1. E tiga eiloa a Ieova ko te Atua Tafasili i te Maluga, se a te ‵kamiga ne tuku atu ne ia ki nisi tino?

A IEOVA ko te Atua Tafasili i te Maluga, te Mafuaga o mea katoa, mo te Tino telā e maua ne ia te poto mo te malosi telā e se fakanafagina! Ne iloa ne Iopu a te mea tenā. I te otiga ne fakafesili ne Ieova a Iopu e uiga ki Ana galuega fakaofoofogia, ne tali atu a Iopu, penei: “Te Aliki, e iloa ne au me e o koe te ‵mana mo te malosi katoatoa, kae mafai foki ne koe o fai a mea katoa e manako koe ki ei.” (Iopu 42:2) E tiga eiloa e mafai ne Ieova o fai so se mea ko oti ne filifili ne ia ke fai e aunoa mo se fesoasoani—ko leva eiloa ne fakaasi mai ne ia te alofa i te kamataga, mai te ‵kami ne ia a nisi tino ke ga‵lue fakatasi mo ia ke fakataunu ei tena fuafuaga.

2. Se a te galuega tāua ne ‵kami ne Ieova a Iesu ke fai ne ia?

² A te tino muamua a te Atua ne faite ko tena Tama faka-te-agaga eiloa e tokotasi. Ne talia ne Ieova tena Tama ke fesoasoani atu ki a ia i te faitega o mea katoa, ko mea faka-te-agaga mo mea faka-te-foitino. (Ioa. 1:1-3, 18) E uiga ki a Iesu, ne tusi mai te apositolo ko Paulo, penei: “Me ne faite a nisi mea katoa i te lagi mo te lalolagi e  auala i a ia, ko mea e lavea mo mea e se lavea, faitalia me ne nofogaaliki io me ne aliki io me ne malo io me ne pulega. Ne faite a nisi mea katoa e alatu i a ia kae mō ia foki.” (Ko. 1:15-17) Tela la, ne fakaaloalo ne Ieova tena Tama mai te aofia ne ia a Iesu i te faitega o mea katoa mo te fakailoa atu ki nisi tino a te tiute tāua o tena Tama.

3. Se a te ‵kamiga ne tuku atu ne Ieova ki a Atamu, kae kaia?

³ Ne ‵kami foki ne Ieova a tino ke ga‵lue fakatasi mo ia. E pelā mo te talia ne ia o Atamu ke fakaigoa ne ia a manu katoa. (Kene. 2:19, 20) Se mea fakafiafia eiloa ki a Atamu ke tausi faka‵lei ne ia a manu, iloilo a uiga io me ko faifaiga a latou, kae filifili aka foki ne ia a igoa kolā e fetaui ‵lei mo manu takitasi konā! Ne mafai fua o fakaigoa ne Ieova a manu katoa, me ne faite ne ia latou. Kae ne talia ne ia mo te alofa ke fakaigoa ne Atamu a manu takitasi konā. Ne tuku atu foki ne te Atua ki a Atamu a te avanoaga ke fakalauefa atu a tuakoi o te Palataiso i te fatoaga o Etena. (Kene. 1:27, 28) Se mea fakafanoanoa, me ne filifili fakamuli ne Atamu ke sē ga‵lue fakatasi a ia mo te Atua, kae aumai fua ne ia a fakalavelave e uke ki a ia eiloa pelā foki mo ana fanau katoa.—Kene. 3:17-19, 23.

4. Ne ga‵lue fakatasi pefea a nisi tino mo te Atua i te fakataunuga o tena loto?

⁴ Fakamuli ifo, ne ‵kami ne te Atua a nisi tino ke fesoasoani atu i te fakataunuga o tena fuafuaga. Ne faite ne Noa se vaka telā ne faka‵sao ei a ia mo tena kāiga i te Lolo telā ne poko i te lalolagi kātoa. Ne faka‵sao ne Mose a te fenua o Isalaelu mai Aikupito. Ne ‵taki atu ne Iosua te fenua o Isalaelu ki te Fenua o te Folafolaga. Ne faite ne Solomona te faletapu i Ielusalema. Ne fai a Malia pelā me ko te mātua o Iesu. A tino fakamaoni katoa konei mo nisi tino aka e tokouke ne ga‵lue fakatasi mo Ieova i te fakataunuga o tena loto.

