Fakamolemole fakamatala mai aka tou olaga i te taimi koi foliki ei koe.

Ne fanau au i Italia i te 1943. Ne tupu aka au fakatasi mo oku taina mo tuagane i se tamā fa‵kai telā toku tamana se tagata ‵toki lakau kae fagai manu kae se kamuta foki. Ne puti aka matou ne omotou mātua ke fai mo fai ne tino Katolika ‵lei.

Kaia ne manako ei koe ke fai mo fai se faifeau?

I te taimi koi foliki ei au, ne fiafia malosi au o fakalogologo ki faifeau i te lotu. Ne ‵gali ki a au olotou leo e pelā foki mo nisi aso fakamanatu masani kae fakaofoofogia. Tela la, ne tuku tonu atu toku loto ke fai mo fai se faifeau. I te taimi ko 13 ei oku tausaga, ne avatu au ne toku mātua ki se akoga telā e fakatoka ei a tama‵liki tāgata ke fai mo fai ne faifeau i aso fakamuli.

E mata, ne aofia i te akoga tenā a te sukesuke ki te Tusi Tapu?

Ailoga. I te taimi ko 15 ei oku tausaga, ne tuku mai ne soku faiakoga e tokotasi se ‵kopi o tusi Evagelia—te tala fakasolopito ki te olaga mo te galuega a Iesu—kae ne faitau fakafia au ki te tusi tenā. I te taimi ko 18 ei oku tausaga, ne fanatu au ki Loma o akoga i iunivesiti mō te kau faifeau telā ne tausi ne te kau pope. Ne sukesuke au ki te ‵gana Latina, ‵gana Eleni, tala fakasolopito, mataupu silisili, mea tau te mafaufau, mo akoakoga fakalotu. E tiga eiloa ne mafai o fai atu ne matou a fuaiupu mai te Tusi Tapu e pelā me ne mea tauloto kae fakalogo‵logo ki faitauga ki te Tusi Tapu i lāuga i Aso Sa, kae ne seki sukesuke faka‵lei matou ki te Tusi Tapu.

Ne fai koe mo fai se faifeau pule. E mata, ne aofia i ei a te akoako atu?

Taku galuega e aofia malosi i ei a galuega i te ofisa. Kae ne akoako ne au ki vasega a tulafono i te Kaunisela i te Lua o te Vatikana.

Kaia ne kamata o fakalotolotolua koe ki te lotu?

E tolu a mea ne fakalavelave mai. Ne aofia te lotu i mea fakapolitiki. Ne talia fua i ei a amioga ma‵sei a faifeau mo tino e ‵kau ki ei. Kae ne foliga sē ‵tonu mai a nisi akoakoga a te lotu Katolika. E pelā mo te mea tenei, e mafai pefea ne se Atua alofa o fakasala a tino ki te se-gata-mai māfai ko ‵mate? A te suā mea foki, e mata, e manako tonu a te Atua ke fakafoki‵foki atu ne tatou a ‵talo i se fia selau taimi fakatasi mo se malele? *

Ne a au mea ne fai?

Ne ‵talo atu au mo loimata ko maligi‵ligi mō se takitakiga. Ne ‵togi foki ne au se ‵kopi o te Tusi Tapu Katolika, ko te Jerusalem Bible, telā ne ‵lomi fakamuli nei i te ‵gana Italia, kae ne kamata o faitau au ki ei. Kae i te taeao o te Aso Sa e tasi, i te taimi ne tau‵tau ei ne au oku gatu fakafaifeau mai tua o te fakamanatuga o te ‵kaiga a te Aliki, ne oko mai a tāgata e tokolua ki te akoga. Ne fai mai me i a lāua ne Molimau a Ieova. Ne  sau‵tala matou mō se itula tupu e uiga ki te Tusi Tapu, mo mea e fai mai i ei e uiga ki fakailoga o te lotu tonu.

Ne a ou mafaufauga ki te avā tino asiasi konā?

Ne tavae malosi ne au te lā loto tali‵tonu mo te faigofie ki a lāua ke fakasino atu ki fuaiupu i te lōmiga a te Tusi Tapu Katolika. Fakamuli ifo, a te suā Molimau e igoa ki a Mario, ne kamata o asiasi mai ki a au. Ne kufaki kae fakamaoni a ia—me i taeao o Aso Ono katoa, me ‵to te vaiua io me ‵kasa te la, ne ‵toko mai ne ia te pēle i te mataloa o te akoga i te itula e iva.

Ne a lagonaga o nisi faifeau e uiga ki asiga konā?

Ne ‵kami ne au latou ke ‵kau mai ki te motou sau‵talaga, kae e seai se tino ne fakatāua malosi ne ia te sukesukega ki te Tusi Tapu. Kae ne gali ‵ki ki a au. Ne tauloto ne au a mea ‵gali e pelā mo te, kaia ne talia ei ne te Atua a amioga ma‵sei mo logo‵maega—se mea telā ko leva ne ‵mafa i toku mafaufau.

E mata, ne faka‵tuka atu ou pule ke fakagata tau sukesuke ki te Tusi Tapu?

I te 1975, ne asi atu au ki Loma mō nai taimi ke fakamatala atu aku kilokiloga. Ne taumafai oku pule ke ‵fuli toku mafaufau, kae e seai eiloa se tino ne fakaaoga ne ia te Tusi Tapu. Fakamuli ifo, i a Ianuali 9, 1976, ne tusi atu au ki Loma o fai atu me ko se toe fai nei au mo fai se tino lotu Katolika. E lua aso mai tua ifo, ne tiaki ne au te akoga kae fanatu ke kau atu ki te fakatasiga muamua eiloa a Molimau a Ieova, telā ko te fono, kae ne ‵kau atu ki ei a nai fakapotopotoga. E ‵kese a mea katoa i ei mai i mea ne masani au ki ei. Ne tofu a Molimau mo te Tusi Tapu, kae ne tau‵tali atu ki ei i te taimi ne fakamatala mai ne failauga a mataupu kese‵kese.

Ne a lagonaga o otou kāiga e uiga ki te mea tenei?

Ne ‵teke malosi mai te tokoukega o latou kae ne iloa aka fakamuli ne au me e tokotasi toku taina ne suke‵suke mo te kau Molimau i Lombardy, se koga i te feitu ki mātū o Italia. Ne fanatu au o āsi a ia kae ne fesoasoani mai a te kau Molimau i konā, ke ‵sala se galuega mo se koga ke nofo au i ei. Fakamuli ifo i te tausaga tenā, ne papatiso ei au e pelā me se Molimau a Ieova.

E a, kai salamō aka eiloa koe ki tau fakaikuga ne fai?

Ikai loa! Ne fatoa lagona tonu ne au toku pili atu ki te Atua me i mea ko iloa ne au e fakavae ki te Tusi Tapu kae e se ki mataupu silisili io me ko tuu fakalotu. Kae ko mafai o akoako ne au a nisi tino i te loto talitonu mo te fakamaoni.