1. Ne a mea e lavea ne Ieova i ana tino?

A IEOVA te Atua e “fiafia ki ana tino.” (Sala. 149:4) Ko oko loa i te gali o te manatu tenei! E lavea ne Ieova ‵tou uiga ‵lei; e lavea ne ia me e mafai o fai tatou pelā me ne tino ‵lei, kae ‵taki atu ne ia tatou ki a ia. Kafai e tumau tatou i te fakamaoni ki a ia, ka fakapilipili mai faeloa a ia ki a tatou ki te se-gata-mai!—Ioa. 6:44.

2. Kaia e faigata ei o tali‵tonu a nisi tino me i a Ieova e alofa ki a latou?

² Kāti e fai mai nisi tino, ‘E iloa ne au me i a Ieova e alofa ki ana tino e pelā me se potukau, kae e mafai pefea o mautinoa i a au me e fakatāua ne Ieova au?’ Ne a pogai e mafai o ‵sili mai ne se tino te fesili tenā? Ne fai mai a Oksana *, telā ne fakafesagai mo logo‵maega i tena folikiga: “Ne fiafia ‵ki au i te otiga ne papatiso kae kamata o paenia. Kae i se 15 tausaga fakamuli, ne kamata o toe mafaufau au ki mea fakalogo‵mae ne ‵tupu ki au i taku folikiga. Ne fakaiku aka ne au me ko se talia kae ko sē alofagina au ne Ieova.” A Yua, se tuagane paenia telā ne fepaki foki mo fakalavelave e uke i tena folikiga, ne fai mai: “Ne tuku atu toku ola ki a Ieova me e manako au o fakafiafia a ia. Kae ne talitonu au me e se mafai loa o alofa mai a ia ki a au.”

3. Ne a mea ka sau‵tala tatou ki ei i te mataupu tenei?

³ E pelā mo Kelisiano fakamaoni konei, e alofa malosi koe ki a Ieova kae e mafai o fakalotolotolua koe me e alofa atu a ia ki a koe. Kaia e ‵tau ei o talitonu koe me e atafai eiloa a ia ki a koe? Kae se a te mea e mafai o fesoasoani atu ki a koe ke kufaki māfai e isi ne mafaufauga sē ‵lei i a koe? Ke na sau‵tala nei tatou ki tali o fesili konei.

4. Kaia e fakamataku ei a te fakalotolotolua ki te alofa o te Atua ki a tatou?

⁴ A te alofa e malosi. Kafai e tali‵tonu tatou ki te alofa mo te fesoasoani o Ieova, ka ma‵nako tatou o tavini atu ki a ia, faitalia te faigata o te olaga. I te suā feitu, kafai e fakalotolotolua tatou ki te alofa o te Atua mō tatou, ka “foliki fua i ei a tou malosi.” (Faata. 24:10) Kae kafai tatou e loto vāi‵vai kae sē lava te fakatuanaki o tatou ki te alofa o te Atua, ka sē mafai o ‵teke ne tatou a osomaiga a Satani.—Efe. 6:16.

5. Ne a mea ne ‵tupu ki nisi taina mo tuagane kolā ne fakalotolotolua ki te alofa o Ieova mō latou?

⁵ Nisi Kelisiano fakamaoni i aso nei ko kamata o vāi‵vai faka-te-agaga ona ko manatu fakalotolotolua. Ne fai mai se toeaina e igoa ki a James: “E tiga loa ne tavini atu au i te Peteli kae fiafia ki taku galuega talai i te fakapotopotoga e fai‵pati ki se ‵gana fakaa‵tea, ne mafaufau au me e mata, e talia ne Ieova aku mea e fai io me ikai. I se taimi e tasi, ne mafaufau au me e fakalogologo mai a Ieova ki aku ‵talo me ikai.” Ne fai mai a Eva, telā e aofia foki i te taviniga tumau, penei: “Ne iloa aka ne au me i te fakalotolotolua ki te alofa o Ieova e fakamataku, me e pokotia i ei au mea katoa e fai i te taviniga. E mafai o pokotia ei tou tulaga faka-te-agaga kae fai ei ke manatu māmā koe ki te fiafia i te taviniga ki a Ieova.” Ne fai mai a Michael, se paenia tumau kae se toeaina foki, penei: “Kafai koe se talitonu i a Ieova e atafai atu ki a koe, ka tapeapea malielie eiloa koe kea‵tea mai i a ia.”

