E mata, ne faite ne te Atua a te iunivesi mo te ola i ei io me ne māfua mai i a latou eiloa? A pati a tino fai sukesukega kolā ne siki mai i te kamataga o te mataupu tenei mo pati kamata i te Tusi Tapu e tuku mai i ei a tali e lua kolā e ‵kese ‵ki eiloa ki te fesili tenā. E isi ne tino e tali‵tonu katoatoa ki tali kese‵kese konā. Kae e tokouke a tino e seai se lotou tali mautinoa. E kinau a tino e tokouke e uiga ki te mea tenei i toe tusi mo polokalame lauiloa i televise.

Kāti ne fai atu ou faiakoga mo te mautinoa me i te iunivesi mo te ola i ei ne māfua mai i a latou eiloa, kae e seai se Mafuaga. Kae e mata, e isi ne fakamaoniga ne tuku atu ne ou faiakoga me e seai eiloa se Mafuaga? I te suā feitu, kāti ko oti ne lagona ne koe a faifeau e lāuga mai me e isi eiloa se Mafuaga. Kae e mata, e isi ne fakamaoniga ne tuku atu ne latou ke fakatalitonu aka ei olotou pati? Io me ne fai atu fua ke talia ne koe te mea tenā ke fakaasi atu tou “fakatuanaki” io me se akoakoga fakavae a te lotu?

E seai se fakalotolotolua me ko oti ne mafaufau koe e uiga ki te fesili tenei kae kāti e seai se tali mautinoa kai maua ne koe e uiga ki te Mafuaga. Kae kāti ko toe fesili mai koe: E mata, e tāua eiloa ke iloa te tali?

A te lōmiga tenei o te Ala Mai! ka fakamatala mai muamua i ei a manatu ‵tonu kolā ne fakatalitonu atu ki tino e tokouke ke tali‵tonu me e isi eiloa se Mafuaga. Ka oti, ko fakamatala mai i ei a te tāua ke iloa atu a te tali ki te fesili e uiga ki te māfuaga o te ola i te lalolagi.