A lagonaga fakailoga tino e se mafai o ‵galo fakavave. E pelā loa me se masaki e manakogina se taimi tai leva ke faka‵lei i ei, e penā foki te fakailoga tino e manakogina se taimi tai leva ke fakaseai atu. Ne a mea e mafai o fai ne koe ke tapale kea‵tea a te fakailoga tino mai i a koe?

“Ke fakapei ki luga i a koutou a te alofa, me tenā eiloa te fusi ‵lei katoatoa telā e fai ei ke ‵kau fakatasi a tino.”—KOLOSE 3:14.

Se a tena uiga? Kafai e fakaasi atu a faiga a‵lofa ki nisi tino ka fai ei ke fealofani latou. Kafai e fakaasi atu ne koe a te alofa ki nisi tino, ka fai ei ke se lasi tou fakailoga tino. Kafai e fakamasani koe o fakaasi atu a te alofa ki nisi tino ka fai ke manumalo koe i lagonaga takalialia ki nisi tino.

Mafaufau ki auala kolā e mafai ei ne koe o fakaasi atu a te alofa ki nisi tino kolā ne au‵mai i se potukau telā ne se ‵lei tau kilokiloga ki ei. E se manakogina ke uke au mea e fai i te feitu tenei. Taumafai o fai se mea e tasi io me uke atu i mea konei:

• Fakaasi atu a faifaiga ‵lei ki tino o te potukau tenā e auala i te ‵tala atu o se mataloa ki a latou io me fakaavanoa atu se nofoga ke saga‵saga latou.

• Taumafai o sau‵tala mo latou faitalia e se fai‵pati faka‵lei ki te ‵gana a koe.

• Ke kufaki māfai e fai ne latou ne mea kolā e se malamalama i ei koe.

• Ke saga tonu atu māfai ko fai‵pati mai e uiga ki olotou fakalavelave.