5. Se a te galuega e mafai o aofia tatou i ei, kae kaia e manako ei a Ieova ke aofia tatou i te galuega tenei? (Ke onoono ki te ata i te kamataga.)

⁵ I aso nei, e ‵kami ne Ieova tatou ke ‵lago katoatoa atu ki te Malo faka-Mesia. E uke ‵ki eiloa a avanoaga i te taviniga tapu. E se ko Kelisiano katoa e maua ne latou a avanoaga konā, kae e mafai o aofia katoa latou i te talaiatuga o te tala ‵lei o te Malo. E tonu, ne seki ‵tau o aofia ne Ieova tatou i te galuega tenei. Ne mafai fua o faipati ‵tonu mai eiloa a ia mai te lagi ki tino i te lalolagi nei. Ne fai mai a Iesu me ne mafai foki o fakaaoga ne Ieova a fatu ke fai‵pati e uiga ki te Tupu faka-Mesia. (Luka 19:37-40) Kae ne manako a Ieova ke fai tatou pelā me ne tino e “ga‵lue fakatasi” mo ia. (1 Koli. 3:9) Ne tusi mai te apositolo ko Paulo, penei: “Me i a māua e ga‵lue fakatasi mo te Atua. A koutou ko te fatoaga a te Atua telā e ga‵lue māua i ei, ko te fale telā ne fakatu ne te Atua.” (2 Koli. 6:1) A te ga‵lue fakatasi mo te Atua se tauliaga sili, me e aumai ne ia te fiafia lasi ki a tatou. Ke na onoono nei tatou ki nisi pogai.

6. Ne fakamatala mai pefea ne te Tama toekimua a te Atua ana lagonaga e uiga ki te ga‵lue fakatasi mo tena Tamana?

⁶ Mai taimi mua eiloa, ne maua eiloa ne tavini a Ieova te fiafia i te ga‵lue fakatasi mo te Atua. A te Tama toekimua a te Atua, ne fakaata mai ne ia te uiga o te Atua ko te poto, i ana muna: “Ko au ne muamua o faite ne te Aliki . . . Au ne nofo i ana tafa e pelā me se tagata poto i te fakatutu, au ko te pogai o tena fiafia i aso takitasi, e fiafia faeloa au i ona mua.” (Faata. 8:22, 30) I tena ga‵lue fakatasi mo tena Tamana, ne fiafia a Iesu ona ko mea e uke ne fai ne ia mo te iloa atu me ne alofa eiloa a Ieova ki a ia. Kae e a tatou?

7. Kaia e maua ei ne tatou te fiafia mai te faiga o te galuega talai?

⁷ Ne fai mai a Iesu me e maua te fiafia mai te tuku atu o mea pelā foki mo te maua mai o  mea. (Galu. 20:35) Se mea fakafiafia māfai ko maua ne tatou te munatonu, kae e fia‵fia foki tatou ke fakailoa atu te munatonu tenā ki nisi tino. Kafai e fakaasi atu ne tatou a muna‵tonu mai te Tusi Tapu ki nisi tino, ka lavea ne tatou te fia‵fia o tino kolā e fia‵kai i te feitu faka-te-agaga i te taimi ko kamata ei o malama‵lama kae loto fakafetai latou ki te ‵tou Atua pelā foki mo muna‵tonu tāua kolā e maua i tena Muna. E otia eiloa ‵tou loto ke lavea atu me e fai ne latou a ‵fuliga ki olotou mafaufauga penā foki te auala e ola ei latou. E iloa ne tatou te tāua o te galuega ke talai atu te tala ‵lei. E ‵tala mai i ei te auala ki te ola se-gata-mai mō latou kolā ko oti ne faka‵lei mo te Atua. (2 Koli. 5:20) Kae e mata, e isi aka foki se ‵toe galuega gali kae fakamalie loto e mafai o aofia tatou i ei i tafa o te fesoasoani atu ki tino ke maua ne latou te ola se-gata-mai?