6. Ne a mea e ‵tau o fai ne tatou māfai e fakalotolotolua tatou ki te alofa o te Atua ki a tatou?

⁶ E fakaasi mai i tala konei a te fakamataku māfai e maua ne tatou a kilokiloga sē ‵lei. Kae ne a mea e ‵tau o fai ne tatou māfai ko ‵sae aka a vaegā mafaufauga penā i a tatou? E ‵tau o ‵teke fakavave atu tatou ki ei! ‵Talo atu ki a Ieova ke fesoasoani atu ke sui ne koe a “mea e manavase” koe ki ei ki ‘te filemu o te Atua telā ka puipui ne ia a loto mo te malosi o te mafaufau.’ (Sala. 139:23; Fili. 4:6, 7) Kae masaua, e se ko koe fua e mafaufau penā. E isi foki ne taina mo tuagane fakamaoni e taumafai o taua atu ki mafaufauga sē ‵lei konā. Ke oko foki loa ki tavini a Ieova i aso mua, ne ‵tau o fakafesagai atu ki vaegā mea faiga‵ta penā. Mafaufau aka la ki mea e mafai o tauloto ne tatou mai te fakaakoakoga a te apositolo ko Paulo.

7. Ne a fakalavelave ne fepaki mo Paulo?

⁷ E mata, e loto vāivāi sāle koe i nisi taimi ona ko te uke o ou tiute, kae faigata ke saga atu ki ei? Kafai e penā loa, ka malamalama koe i a Paulo. Ne manavase a ia, e se ki se fakapotopotoga fua e tasi kae ki “fakapotopotoga katoa.” (2 Koli. 11:23-28) E mata, e isi sou masaki telā e ave kea‵tea ne ia tou fiafia? Ne fepaki a Paulo mo se “mea makaikai i te foitino,” pelā me se masaki faka-te-foitino, kae ne manako malosi o ave kea‵tea. (2 Koli. 12:7-10) E mata, e loto vāivāi koe ona ko tou tulaga sē ‵lei katoatoa? E penā foki a Paulo i nisi taimi. Ne taku ne ia a ia eiloa e pelā me se “fakaalofa” me ne ‵tau o taua atu faeloa a ia ki tena tulaga sē ‵lei katoatoa.—Loma 7:21-24.

8. Se a te mea ne fesoasoani ki a Paulo ke fa‵ki i ana fakalavelave?

⁸ Faitalia a tofotofoga kese‵kese mo tulaga faiga‵ta, ne tumau eiloa a Paulo i te tavini ki a Ieova. Se a te mea ne fakamalosi aka ei a ia? E tiga ne maina ‵lei a ia i tena tualga sē ‵lei katoatoa, ne ‵mautakitaki te malosi o tena fakatuanaki ki te togiola. Ne iloa ‵lei ne ia te tautoga a Iesu me i “so se tino telā e fakaasi atu faeloa te fakatuanaki ki a [Iesu] ke . . . maua ne ia te ola se-gata-mai.” (Ioa. 3:16; Loma 6:23) A Paulo se tokotasi telā ne fakaasi atu ne ia te fakatuanaki ki te togiola. Ne talitonu a ia i a Ieova e toka o fakamagalo, ke oko foki loa ki tino kolā ne fai ne latou a agasala matagā kae ne sala‵mo tonu.—Sala. 86:5.

9. Ne a mea e tauloto ne tatou mai pati a Paulo i te Kalatia 2:20?

⁹ Ne fakatuanaki foki a Paulo ki te malosi o te alofa o te Atua telā ne fakaasi mai ne Keliso. (Faitau te Kalatia 2:20.) Onoono ki ana pati fakamalosi i te fakaotiga o te fuaiupu. Ne fai mai a Paulo: “Te Tama a te Atua telā ne alofa mai ki a au kae tuku mai foki tena ola mō au.” Ne seki mafaufau lele a Paulo me isi se tapulā ki te alofa o te Atua, kae fai atu, ‘Ko lavea ne au te pogai e alofa ei a Ieova ki oku taina, kae kāti e se alofa mai ki a au i a au ko tō masei.’ Ne fakamasaua atu a Paulo ki te kau Loma: “I te taimi koi agasala ei tatou, . . . ne mate a Keliso mō tatou.” (Loma 5:8) E seai se tapulā ki te alofa o te Atua!

10. Ne a mea e tauloto ne tatou mai te Loma 8:38, 39?

¹⁰ Faitau te Loma 8:38, 39. Ne talitonu katoatoa a Paulo ki te malosi o te alofa o te Atua. Ne tusi mai a ia me seai se mea “ka mafai o ‵vae ne ia tatou kea‵tea mai te alofa o te Atua.” Ne iloa ne Paulo a te auala ne kufaki a  Ieova i ana faifaiga ki te fenua o Isalaelu. Ne iloa foki ne ia a te auala ne fakaasi atu ne Ieova a tena alofa fakamagalo ki a ia. E mafai o fakatoe‵toe aka ne tatou a pati a Paulo i te auala tenei, ‘Ona ko Ieova ne tuku mai ne ia a tena tama tonu ke mate mō au, e mata e isi pogai ke fakalotolotolua au ki tena alofa?’—Loma 8:32.

