“Tela la, ke tumau i te matapula‵pula, me e se iloa ne koutou te aso io me ko te itula.”—MATAIO 25:13.

“Ke matapula‵pula kae ke mataala faeloa, me e se iloa ne koutou te taimi telā ko oti ne fuafuagina.”—MALEKO 13:33.

Tela la, e seai se tino i te lalolagi e iloa ne ia te taimi ka fakaseai atu ei te olaga tenei. Kae ko iloa ne te Atua a te “taimi telā ko oti ne fuafuagina”—mo te “aso mo te itula” tonu—ke fakaoko mai ei te gataga. (Mataio 24:36) E mata, e fakauiga i ei me e se mafai eiloa ne tatou o iloa atu a te pili mai o te gataga? Ikai. Ne fai atu a Iesu ki ana soko ke onoono ki se fakasologa o mea ‵tupu kolā ka iloa atu ei me ko pili mai te gataga.

A mea ‵tupu konei ko te fakailoga o te “taimi o te gataga o te olaga tenei.” Ne fai mai a Iesu: “Ka fai taua te suā atufenua ki te suā atufenua mo te suā malo ki te suā malo, kae ka oko mai a oge meakai mo mafuie ki koga katoa.” (Mataio 24:3, 7) Ne fai mai foki a ia me ka isi ne “famai”—ko masaki ‵pisi. (Luka 21:11) E mata, ko lavea ne koe a mea ‵tupu kolā ne ‵valo mai ne Iesu?

A taua fakama‵taku, oge mea‵kai, mo mafuie, e penā foki mo masaki e uke, ko oti ne fakamasei ei a te ‵tou lalolagi i aso nei. E pelā mo te 2004, ne fakamāfua aka ne se mafuie lasi i te Tai o Initia se tsunami telā ne ‵mate atu i ei a tino e toko 225,000. I loto fua i se tausaga, ne ‵mate atu a tino e toko 2.6 miliona i te lalolagi kātoa i te famai ko te COVID-19. Ne fai mai a Iesu me i mea ‵tupu penei se fakaasiga me ko pili a te gataga o te olaga masei tenei.

E fakamatala mai i te Tusi Tapu a te vaitaimi mai mua o te gataga e pelā me ko “aso fakaoti.” (2 Petelu 3:3, 4) E fai mai te 2 Timoteo 3:1-5 me i aso fakaoti ka fakamailoga ki te gasolo aka o ma‵sei a uiga o tino. (Onoono ki te pokisi “ Te Vaitaimi Mai Mua o te Gataga o te Lalolagi.”) E mata, e lavea ne koe i aso nei a tino kolā e manatu fakapito, kaima‵nako, amio fakasaua, mo te sē a‵lofa? A te mea tenei se fakamaoniga foki me ko pili atu eiloa tatou ki te gataga o te lalolagi.

Ka pefea te leva o te vaitaimi o aso fakaoti? E ‵tusa mo te Tusi Tapu se ‘taimi toetoe’ fua. Ka oti ko fakaseai ei ne te Atua a “latou kolā e fakamasei ne latou te lalolagi.”—Fakaasiga 11:15-18; 12:12.

Ko oti ne fakatoka ne te Atua a te aso mo te itula ka fakaoko mai ne ia te gataga o te olaga masei tenei. (Mataio 24:36) Kae e isi se tala ‵lei—“e se manako [te Atua] ke fakaseai se tino e tokotasi.” (2 Petelu 3:9) E tuku atu ne ia te avanoaga ki tino ke ola e ‵tusa mo ana tulaga. Kaia? Me e manako a ia ke ‵sao tatou i te gataga o te lalolagi tenei, kae ke ola i tena lalolagi fou māfai ko liu palataiso.

Ne fakatoka eiloa ne te Atua se polokalame o akoakoga i te lalolagi kātoa ke fesoasoani atu ki tino ke iloa ne latou a mea e ‵tau o fai ko te mea ke ola latou i te lalolagi fou mai lalo i tena Malo. Ne fai mai a Iesu me i te tala ‵lei e uiga ki te Malo o te Atua ka talai atu “ki te lalolagi nofoaki kātoa.” (Mataio 24:14) I te lalolagi kātoa, ne fakamāumāu ne Molimau a Ieova a itula e sili atu i te lua piliona i te 2019 ke talai kae akoako a tino ki te fekau o te fakamoemoega i te Tusi Tapu. Ne fai mai a Iesu me i te galuega fakapito tenei ka fai i te lalolagi kātoa a koi tuai o oko mai te gataga.

Ko pili o palele atu a te taimi o pulega a tāgata. Kae ko te tala fakafiafia, me e mafai o sao koe i te gataga o te lalolagi kae ola i te lalolagi palataiso telā ne folafola mai ne te Atua. Ka fakamatala mai i te suā mataupu a te auala ke mafai o ola koe i te lalolagi fou tenā.