fakaosoosoga mo te malei mo manakoga sē aoga kae fakalogo‵mae.”—1 Timoteo 6:9.

 Kafai e se gutugutulua tatou ki tulaga tāua i mea tau amioga ona ko tupe, ka maua ne tatou se lagonaga āva ki a tatou eiloa, fakatasi mo te taliaga mo te ‵lago mai o te Atua. E tauto mai te Atua ki tino kolā e taumafai malosi o fakafiafia a ia: “Ka se tiaki lele eiloa ne au a koe, kae ka se tuku tiaki lele eiloa ne au a koe.” (Epelu 13:5, 6) E fakamautinoa mai foki a ia me i “te tagata fakamaoni ka maua ne ia a fakamanuiaga e uke.”—Faataoto 28:20.