11. E tiga ne fai ne Paulo se agasala e pelā mo te mea e fakaasi mai i te 1 Timoteo 1:12-15, kaia ne mautinoa i a ia i te Atua e alofa ki a ia?

¹¹ Faitau te 1 Timoteo 1:12-15. E mautinoa eiloa me isi ne taimi ne tigaina a Paulo ona ko ana mea ne fai i aso mua. Setioa eiloa o taku ne ia a ia ko te tino agasala “tafasili” i te masei! Mai mua o iloa ne ia te munatonu, ne seki gata eiloa a Paulo i te ‵sala ki Kelisiano i fakai takitasi, ke ‵pei ki te fale puipui kae ‵lago atu ke fakasauā a nisi tino. (Galu. 26:10, 11) E mata, e mafai o fakaataata ne koe a lagonaga o Paulo māfai ko fetaui mo se Kelisiano talavou telā ne tamate ana mātua ona ko tena fakatonuga? Ne salamō a Paulo i tena mea ‵se, kae ne iloa ne ia me sē mafai o ‵fuli ne ia ana mea ko oti ne fai. Ne talia ne ia i a Iesu ne mate mō ia, kae ne tusi mai a ia mo te loto talitonu: “Ko te alofa tauanoa o te Atua tenei e maua i a au.” (1 Koli. 15:3, 10) Se a te akoakoga mō tatou? Ke talia ne tatou i a Iesu ne mate mō koe kae ne fakatoka ne ia te auala ke ulu atu koe ki loto, kae ke maua tou fesokotakiga totino mō Ieova. (Galu. 3:19) Te mea telā e tāua ki te Atua ko ‵tou mea e fai i te taimi nei mo mea e fai i aso mai mua, e se ko ‵tou mea ‵se ne fai i aso ko ‵teka, faitalia i a tatou ne Molimau a Ieova i te taimi tenā io me ikai.—Isa. 1:18.

12. E fesoasoani mai pefea a te 1 Ioane 3:19, 20 māfai ko mafau‵fau tatou i a tatou e se aoga io me sē alofagina?

¹² Kafai e mafaufau koe i a Iesu ne mate ke fakamagalo au agasala, kāti ka fai atu koe,  ‘Ailoga e aoga ki a au te mea tenā.’ Kaia e mafai o mafaufau koe penā? E mafai o faka‵se tatou ne ‵tou loto sē ‵lei katoatoa, kae fai ei ke mafaufau i a tatou e se aoga io me sē alofagina. (Faitau te 1 Ioane 3:19, 20.) I vaegā taimi penā, e ‵tau o masaua ne tatou me “sili atu a te Atua i ‵tou loto.” E malosi atu a te alofa o te ‵tou Tamana i te lagi mo tena fakamagaloga ki so se mafaufauga faka‵tuka e mafai o sae aka i ‵tou loto. E ‵tau o akoako ne tatou a tatou eiloa ke talia te kilokiloga a Ieova ki a tatou. Ke fai te mea tenā, e ‵tau o suke‵suke faeloa tatou ki tena Muna, ‵talo faeloa ki a ia, kae ‵kau fakatasi faeloa mo ana tino fakamaoni. Kaia e tāua ei ke fai a mea konā?

13. E fesoasoani mai pefea a te sukesuke ki te Muna a te Atua ki a tatou? (Onoono foki ki te pokisi “ Te Auala ne Fesoasoani Atu te Muna a te Atua ki a Latou.”)

¹³ Sukesuke ki te Muna a te Atua i aso katoa, kae ka lavea faka‵lei ei ne koe a te alofa atafai o Ieova. Ka lavea ne koe ana faifaiga atafai. A te mafaufau ‵loto ki se vaega mai te Muna a te Atua i aso takitasi ka fesoasoani atu ke mafai ne koe o mafaufau faka‵lei, ki te “fakatonutonuga o mea ‵se” i tou mafaufau mo tou loto. (2 Timo. 3:16) Ne fai mai se toeaina e igoa ki a Kevin telā ne mafaufau i a ia e se aoga: “Ne fesoasoani mai a te faitau kae mafaufau ‵loto ki te Salamo 103 ke malamalama au i mafaufauga o Ieova e uiga ki a au.” Ne fai mai a Eva, telā ne sae mai muamua: “Kafai ko fakaoti te aso, e mafaufau ‵loto au ki mafaufauga o Ieova. E tuku mai ei se loto filemu kae ati aka ne ia toku fakatuanaki.”

