1, 2. (a) Se a te mea ne ‵valo mai ne Ieova me ka tupu i ‵tou aso nei? (e) Ne a fesili ka tali aka ne tatou i te mataupu tenei? (Ke onoono ki te ata i te kamataga.)

E UIGA ki te taimi ko ola nei i ei tatou, ne ‵valo mai a Ieova, penei: “I aso konā, ka puke mai a tagata e toko sefulu mai ‵gana katoa a fenua, ao, ka puke ‵mau eiloa latou ki te gatu o se Iutaia, kae fai atu: ‘Matou e ma‵nako o olo fakatasi mo koutou, me ne lagona ne matou i te Atua e fakatasi mo koutou.’” (Saka. 8:23, NW) E pelā mo tagata fakatusa e tokosefulu, a latou kolā e fakamoe‵moe ke ola i te lalolagi “ka puke ‵mau ki te gatu o se Iutaia.” E fakamata‵mata eiloa latou ke ‵kau fakatasi mo tino fakaekegina o te “Isalaelu a te Atua,” me e iloa ne latou me e fakamanuia eiloa ne Ieova a ana tino fakaekegina.—Kala. 6:16.

² E pelā mo te mea ne ‵valo mai ne te pelofeta ko Sakalia, ne faka‵mafa mai ne Iesu me ka ‵kau fakatasi eiloa a tino o te Atua. Ne faipati a ia ki potukau e lua o ana soko, te “lafu foliki” mo “nisi mamome,” kae ne taku ne ia latou e pelā me ko tena “lafu mamoe e tasi” fakatasi mo te “tausi mamoe e tokotasi.” (Luka 12:32; Ioa. 10:16) Kae ne ‵sae aka a nāi fesili e uiga ki te fesokotakiga i te vā o potukau e lua konei: (1) E mata, e ‵tau o iloa ne nisi mamoe a igoa o latou katoa kolā ko oti ne fakaekegina i aso nei? (2) E ‵tau o pefea te kilokiloga a te kau fakaekegina ki a latou eiloa? (3) E ‵tau o pefea au faifaiga  māfai ko kamata o fakaaoga ne se tino i tau fakapotopotoga a mea fakatusa i te Fakamanatuga? (4) E mata, e ‵tau o manavase koe e uiga ki te fanakaga o te aofaki o tino kolā e fakaaoga ne latou a mea fakatusa? Ke na onoono nei tatou ki tali o fesili takitasi konei.

3. Kaia e se mafai ei o fakamautinoa aka ne tatou me ko oi a tino ka fai fakamuli mo vaega o te toko 144,000?

³ E mata, e ‵tau o iloa ne nisi mamoe a igoa o latou katoa kolā ko oti ne fakaekegina i aso nei? A te tali ki ei, ko te ikai. Kaia? Me faitalia eiloa ko oti ne maua ne se tino a te kalagaga faka-te-lagi, a te mea tenā se ‵kamiga fua kae e se ko te fakamailogaga fakaoti. Tenā te pogai e fakaaoga ei ne Satani a “pelofetai ‵loi . . . ke takitaki ‵se ei a tino, ke oko foki loa ki tino filifilia.” (Mata. 24:24) E seai se tino e mafai o iloa ne ia me e mata ka maua ne se Kelisiano fakaekegina a tena taui faka-te-lagi ke oko eiloa ki te taimi e fakamasino ei a ia ne Ieova me e ‵tau o maua ne ia te taui tenā io me ikai. Ko Ieova loa e fai ne ia te fakaikuga kae tuku atu ki a ia te fakamailogaga fakaoti kāti i se taimi mai mua o mate a ia mo te fakamaoni io me mai mua malie o kamata te “fakalavelave lasi.” (Faka. 2:10; 7:3, 14) Tela la, e seai eiloa se aoga ke fakamautinoa aka ne so se tino telā e ola nei i te lalolagi me ko oi a tavini a te Atua ka fai fakamuli pelā me se vaega o te toko 144,000. ^[1]

4. Kafai e se mafai o iloa ne tatou a igoa o tino fakaekegina katoa i te lalolagi i ‵tou aso nei, e mafai la pefea ne tatou o “olo fakatasi” mo latou?

