Mō se fia afe o tausaga, ne seki ai loa se tino ne iloa ne ia te tali ki te fesili tenā. I te taimi nei, e lau i te fia miliona o tino ne ‵mate atu ona ko famai ‵pisi mo mala. Fakamuli nei, ne iloa aka ei ne saienitisi a te mea tonu. Ne fatoa maua aka ne latou me ne māfua mai a masaki konā mai tamā manu—manu ma‵sei fo‵liki kolā e se lavea mo famai. Ne fesoasoani atu a te fakamatalaga tonu tenā ki tino ke puipui kae ke faka‵lei aka a masaki e uke, kae ne fai ei ke tai ola leva kae malosi ‵lei a te fia piliona o tino.

Kae e a la nisi fesili tāua aka? Se a tau faka‵tau, e mafai pefea o aoga ki a koe a te ‵sala atu ki te munatonu e uiga ki fesili konei mai lalo?

• Ko oi te Atua?

• Ko oi a Iesu Keliso?

• Se a te Malo o te Atua?

• Ne a mea ka ‵tupu i aso mai mua?

E lau i miliona o tino ko oti ne maua ne latou a tali ki fesili konā kae ko momea aka te ‵lei o olotou olaga. E mafai foki o maua ne koe a mea aoga mai tali konā.

Kāti ka mafaufau koe penei, ‘E mafai pefea o maua aka te munatonu e uiga ki so se mea?’ A te ‵tonuga loa, a te ‵sala atu ki te munatonu e uiga ki mea e uke e mafai eiloa o faigata ‵ki. Kaia?

E tokouke a tino e se tali‵tonu ki malo, pisinisi, io me ko mea fakasalalau ke fakamatala mai a te mea tonu. E faigata ki a latou ke faka‵kese aka a muna‵tonu mai manatu, fakamatalaga kolā e se ‵tonu katoatoa mo loi kolā e fai pelā me ne fakamatalaga fakatuagagina. Ona ko te sē tali‵tonu o tino ki nisi tino io me ko fakamatalaga ‵se i te taimi nei, ko se ‵lago atu latou ki te mea tonu mo te aoga o muna‵tonu konā.

Faitalia a vaegā fakalavelave penā, e mafai eiloa o maua a tali ‵tonu ki toe fesili tāua i te olaga. Pefea la? Mai te fakaaogaga o auala masani ke ‵sala atu ki tali o fesili kolā e se na loa ko tāua.

I nisi taimi e ‵sala atu tatou ki te munatonu i aso katoa. Mafaufau ki te tulaga o Jessica. “A taku tamaliki fafine e masei ‵ki i pinati,” ne fai mai a ia, “faitalia foki loa me ne mū pinati e palu tasi mo mea‵kai e masei foki i ei.” Ne ‵tau o iloa ne Jessica me i mea‵kai e ‵togi ne ia ka ‵lei loa i ei tena tama. “Te mea muamua e fai ne au ko te faitau faka‵lei o fakamatalaga i luga i mea‵kai ke onoono ki mea e faite mai i ei. Kae fai foki aku sukesukega kae fesokotaki atu foki ki koga e faite i ei a mea‵kai konā, ke fakamautinoa aka me seai loa ne pinati ne palu i loto i mea‵kai konā. E ‵sala foki au ki nisi fakamatalaga fakatuagagina e uiga ki kamupane ke fakamautinoa aka me e fakatalitonugina te auala e fakatoka ei ne latou a mea‵kai konā.”

A te ‵sala atu o koe ki te munatonu e se na loa ko faigata pelā mo te mea e fai ne Jessica, kae pelā mo Jessica, kāti tenā loa te auala e fakaaoga ne koe ke ‵sala atu ki tali o au fesili:

• ‵Sala ki fakamatalaga ‵tonu.

• Fai a sukesukega fakaopoopo.

• Fakamautinoa aka me fakatalitonugina a koga e maua mai i ei au fakamatalaga.

A te auala tenei e mafai o fesoasoani atu ke ‵sala ne koe a tali ‵tonu ki toe fesili tāua i te olaga. Pefea la?

I te taimi ne ‵sala ei ki te munatonu i te Tusi Tapu, ne fakaaoga ne Jessica se auala tai ‵pau māfai ko fai ana sukesukega ki mea‵kai kolā e poi‵sini i ei tena tama fafine. E fai mai a ia, “A te faitau faka‵lei kae fai a sukesukega ‵loto, ne fesoasoani mai ke maua ne au a te munatonu mai te Tusi Tapu.” Pelā mo Jessica, e lau i miliona o tino ne tauloto ki pati a te Tusi Tapu e uiga ki fesili konei:

• Kaia e ‵nofo ei tatou i konei?

• Ne a mea e ‵tupu māfai ko ‵mate?

• Kaia ko uke ei logo‵maega?

• Ne a mea e fai ne te Atua ke fakaseai atu a logo‵maega katoa?

• E mafai pefea o maua ne tatou se olaga fiafia i te kāiga?

E mafai o maua ne koe a tali ‵tonu ki fesili konei mo nisi fesili aka, mai te faitau ki te Tusi Tapu kae fai au sukesukega fakaopoopo i te research online i te fakatuatusi ko te www.dan124.com.