E mata, ko iloa ne saienitisi me ne māfua mai pefea te iunivesi mo te ola i ei? A te tali faigofie ki ei ko te ikai. E fai mai a nisi tino me ko mafai o fakamatala mai ne se vaega o mea tau saienisi kolā e sukesuke ki te iunivesi a tena māfuaga. Kae ne fai mai a Marcelo Gleiser, se polofesa i mea tau fetū, kae galue i Dartmouth College, telā e se talitonu me e isi se Atua, penei: “E seki iloa eiloa ne matou o fakamatala atu a te māfuaga o te iunivesi.”

Ne fai mai foki i te mataupu i te mekesini ko te Science News e uiga ki te māfuaga o te ola: “Kāti e se mafai o iloa tonu atu a te kamataga o te ola i te Lalolagi: A te ukega o fatu mo ivi mua kolā e mafai o iloa atu ei a mea ne ‵tupu i te kamataga o te lalolagi ko leva ne ‵galo atu.” E fakaasi mai i fakamatalaga konā me ne seki mafai eiloa ne saienitisi o tali aka te fesili, Ne māfua mai pefea te iunivesi mo te ola i ei?

Kae kāti ka mafaufau koe, ‘Kafai a te ola i te lalolagi ne faite ne se tino, ko oi la te tino tenā?’ Kae kāti ko oti ne fesili ifo koe penei, ‘Kafai e isi se Mafuaga poto kae alofa, kaia ne talia ne ia ke logo‵mae ana tino ne faite? Kaia ne talia ne ia ke uke a vaegā lotu kese‵kese? Kaia ne talia ne ia ana tino tapuaki ke fai a mea ma‵sei e uke?’

E se mafai ne poto fakasaienisi o tali aka a fesili konā. Kae e se fakauiga i ei me e se mafai o maua ne koe a tali fakamalie loto ki ei. A te ‵tonuga loa, ko oti ne maua ne tino e tokouke a tali fakamalie loto mai te Tusi Tapu.

Kafai e fia iloa ne koe a pogai ne fai mai ei a nisi saeinitisi kolā ne fakaaoga olotou taimi ke suke‵suke ki te Tusi Tapu me ko tali‵tonu latou ki te Mafuaga, fano ki te jw.org. ‵Sala ki “viewpoints on the origin of life.”