⁴ Kafai e se mafai eiloa o fakamautinoa aka a igoa o latou katoa kolā e aofia i te Isalaelu faka-te-agaga i aso nei, e mafai la pefea ne nisi mamoe o “olo fakatasi” mo latou? Mafaufau la ki te auala e fakaasi mai i te valoaga a Sakalia a tagata fakatusa e toko sefulu. Ka “puke ‵mau eiloa latou konei ki te gatu o se Iutaia, kae fai atu: ‘Matou e ma‵nako o olo fakatasi mo koutou, me ne lagona ne matou i te Atua e fakatasi mo koutou.’” E tiga eiloa e tokotasi fua te Iutaia e taku mai i konei, kae e fakasino atu loa ki ne tino e silia atu mo te tokotasi. A te Iutaia faka-te-agaga tenei e se fakauiga fua ki se tino e tokotasi, kae ki se potukau o tino fakaekegina! Tela la, e se tāua ke iloa ne tatou a igoa o tino Iutaia faka-te-agaga taki tokotasi konei kae olo fakatasi mo latou. I lō te fai penā, e ‵tau o iloa ne tatou a latou konei e pelā me se potukau kae ‵lago atu ki a latou. E seai eiloa se mea e fakamalosi mai i te Tusi Tapu ke tau‵tali tatou i se tino e tokotasi. E tokotasi eiloa te ‵tou Takitaki, ko Iesu.—Mata. 23:10.

5. Se a te faka‵pulaga e ‵tau mo te kau fakaekegina o mafaufau ‵loto ki ei, kae kaia?

⁵ E ‵tau mo tino kolā e fakaaoga ne latou a mea fakatusa i te Fakamanatuga o mafaufau ‵loto ki te faka‵pulaga telā e fakaasi mai i te 1 Kolinito 11:27-29. (Faitau.) Se a te manatu ne faka‵mafa mai ne te apositolo ko Paulo i konei? Kafai e se fakatumau ne se Kelisiano fakaekegina a tena fesokotakiga ‵lei mo Ieova, e fakaasi mai ei me ko fakaaoga ne ia a mea fakatusa i se auala sē ‵tau. (Epe. 6:4-6; 10:26-29) E fesoasoani atu a vaegā faka‵pulaga penā ke masaua ne Kelisiano fakaekegina me seki mautinoa tonu a te lotou taui. E ‵tau o tumau latou i te kausaki “ke oko atu ki te tapula mō te failoga o te kalagaga ki te lagi mai te Atua e auala i a Keliso Iesu.”—Fili. 3:13-16.

6. E ‵tau o pefea a lagonaga o Kelisiano fakaekegina e uiga ki a latou?

⁶ Ne fakaosofia eiloa a Paulo ke fakatagi atu ki Kelisiano fakaekegina “ke sa‵sale [latou] i te auala telā e fetaui mo te kalagaga telā ne kalagagina ei [latou].” Ne ‵tau o fai pefea ne latou te mea tenei? Ne fakamatala mai a Paulo me e ‵tau o fai “mo te loto maulalo i taimi katoa, i te agamalu, mo te kufaki, kae ke fakatau fa‵ki koutou i otou mea ‵se i te alofa, i te otou taumafai malosi ke fakatumau ne koutou te tasi o  te agaga telā ko te fusi o te filemu.” (Efe. 4:1-3) E fakamalosi ne te agaga o Ieova a te uiga ko te loto maulalo kae e se ko te fakamatamata. (Ko. 3:12) Ona ko te loto maulalo, e se mafau‵fau te kau fakaekegina me sili atu te agaga tapu e maua ne latou i lō a tino kolā e fakamoe‵moe ke ola i te lalolagi. E se fai pelā me e maua ne latou se iloaga fakapito io me ne fakaasiga; io me taumafai latou o fakatalitonu aka me e ma‵luga atu fakafia latou. E se fakamalosi foki ne latou a nisi tino ke kamata o fakaaoga ne latou a mea fakatusa i te fakamanatuga, i lō te fai penā, e ‵tau mo latou o loto maulalo me ko Ieova fua e ‵kami ne ia a tino ke maua ne latou te kalagaga faka-te-lagi.