8. Ne a pati ne fai mai ne nisi tino e uiga ki te fiafia ke ga‵lue fakatasi mo Ieova?

⁸ E tiga eiloa e maua ne tatou te fiafia māfai e ‵saga mai a tino ki te fekau e talai atu ne tatou, se mea gali foki ke iloa atu me e fakafiafia ne tatou a Ieova kae e loto fakafetai a ia ki ‵tou taumafaiga ke tavini atu ki a ia. (Faitau te 1 Kolinito 15:58.) Ne fai mai a Marco, telā e nofo i Italy, penei: “Ko oko eiloa i toku fiafia ke iloa atu me e tuku atu ne au te ‵toe mea ‵lei ki a Ieova kae e se ki se tino telā e mafai o puli vave fua i a ia a mea ne fai ne au.” I se auala tai ‵pau, ne fai mai a Franco, telā e nofo foki i Italy, penei: “E auala i tena Muna mo mea‵kai faka-te-agaga, e fakamasaua mai ne Ieova ki a tatou i aso katoa me alofa mai a ia, kae e tāua ‵ki eiloa a mea katoa e fai ne tatou mō ia, faitalia me e se lavea ne tatou a taumafaiga e fai ne tatou. Tenā eiloa te pogai e fai ei a te ga‵lue fakatasi mo te Atua e pelā me se mea fakafiafia kae aoga ki toku olaga.”

9. Se a te fesokotakiga ne ati aka i te vā o Ieova mo Iesu, kae kaia?

⁹ Kafai e ga‵lue fakatasi tatou mo tino kolā e a‵lofa tatou ki ei, e fakapili‵pili tatou ki a latou kae fai ke iloa ne tatou olotou uiga mo faifaiga. E se tauloto fua ne tatou a mea e mana‵ko latou o fai kae e tauloto foki tatou ki te auala e fai ei ne latou. Ne ga‵lue fakatasi a Iesu mo Ieova mō se fia piliona o tausaga, kae ne ati aka ne laua se fesokotakiga malosi mo te alofa mo te atafai i te vā o laua. Mai te fakasino atu ki te ‵pili o te lā fesokotakiga, ne fai mai a Iesu: “A māua mo toku Tamana e tasi eiloa.” (Ioa. 10:30) Ne ‵kau fakatasi laua, kae ga‵lue fakatasi faeloa.

10. Kaia e fai ei te galuega talai pelā me ko te auala ke fakapili‵pili atu ei tatou ki te Atua mo nisi tino?

¹⁰ I tena ‵talo, ne fakamolemole atu a Iesu ki a Ieova ke tausi atu ki luga i ana soko. Se a te pogai? Ne ‵talo atu a ia penei: “Ko te mea ke tasi latou e pelā mo tāua e tasi.” (Ioa. 17:11) Kafai e ola tatou e ‵tusa mo tulaga o te Atua kae aofia i te faiga o te galuega talai, ka malama‵lama tatou i ana uiga ‵gali. Ka tauloto ne tatou me se faiga poto ke tali‵tonu ki a ia kae tau‵tali atu i ana fakatakitakiga. Kafai e fakapili‵pili atu tatou ki te Atua, ka fakapilipili mai a ia ki a tatou. (Faitau te Iakopo 4:8.) E fakapili‵pili  atu foki tatou ki ‵tou taina mo tuagane faka-te-agaga, me e ‵pau eiloa a mea faiga‵ta mo mea fakafiafia e fe‵paki mo tatou, e penā foki ‵tou fakamoemoega. Ao, e ga‵lue, e fia‵fia kae kufaki fakatasi foki tatou. E fai mai a Octavia, telā e nofo i Britain, penei: “A te ga‵lue fakatasi mo Ieova e fai ei ke fakapilipili atu au ki nisi tino ona ko te mea e ‵pau eiloa oku fakamoemoega mo latou.” E mata, e penā foki ou lagonaga? E mata, e se fia fakapilipili atu koe ki nisi tino māfai e lavea ne koe a taumafaiga e fai ne latou e fakafiafia atu ki a Ieova?

11. Kaia ka ‵pili ‵ki eiloa te ‵tou fesokotakiga mo Ieova pelā foki mo ‵tou taina i te lalolagi fou?

¹¹ A te ‵tou a‵lofa ki te Atua mo ‵tou taina e mafai o malosi i te taimi nei, kae ka gasolo aka eiloa o malosi atu i te lalolagi fou kae amiotonu. Mafaufau la ki te galuega telā e takato mai i ‵tou mua! Ka fakafetaui atu tatou ki tino kolā ka faka‵tu aka mai te mate kae ke akoako latou ki auala o Ieova. Ka manakogina ke ‵fuli te lalolagi kātoa mo fai se palataiso. A mea konei e se ne galuega fo‵liki, kae se mea fakafiafia ke ga‵lue fakatasi tatou kae gasolo atu ki te tulaga ‵lei katoatoa mai lalo i te Malo faka-Mesia! Ka maua eiloa ne tino taki tokotasi se fesokotakiga ‵pili i te vā o latou mo nisi tino e penā foki ki te lotou Atua, telā ka ‘fakamalie ne ia olotou manakoga.’—Sala. 145:16.