14. E fesoasoani mai pefea a ‵talo ki a tatou?

¹⁴ ‵Talo faeloa. (1 Tesa. 5:17) Ke fakatumau se vā fakataugasoa mo te suā tino, e manakogina ke sau‵tala faeloa kae fakaasi atu a mea i tou loto. Kae penā foki ki te ‵tou vā fakataugasoa mo Ieova. Kafai e fakaasi atu ne tatou a ‵tou lagonaga, mafaufauga, mo mea e manava‵se tatou ki a ia, e fakaasi atu ne tatou a te ‵tou tali‵tonu katoatoa ki a ia kae iloa ne tatou i a ia e alofa mai. (Sala. 94:17-19; 1 Ioa. 5:14, 15) Ne fai mai a Yua telā ne sae mai muamua: “Kafai au e ‵talo, e uke atu aku mea e taku atu i lō te fakaasi atu fua o aku mea ne fai i te aso. E fakaasi atu katoa ne au ki a ia a oku lagonaga ‵tonu. Ne fanofano malielie ei o lavea ne au a Ieova, e pelā me se Tamana telā e alofa tonu ki ana tama‵liki, kae e se pelā me se pule o se kamupane.”—Onoono ki te pokisi “Ko oti Koe ne Faitau ki ei?”

15. E fakaasi mai pefea ne Ieova me e saga tonu mai a ia ki a tatou?

¹⁵ ‵Kau fakatasi mo taina fakamaoni; a latou se meaalofa mai i a Ieova. (Iako. 1:17) E saga tonu mai te ‵tou Tamana i te lagi ki a tatou e auala i te tukumaiga o se kāiga faka-te-agaga o taina mo tugane kolā e fakaasi mai ne latou  “te alofa i taimi katoa.” (Faata. 17:17) I tena tusi ki tino Kolose, ne taku mai ne Paulo a Kelisiano kolā ne fesoasoani ki a ia, ne fakasino atu a ia ki a latou e pelā me se “fakamafanafanaga lasi ‵ki” ki a ia. (Kolose 4:10, 11) Ke oko foki loa ki a Iesu Keliso, ne manako kae ne loto fakafetai a ia ki te fesoasoani mai i ana taugasoa ko agelu mo tino.—Luka 22:28, 43.

16. E fesoasoani mai pefea a taugasoa fakamaoni ke fakapili‵pili tatou ki a Ieova?

¹⁶ E mata ne aoga katoatoa ki a koe a te meaalofa a Ieova, ko taina fakamaoni? A te fakaasi atu o mea e manava‵se tatou ki ei ki se taina matua, e sē se fakaasiga o te vāivāi; kae fai eiloa pelā me se puipuiga. Onoono ki pati a James telā ne sae mai muamua: “A te fai taugasoa ki taina Kelisiano ma‵tua, ne fesoasoani malosi mai ki a au. Kafai ko tigaina au i mafaufauga faka‵tuka, e fakalogo‵logo mai eiloa a taina konei kae fai mai i a latou e a‵lofa ki a au. E auala i a latou, ne lavea ei ne au te alofa mo te atafai o Ieova ki a au.” Tela la, ko oko eiloa i te tāua ke ati aka kae fakatumau ne tatou se vā fakataugasoa ‵pili mo ‵tou taina mo tuagane faka-te-agaga!

17-18. Ko oi e ‵tau o faka‵logo tatou ki ei, kae kaia?

¹⁷ E manako a Satani ke ‵fiu tatou i te taua atu ke fai te mea tonu. E manako a ia ke tali‵tonu tatou i a Ieova e se alofa ki a tatou, kae ke mafau‵fau me e se mafai o faka‵sao tatou ne Ieova ona ko tatou ko tō ma‵sei. Kae pelā mo mea ko oti ne lavea ne tatou, a te mea tenā e sē se mea tonu.

¹⁸ A Ieova e alofa ki a koe. E kilo atu ki a koe e pelā me se koloa tāua. Kafai e fakalogo koe ki a ia, a koe ka “tumau i tena alofa” ki te se-gata-mai e pelā eiloa mo Iesu. (Ioa. 15:10) Tela la, sa fakalogo ki a Satani io me ki tou loto faka‵se tino. Kae fakalogo ki a Ieova, telā e lavea ne ia a mea ‵lei i loto i a tatou taki tokotasi. Ke loto talitonu i a Ieova e “fiafia ki ana tino,” e aofia ei a koe!