A te tali ki te fesili tenei e pokotia i ei a ‵tou kilokiloga e uiga ki te olaga.

E mata, se mea ‵lei ke mafau‵fau me i te Atua telā ne faite ne ia a mea ‵gali i te lalolagi nei, ka talia ne ia ke logo‵mae tatou i te olaga?

E ‵kilo atu a tino se ‵lotu ki logo‵maega e pelā me se pogai e tasi ke fakafesili ne latou a kilokiloga a te Atua—io me e mata a ia e ola io me ikai. E tali‵tonu latou me i logo‵maega se fakaasiga me (1) i te Atua e seai sena malosi ke fakagata aka a logo‵maega, (2) e se fia saga lele mai te Atua o fakagata aka a logo‵maega, io me (3) e seai se Atua.

E mata, konei fua a pogai e logo‵mae i ei a tino?

Ne seki faite tatou ne te Atua ke logo‵mae.

E manako a ia ke fia‵fia tatou i te olaga.

“E seai se mea e ‵lei atu mō [tino] i lō te fia‵fia kae fai a te mea ‵lei i olotou olaga, kae e ‵tau foki mo tino katoa o ‵kai kae inu kae maua te fiafia mai i olotou galuega ‵mafa katoa. A te mea tenā ko te meaalofa mai i te Atua.” —FAILAUGA 3:12, 13.

Ne tuku atu ne te Atua ki te tauavaga muamua se olaga ‵lei katoatoa e aunoa mo logo‵maega.

Ne seki faite ne ia a lāua—io me ko lā fanau—ke logo‵mae.

“Ne fai atu te Atua ki a lāua: ‘Ke fanafanau kae ke fakatokouke, faka‵fonu te lalolagi kae pule atu ki ei.’”—KENESE 1:28.

Ne filifili ne te tauavaga muamua ke ‵vae kea‵tea lāua mai i te Atua.

Ona ko te mea tenā, ne maua ne lāua a logo‵maega e uke penā foki a lā fanau katoa.

“E auala i te tagata fua e tokotasi ne oko mai ei te agasala ki te lalolagi, mo te mate e auala i te agasala tenā, i te auala tenā ne maua ei ne tino katoa te mate i te mea ko agasala a latou katoa.”—LOMA 5:12. *

Ne seki faite tatou ne te Atua ke takitaki ne tatou a tatou eiloa.

E pelā loa mo tatou ne seki faite ke mafai o ola i te tai, ne seki faite foki tatou ke mafai o pule ki a tatou eiloa.

“E seai se pule a te tagata ke fakatonutonu ne ia tena auala.”—IELEMIA 10:23.

A te Atua e se manako ko tatou ke logo‵mae.

E manako a ia ke ‵kalo kea‵tea tatou mai fakalavelave.

“Moi ne fakalogo mai eiloa koe ki aku fakatonuga! A tou filemu ka fai eiloa e pelā me se vaitafe.”—ISAIA 48:18.