A mātua kolā e fai mo fai se fakaakoakoga e ola e tusa mo mea e akoako atu ne latou. E pelā me se fakaakoakoga, e se mafai o fakamoemoe koe i tau tamaliki tagata ka faipati atu ne ia te mea tonu mafai ne lagona ne ia koe e fai atu penei, “fai atu ki tou tagata i a au e galo i te fale,” ona me e se manako koe ke faipati atu ki te tino tenā i te mataloa.

“E isi se tugāpati masani e fai sāle penei, ‘Fakalogo fua ki aku pati, kae sa tautali mai i aku faiga.’ Kae ko te mea tenei e se aoga mō tama‵liki. E fai eiloa latou e pelā me ne omomi kolā e ‵mitigofie ne latou a ‵tou pati mo ‵tou faiga, kae ka fai tonu mai eiloa latou māfai e se fetaui ‵tou fakaakoakoga mo mea kolā e taumafai o akoako atu ne tatou ki a latou.”—David.

FAKATAKITAKIGA MAI TE TUSI TAPU: “A koe telā e talai atu “Sa kaisoa,” e a, a koe e kaisoa?”—Loma 2:21.

E lasi te fakamalosiga e maua ne tama‵liki foliki mo talavou mai i olotou mātua i lō nisi tino—e aofia loa i ei olotou kautama. Tela la, i o koe eiloa te tiute tāua ke takitaki atu au tamaliki i te auala ‵lei—kae ke fai te mea tenā mai te fakagalue aka a mea e akoako ne koe.

“E mafai o fai‵pati fakaselau taimi māua ki te mā tamaliki kae mānatu aka me e fakalogologo mai eiloa a ia, kae kafai ko sē tau‵tali māua ki mā pati i se taimi fua e tasi, e faigofie ke fakaasi mai ne ia. E iloa ne tama‵liki a mea katoa e fai ne māua, faitalia me mafaufau aka māua me e se fai eiloa latou penā.”—Nicole.

FAKATAKITAKIGA MAI TE TUSI TAPU: “Kae ko te poto mai te lagi . . . e se amio ‵pelo.”—Iakopo 3:17.

Ke iloilo aka ou nisi tulaga. Ne a vaegā fakafiafiaga e masani o onoono koe ki ei? E mata, e pefea au faifaiga ki tau avaga mo au tama‵liki? Ou taugasoa ne vaegā tino pefea? E mata koe e atafai ki nīsi tino? Io me ke fakatoeotoe aka penei, e mata koe se vaegā tino telā e manako ke fakaakoako atu au tama‵liki ki a koe?

“E se fakamoemoe eiloa māua mo taku avaga mā tama‵liki ke tau‵tali ki tulaga kolā e se ola i ei māua i te mā olaga.”—Christine.

Ke fakatoese atu i au mea ‵se ne fai. E iloa ne au tama me i a koe e se ‵lei katoatoa. Mai i te fai atu penei “Au ko ‵se” māfai e manakogina ke fai penā—ki luga i tau avaga mo lua tama‵liki—e fakaasi atu eiloa ne koe i ei se akoakoga ‵lei o te fai mea tonu mo te loto maulalo.

“E manakogina eiloa ke lagona ne tama‵liki māfai tatou e ‵se kae ke lagona foki ne latou a tatou e fakatoese atu e tusa mo ‵tou mea ‵se ne fai. Kafai e se fai eiloa penā tatou, ka tauloto fua ne latou te auala ke ‵funa aka olotou mea ‵se ne fai.”—Robin.