A tou iloga e aofia i ei a mea e uke atu i lō tou igoa totino mo ou foliga. E aofia loa i ei au faifaiga, mea kolā e talitonu koe ki ei, mo ou uiga totino fua. E tonu, a tou iloga e fakamatala kātoa mai ei a mea e uiga ki a koe eiloa—ou foliga i tua mo tou loto.

Kafai e malosi tou iloga, e loto malosi eiloa koe o ‵lago atu ki mea e talitonu koe ki ei i lō te talia ke pule atu ou taugasoa ki a koe.

“A te tokoukega o tino e fai eiloa e pelā me ne tino faite kolā e faka‵tu i sitoa. E se filifili ne latou olotou gatu ke ‵pei ki ei; e fili eiloa ne nisi tino.”—Adrian.

“Ne tauloto eiloa ne au te auala ke ‵lago atu ki te mea tonu faitalia eiloa māfai e faigata ke fai penā. E lavea eiloa ne au oku taugasoa ‵tonu e auala i olotou faifaiga e penā foki aku faifaiga ki a latou.”—Courtney.

FAKATAKITAKIGA MAI TE TUSI TAPU: “Kae fakagata te fakaakoako ki te olaga masani tenei, kae ke ‵fuli otou mafaufau.”—Loma 12:2.

Ko te mea ke iloa ne koe a koe eiloa kae ke mafaufau me fai koe mo fai se vaegā tino pefea, e tau o iloilo aka a mea kolā e ‵lei ei koe, ou vaivaiga mo mea e talitonu koe ki ei. A te auala ‵lei ke iloa aka a mea konā ko te tali aka o fesili konei mai i lalo.

Mea e ‵lei ei koe: Ne a taleni mo mea e apo i ei au? Ne a tulaga e ‵lei i ei au? (E pelā mo se fakaakoakoga: E mata, e fakamaoni au ki te taimi? e loto pulea? Galue malosi? kaimalie?) Ne a mea ‵lei e fai ne au nei?

NISI MANATU FESOASOANI: E mata, e faigata ki a koe ke masaua se mea ‵lei telā ne fai ne koe? Ke fesili atu ki ou mātua io me se taugasoa ‵pili o koe e uiga ki mea ‵lei e lavea ne ia i loto i a koe mo te pogai.

FAKATAKITAKIGA MAI TE TUSI TAPU: “Kae ke iloilo ifo a tino taki tokotasi ki ana galuega eiloa, kae ka isi se pogai ke fiafia ei a ia e uiga ki a ia eiloa, kae ke mo a ma fakatautau ki se isi tino.”—Kalatia 6:4.

Vāivāiga: Ne a vaega o oku uiga totino e manakogina ke galue au ki ei? Ne a tulaga ne tofotofo aka ei au ke fai se mea ‵se? I auala fea e manakogina i ei ke fakagalue malosi aka ne au a te loto pulea?

FAKATAKITAKIGA MAI TE TUSI TAPU: “Kafai e fai atu tatou, “E seai ne omotou agasala,” ko takitaki ‵se ne tatou a tatou eiloa kae e seai se munatonu i loto i a tatou.”—1 Ioane 1:8.

Mea e talitonu koe ki ei: Ne a tulaga o mea tau amioga e tautali au ki ei, kae kaia? E mata, e talitonu au ki te Atua? Ne a fakamaoniga e fakatalitonu mai ki au me e ola tonu a ia? Ne a faifaiga kolā sē fakamaoni e lavea ne au, kae kaia? Ne a mea e talitonu au ki ei e uiga ki aso mai mua?

FAKATAKITAKIGA MAI TE TUSI TAPU: “A te mafaufau ‵lei ka leoleo ne ia koe, kae ko te atamai i te faiga o faka‵tauga ‵lei ka puipui ei koe.”—Faataoto 2:11.