E ‵tusa mo te lipoti mai te U.S. Centers for Disease Control and Prevention e nofo ki se āfa o tino kolā ne fakasau‵tala aka mai te 15 ki te 19 olotou tausaga, ko oti ne aofia i faifaiga fakatauavaga kolā e fakaaoga i ei te gutu. “Kafai e faipati koe ki talavou [e uiga ki faifaiga fakatauavaga kolā e fakaaoga i ei te gutu] ka fai atu latou me e seai se mea e masei i ei,” ko pati a Sharlene Azam, te tino ne tusi ne ia te tusi ko te Oral Sex Is the New Goodnight Kiss. “A te ‵tonuga loa, e se ‵kilo latou ki ei e pelā me ne faifaiga fakatauavaga.”

•  Se a tau faka‵tau?

•  Ne a manatu ‵tonu?

•  Kaia e tāua ei?

Tali mai ao io me ikai ki fesili konei.

1. E mata, e mafai o faitama se tamaliki fafine ona ko faifaiga fakatauavaga kolā e fakaaoga ei te gutu?

   1. Ao

   2. Ikai

2. E mata, e mafai o maua ne se tino se masaki ona ko faifaiga fakatauavaga kolā e fakaaoga ei te gutu?

   1. Ao

   2. Ikai

3. E mata, e aofia tonu a te fakaaogaga o te gutu i faifaiga fakatauavaga?

   1. Ao

   2. Ikai

Ke fakatusa au tali ki tali mai lalo nei.

1. E mata, e mafai o faitama se tamaliki fafine ona ko faifaiga fakatauavaga kolā e fakaaoga ei te gutu?

   Tali: Ikai. Tenā te pogai e fakaiku ‵se ei ne tino e tokouke me i faifaiga fakatauavaga kolā e fakaaoga i ei te gutu, e seai se mea e masei i ei.

2. E mata, e mafai o maua ne se tino se masaki ona ko faifaiga fakatauavaga kolā e fakaaoga ei te gutu?

   Tali: Ao. So se tino e aofia i faifaiga fakatauavaga kolā e fakaaoga i ei te gutu, e mafai o poko i te ‵sega (A io me ko te B), fakasinasina koga tapu, polokī, fakakula‵kula koga tapu, SELAMETE, mo te sifilisi.

3. E mata, e aofia tonu a te fakaaogaga o te gutu i faifaiga fakatauavaga?

   Tali: Ao. So se amioga telā e aofia i ei te fakaaogaga o koga tapu o te suā tino​—e pelā mo te ‵moe fakatauavaga, te fakaaogaga o te gutu, te muli, te milimiliga o koga tapu o te suā tino​—e aofia i faifaiga fakatauavaga.

Ke mafaufau ki nai tusi fai‵tau kolā e isi se lotou sokoga ki te mataupu ko te fakaaogaga o te gutu i faifaiga fakatauavaga.

Pati i te Tusi Tapu: “Tenei eiloa te loto o te Atua, ko koutou . . . ke ‵kalo kea‵tea mai i amioga fakatauavaga sē ‵tau.”​—1 Tesalonia 4:3.

A te pati i te ‵gana mua telā ne ‵fuli ki “amioga fakatauavaga sē ‵tau” e fakasino atu ki faifaiga fakatauavaga katoa kolā e fai ne tino e seki a‵vaga, e aofia i ei a te ‵moe fakatauavaga, te fakaaogaga o te gutu, te muli, te milimiliga o koga tapu o te suā tino. A te tino e aofia i faifaiga fakatauavaga sē ‵tau e mafai o tau ne ia a ikuga sē ‵lei, kae ko te ‵toe mea fakamataku ko te fakamaseiga o tena va fakataugasoa mo te Atua.​—1 Petelu 3:12.

Pati i te Tusi Tapu: “So se tino e fai faeloa ne ia a amioga fakatauavaga sē ‵tau e agasala ki tena foitino.”​—1 Kolinito 6:18.

A faifaiga fakatauavaga kolā e fakaaoga i ei te gutu e mafai o fakalogo‵mae mai i te feitu faka-te-foitino mo te feitu faka-te-agaga. E mafai foki o pokotia malosi i ei a lagonaga o se tino. “A lagonaga me ne fakaaoga koe ne te suā tino, salamō, io me ko te tuku faka‵sau atu e ‵pau eiloa mo lagonaga e maua mai i te ‵moe fakatauavaga,” ko pati i te tusi ko te Talking Sex With Your Kids. “A lagonaga sē ‵lei katoa kolā e maua ne se tino i te ‵moe fakatauavaga e mafai foki o maua i so se faifaiga fakatauavaga kolā e fai i se auala sē tonu. A amioga fakatauavaga ko te ‵moe fakatauavaga eiloa.”

Pati i te Tusi Tapu: “Au, Ieova, ko tou Atua, ko te Atua telā e akoako ne ia koe ke ‵lei koe.”​—Isaia 48:17.

E mata, e talitonu koe me i tulafono a te Atua e uiga ki faifaiga fakatauavaga e aoga tonu ki a koe? Io me mafaufau koe me ko fakatapula i ei tou saolotoga? Ke fesoasoani atu ke tali a fesili konā, mafaufau ki se auala e ‵fonu i mea fakatele‵tele mo faka‵pulaga ki te makini, moli o tulafono i auala, mo fakailoga ki koga e ‵tau o ‵tu i ei. E mata, e kilo koe ki fakailoga konā e pelā me e fakatapula i ei tou saolotoga io me se puipuiga? Se a te mea e mafai o tupu māfai e se fia saga atu koe​—mo nisi tino fakatele‵tele​—ki fakailoga konā?

E penā foki loa mo tulaga o te Atua. Kafai e se fakalogo koe ki ei, ka tau eiloa ne koe te mea ne ‵toki ne koe. (Kalatia 6:7) “Ko te uke o taimi e fakaseaoga ne koe ou talitonuga mo tulaga kae aofia i faifaiga kolā e se ‵lei ou lagonaga i ei, ko te lasi foki o tou sē āva ki a koe eiloa,” ko pati i te tusi ko te Sex Smart. E ‵kese mai i ei, kafai e ola koe e ‵tusa mo tulaga o te Atua, ka fakaasi atu i ei ne koe a tinā amioga ‵ma. Kae sili atu i ei, ka fakatumau ne koe se loto lagona ‵ma.​—1 Petelu 3:16.