12. I te auala fea e fai ei te galuega talai e pelā me se puipuiga?

¹² E ‵tau o puipui ne tatou a ‵tou feitu faka-te-agaga. Ona ko te tulaga sē ‵lei katoatoa o tatou kae ‵nofo foki i te lalolagi telā e pule ki ei a Satani, e faigofie eiloa ke ‵miti ne tatou a mafaufauga ‵se mo amioga o te lalolagi. A te agaga o te lalolagi e mafai o fakatusa ki te ‵miti o te vaitafe telā e ‵miti ne ia tatou ki te auala telā e se ma‵nako tatou o olo ki ei. Ke mo a ma ‵miti tatou, e ‵tau o ‵kau malosi atu tatou ki te suā feitu. I se auala tai ‵pau, e manakogina eiloa a taumafaiga e uke ke faka‵mao tatou keatea mai te ‵miti ne te agaga o te lalolagi a Satani. Kafai e talai atu tatou ki nisi tino, e ‵saga tonu eiloa tatou ki mea tāua kae aoga i te feitu faka-te-agaga, kae e se ko mafaufauga kolā e mafai o fakamasei ei ‵tou fakatuanaki. (Fili. 4:8) A te galuega talai e fakamalosi ne ia ‵tou loto tali‵tonu, kae fakamasaua mai ki a tatou a folafolaga a te Atua mo ana tulaga a‵lofa. E fesoasoani mai foki ke puipui faka‵lei ‵tou gatu tau faka-te-agaga.—Faitau te Efeso 6:14-17.

13. E pefea a lagonaga o se Molimau i Ausetalia e uiga ki te galuega talai?

¹³ Kafai e fakalave‵lave faeloa tatou i te galuega talai mo nisi galuega faka-te-agaga, e se mafai eiloa o manava‵se tatou ki ‵tou fakalavelave, kae fai te mea tenā e pelā me se puipuiga. Ne fai mai a Joel, telā e nofo i Ausetalia penei: “E fesoasoani mai te galuega talai ke mo a ma galo i a au a mea ‵tonu e uiga ki te olaga tenei. E fakamasaua mai faeloa ki a au a mea faiga‵ta e fe‵paki mo tino mo mea aoga foki kolā ne maua ne au mai te fakagalue aka o fakatakitakiga fakavae mai te Tusi Tapu i toku olaga. A te galuega talai e fesoasoani mai ke taumafai au o loto maulalo; e tuku mai ki a au se avanoaga ke fakalagolago atu ki a Ieova pelā foki mo oku taina mo tuagane.”

14. Mai te tumau i te faiga o te galuega talai, e fakatalitonu atu pefea ne tatou me e fesoasoani mai te agaga o te Atua ki a tatou?

¹⁴ A te talai atu e fakamalosi aka foki ne ia ‵tou loto tali‵tonu me e fakatasi mai te Atua ki a tatou. Mafaufau ki te mea tenei: Kāti ne maua ne koe se galuega ke tufatufa atu a falaoa ki tino i tou fa‵kai. E seai se ‵togi e maua ne koe mai tau galuega kae e seai foki se sui o tupe ne fakamāumāu ne koe i te fanoga o tufa a falaoa. Kae fakamuli, ko iloa aka ne koe me i te tokoukega e se ma‵nako ki falaoa kae ko nisi tino e se fia‵fia ki a koe ona ko te tufaatuga ne koe o falaoa ki a latou. E mata, ka tumau eiloa koe i te galue i se vaegā galuega penā? Kafai koe e loto vāivāi ona ko pati sē ‵lei a tino, e  mautinoa eiloa me ka manako koe o se galue. A te tokoukega o tatou ne tumau eiloa i te faiga o te galuega talai i tausaga takitasi, faitalia eiloa te uke o taimi mo tupe e fakamāmāu ki ei io me ko pati fakamasei mo fakatauemuga e fai mai ne tino e tokouke ki a tatou. E mata, e se fakamaoni mai i ei me e fesoasoani mai eiloa te agaga o te Atua ki a tatou?