7, 8. Se a te mea e se ‵tau o fakamoemoe ki ei a Kelisiano fakaekegina, kae kaia?

⁷ E tiga eiloa se tauliaga gali ke maua te kalagaga faka-te-lagi, e se fakamoe‵moe eiloa a Kelisiano fakaekegina ke maua ne latou se fakaaloaloga fakapito mai nisi tino. (Efe. 1:18, 19; faitau te Filipi 2:2, 3.) Ko te agaga eiloa o Ieova e molimau atu ki a latou taki tokotasi. E seai se faka‵pulaga e fai ke iloa ne tino katoa. Tela la, e se ‵tau o ‵poi latou māfai e se tali‵tonu a nisi tino me ko oti ne fakaekegina latou ki te agaga tapu. A te tonuga loa, e iloa ne latou me e fakailoa mai te Tusi Tapu ke mo a e tali‵tonu vave ki tino kolā e fai mai me ko oti ne filifiligina latou ne te Atua. (Faka. 2:2) E se fakaaoga lele eiloa ne latou a te lotou “tauliaga” e pelā me ne tino fakaekegina ke ‵saga fakapitoa atu a tino ki a latou. A ko te ‵toe mea tāua, e se ma‵nako foki latou o fakamatala atu a te auala ne fakaeke ei latou ke maua fua i ei olotou tavaega; io me fakamata‵mata latou e uiga ki te lotou taui i aso mai mua.—1 Koli. 1:28, 29; faitau te 1 Kolinito 4:6-8.

⁸ E se gata i ei, e se ‵kilo atu a Kelisiano fakaekegina ki a latou eiloa e pelā me se vaega o te potukau maluga. E se ‵sala atu latou ki nisi tino kolā e ‵pau olotou fakamoemoega ko te mea ‵kau fakatasi io me fakamalosi aka ke fakatu aka a potukau mō sukesukega faka-te-Tusi Tapu. (Kala. 1:15-17) E fakamāfua aka ne vaegā mea penā a mavae‵vaega i loto i te fakapotopotoga kae ‵teke atu foki ki galuega a te agaga tapu, telā e fakamalosi ne ia te filemu mo te ‵kau fakatasi.—Faitau te Loma 16:17, 18.

9. Kaia e ‵tau o fakaeteete tatou i ‵tou faifaiga ki se tino telā e kai i te falaoa kae inu i te uaina i te Fakamanatuga? (Ke onoono ki te pokisi “A te Alofa ‘e se Fakamaualuga.’”)

⁹ E ‵tau o pefea au faifaiga ki se tino telā e fakaaoga ne ia a mea fakatusa o te Fakamanatuga? Ne fai atu a Iesu ki ana soko, penei: “A ko koutou ne taina katoa.” Ne toe fai atu foki a ia: “So se tino e fakamaluga ne ia a ia eiloa ka fakamalalogina, a ko te tino telā e fakamalalo ne ia a ia eiloa ka fakamalugagina.” (Mata. 23:8-12) Tela la, se mea ‵se ke fakamaluga a tino taki tokotasi, faitalia me i a latou ne taina fakaekegina o Keliso. E uiga ki toeaina Kelisiano, e fakamalosi mai te Tusi Tapu ke fakaakoako tatou ki te fakatuanaki o latou kolā e fai ne latou te takitakiga, kae ne seki fakatonu mai ke fakamaluga ne tatou so se tino e pelā me ko te ‵tou takitaki. (Epe. 13:7) E tonu, e faipati eiloa te Tusi Tapu me e ‵tau o “fakalasi aka te āva” ki nisi tino. Kae e ‵tau eiloa fakaasi atu te āva ki vaegā tino penei, e se ona ko te mea ne fakaekegina latou, kae ona ko te mea e “fai ne latou te takitakiga i se auala ‵lei” kae “ga‵lue malosi i te fai‵pati mo te faiga o akoakoga.” (1 Timo. 5:17) Tela la, se mea fakamā ki te kau fakaekegina kolā e maua ne latou te kalagaga faka-te-lagi māfai e maua ne latou a tavaega io me ‵saga fakapito atu a tino ki a latou. Kae e sili atu i te masei, me kafai e maua ne latou a tavaega fakapito konā, ka mafai eiloa o faigata ki Kelisiano fakaekegina ke tumau i te loto maulalo. (Loma 12:3) E se ma‵nako lele eiloa tatou o fai se mea telā e fai ei ke ‵siga a taina o Keliso!—Luka 17:2.

