A te itula muamua eiloa mai tua o te fanauga o se pepe, ko te ‵toe taimi tāua eiloa tenā. Kaia? Me i te ‵pili o te fesokotakiga o mātua mo olotou pepe fatoā fa‵nau mai se auala telā e fai ei ke tupu ‵lei a olotou tamaliki. *

Se a te mea ka fakamalosi ne ia se mātua ke tausi faka‵lei ne ia tena pepe fatoā fanau? E fakamatala mai a te polofesa ko Jeannette Crenshaw i The Journal of Perinatal Education me i te malosi o te hormone oxytocin “e fakamalosi aka ne ia a lagonaga fakamātua māfai te mātua e fakapatele, tio atu kae faū tena pepe fatoa fanau.” A te suā hormone telā e galue i te taimi tenei “e fesoasoani atu ki se mātua ke saga atu ki tena pepe” kae fakamalosi aka ei tena fesokotakiga mo tena pepe. Kaia e tāua ei a te mea tenā?

A te fesokotakiga ‵pili i te va o te mātua mo tena pepe ne māfua mai i te ‵tou Mafuaga alofa, ko Ieova te Atua. * Ne tavae ne te tupu ko Tavita a te Atua ona ko te mea ne aumai ne ia o tou tagata “ki tua mo te moegatama” kae fai ne ia ke tokagamalie a ia i lima o tena mātua. Ne ‵talo atu a ia: “Ne tuku atu au ke tausi ne koe mai taku fanauga, mai te moegatama o toku mātua, ne fai eiloa koe mo fai toku Atua.”—Salamo 22:9, 10.

MAFAUFAU KI TE MEA TENEI: Kafai ne faite ne te Atua te vaega fakaofoofogia tenei o te foitino ko te mea ke fakamautinoa aka me ka atafai faka‵lei ne se mātua a tena pepe kae saga atu ki manakoga o te pepe, e mata, e se tāua ki te Atua a tatou taki tokotasi, “tama‵liki a te Atua”?—Galuega 17:29.

Ne akoako mai a Iesu Keliso, telā e iloa ‵lei ne ia te Mafuaga i lō so se tino: “E a, e se ‵togi fua a manu eva fo‵liki e lua ki se sene e tasi? Kae e se mafai o tō se manu e tasi i manu konā ki lalo i te laukele kae e se iloa ne te otou Tamana. Kae ke oko eiloa ki laulu i otou ulu ko oti katoa ne lau. Tela la, sa ma‵taku; e sili atu te tāua o koutou i lō manu eva fo‵liki e uke.”—Mataio 10:29-31.

Ne nai tino fua e lavea ne latou a manu fo‵liki katoa, kae e se iloa ne latou māfai ko tō se manu e tasi ki lalo i te laukele. Kae e lavea ne te ‵tou Tamana faka-te-lagi a manu takitasi konā! Kae ko manu—ke oko foki e manu e uke—e se na ko tāua malosi ki a ia i lō a tino. Tela la, e manino ‵lei te akoakoga e maua mai i ei: E se ‵tau mo koutou o “ma‵taku” me e se saga mai te Atua ki a koutou. E ‵kese mai i ei, e fiafia malosi a ia ki a tatou!

 E fakatalitonu mai te Tusi Tapu

• “A mata o Ieova e oko atu ki koga katoa, e kilokilo ki mea ma‵sei mo mea ‵lei.”—FAATAOTO 15:3.

• “A mata o Ieova e kilo atu ki tino amio‵tonu, kae ko ana taliga e fakalogologo ki olotou ‵tagi mō se fesoasoani.”—SALAMO 34:15.

• “Ka fiafia malosi au i tou alofa fakamaoni, me ne lavea ne koe toku puapuaga; e iloa ‵lei ne koe te ‵poko o toku fakalavelave.”—SALAMO 31:7.

E mata, e isi se ‵kesega i ‵tou olaga māfai e iloa ne tatou me e fiafia malosi te Atua ki te ola ‵lei o tatou kae e kilokilo mai a ia ki a tatou mo te alofa? E mautinoa eiloa me e mafai, e pelā loa mo te mea ne fakamatala mai ne Hannah, * mai Egelani:

“E uke, uke ‵ki a taimi ne mafaufau ei au me i a Ieova e se alofa mai ki a au kae ko se tali foki aku ‵talo. Ne mafaufau au me kāti ko te sē lava o toku fakatuanaki. Ne mafaufau au me i a au ko fakasala io me tuku tiaki ona ko au e se tāua. Ne mafaufau au me ko sē atafai mai te Atua.”

Kae ui i ei, ko se toe fakalotolotolua eiloa a Hannah ki te alofa mo te saga tonu atu o Ieova. Se a te mea ne fai ei ke ‵fuli ana mafaufauga? “Se ‵fuliga lasi ‵ki,” e fai mai a ia. “E masaua ne au se lāuga faka-te-Tusi Tapu i tausaga e uke ko ‵teka e uiga ki te taulaga togiola a Iesu telā ne aoga malosi ki a au, kae ne fesoasoani mai ke toe talitonu au ki te alofa o Ieova. Kae i te taimi ne tali mai ei aku ‵talo, ne tagi faeloa au, me ko fatoa iloa ne au me i a Ieova e alofa mai eiloa ki a au. E se gata i ei, a te faiga o sukesukega ki te Tusi Tapu mo te kau atu ki fakatasiga Kelisiano ne tauloto i ei ne au a mea e uke atu e uiga ki a Ieova, ana uiga, mo ana lagonaga e uiga ki a tatou. Nei la, ko lavea ‵lei ne au te ‵lago mo te alofa o Ieova ki a tatou katoa mo tena manakoga ke tausi mai ki a tatou taki tokotasi.”

E fakamalosi loto eiloa a pati a Hannah. Kae e mafai pefea o mautinoa i a tatou me i te Atua e malamalama kae masaua ne ia ‵tou lagonaga? Ka suke‵suke eiloa tatou ki te fesili tenei i te suā mataupu.