15. Se a te sokoga o te talaiatuga o te tala ‵lei mo te fuafuaga a te Atua mō tino?

¹⁵ Mafaufau la ki te sokoga o te talaiatuga o te tala ‵lei mo te fuafuaga alofa a Ieova mō tino. Ko tena fuafuaga eiloa ko tino ke ‵nofo i te lalolagi nei e aunoa mo te mate; faitalia te agasala ne fai ne Atamu, kae seki ‵fuli eiloa te mafaufau o Ieova. (Isa. 55:11) Ne fai ne ia se fakatokaga ke fakasaoloto ei a tino mai te agasala mo te mate. Ke fakataunu te fuafuaga tenā, ne vau eiloa a Iesu ki te lalolagi nei ke tuku mai tena ola pelā me se taulaga mō tino faka‵logo katoa. Kae ke aofia i tino faka‵logo konā, e ‵tau mo latou o faka‵logo ki mea kolā e manako te Atua ke fai ne latou. Tela la, ne akoako ne Iesu a tino ke fai ne latou a mea e manako ki ei te Atua, kae ne fakatonu atu foki ne ia ana soko ke fai penā. Mai te fesoasoani atu ki nisi tino ke faka‵lei mo te Atua, e ga‵lue fakatasi tatou i te fakatokaga alofa tenei a te Atua ke faka‵sao ei a tino mai te agasala mo te mate.

16. Se a te sokoga o te faiga o te galuega talai ki te ‵toe tulafono sili a te Atua?

¹⁶ A te fesoasoani atu ki tino ke maua te ola se-gata-mai se fakaasiga o te ‵tou a‵lofa ki tino pelā foki mo Ieova, “telā e loto ke faka‵sao a tino katoa kae ke iloa tonu ne latou a te munatonu.” (1 Timo. 2:4) I te taimi ne ‵sili atu ei me se a te ‵toe tulafono sili telā ne tuku atu ki te fenua o Isalaelu, ne tali atu a Iesu: “‘E ‵tau mo koe o alofa ki a Ieova tou Atua mo tou loto kātoa mo tou foitino kātoa mo tou mafaufau kātoa.’ Tenei te ‵toe fakatonuga sili kae tu muamua. E penā foki te lua o fakatonuga: ‘E ‵tau mo koe o alofa ki tou tuakoi e pelā mo koe ki a koe eiloa.’” (Mata. 22:37-39) A te ‵kau atu ki te galuega talai se fakaasiga o te ‵tou faka‵logo ki fakatonuga konei.—Faitau te Galuega 10:42.

17. E pefea ou lagonaga e uiga ki te tauliaga ke talai atu te tala ‵lei?

¹⁷ Se fakamanuiaga eiloa ki a tatou! Ne tuku mai ne Ieova se galuega telā e maua ei ne tatou te fiafia, ke fakapili‵pili atu ei tatou ki a ia mo nisi tino, kae puipui ei tatou i te feitu faka-te-agaga. E maua foki ne tatou te avanoaga ke fakaasi atu te ‵tou a‵lofa ki te Atua mo nisi tino. E kese‵kese eiloa a fakanofonofoga o tino o te Atua i te lalolagi kātoa, kae faitalia me ko koe se tino matua io me foliki, se tino mativa io me maumea, malosi io me vāivāi, kae e lau eiloa i miliona o tino e ‵sala atu ki auala ke fakaasi atu ei te lotou fakatuanaki ki nisi tino. Kāti ka ‵pau eiloa ou lagonaga mo Chantel, telā e nofo i Falani. Ne fai mai tou fafine: “A te ‵toe Tino malosi i te iunivesi, te Mafuaga o mea katoa, te Atua fiafia, e fai mai ki a au, penei: ‘Fano! Faipati! Faipati atu e uiga mō au, faipati atu mai tou loto. E tuku atu ne au te malosi, taku Muna ko te Tusi Tapu, te fesoasoani mai agelu, taina tali‵tonu i te lalolagi, akoakoga aoga mo fakatonuga ma‵nino i te taimi tonu.’ Ma‵faga o tauliaga sili ke fai ne tatou a mea kolā e fakatonu mai ne Ieova kae ke ga‵lue fakatasi mo te ‵tou Atua!”