10. E mafai pefea o fakaasi atu ne koe te āva ki Kelisiano fakaekegina?

¹⁰ E mafai pefea o fakaasi atu ne tatou te āva  ‵tau ki tino fakaekegina kolā ne filifili ne Ieova? E se ‵tau o ‵sili atu ne tatou a fesili e uiga ki te auala ne fakaeke ei latou. E ‵kalo keatea tatou mai te fia ‵logo i mea kolā e seai se ‵tou fekau i ei. (1 Tesa. 4:11; 2 Tesa. 3:11) E se ‵tau o mafau‵fau tatou me i mātua, te avaga, io me ko kāiga o te tino fakaekegina e ‵tau foki o fakaeke. E se maua ne se tino fakaekegina a te fakamoemoega tenei mai tena gafa io me ko tena avaga. (1 Tesa. 2:12) E ‵tau foki o ‵kalo keatea tatou mai te fakafesilisili ne tatou a avaga a tino fakaekegina e uiga ki olotou fakamoemoega ke ola i te lalolagi Palataiso e aunoa mo olotou avaga. I lō te fai atu o fesili kolā e mafai o fakalogo‵mae atu, e mafai o tali‵tonu tatou me i a Ieova ka ‘fakamalie ne [ia] a manakoga’ o ana mea ola katoa.—Sala. 145:16.

11. E puipui pefea tatou māfai e ‵kalo kea‵tea tatou mai te uiga tenei ko te “tavae” faeloa?

¹¹ A latou kolā e fai faka‵lei atu ki Kelisiano fakaekegina i se auala ‵tau, e puipui ne latou a latou eiloa mai se tulaga fakamataku. E fai mai te Tusi Tapu me e mafai eiloa o ulu lemū mai ki loto i te fakapotopotoga a “taina ‵loi.” (Kala. 2:4, 5; 1 Ioa. 2:19) E mafai o fai mai a taina konei i a latou ne tino fakaekegina. E se gata i ei, e mafai eiloa o olo keatea a nisi Kelisiano fakaekegina mai te fakatuanaki. (Mata. 25:10-12; 2 Pe. 2:20, 21) Kafai e ‵kalo keatea tatou mai te malei ko te “tavae” faeloa ne tatou a tino fakaekegina, ka sē mafai eiloa o olo kea‵tea tatou mai te munatonu ona ko tino konā; io me fakavāivāi ei ‵tou fakatuanaki māfai ko sē fakamaoni se Kelisiano telā ko leva ne tavini atu ki te Atua.—Iuta 16.

12, 13. Kaia e se ‵tau ei o manava‵se malosi tatou ki te fanakaga i te aofaki o tino kolā e ‵kai i te falaoa kae inu i te uaina i te Fakamanatuga?

¹² I se fia sefulu tausaga ko ‵teka, ne fanaifo eiloa ki lalo te aofaki o tino kolā ne fakaaoga ne latou a mea fakatusa i te Fakamanatuga o te mate o Keliso. Kae i tausaga fakamuli nei, ko lavea atu ne tatou te fanakaga i te aofaki o latou kolā e fakaaoga a mea fakatusa. E mata, e ‵tau o manava‵se tatou ki te fanakaga tenei? Ikai. Ke na onoono nei tatou ki nisi pogai e se ‵tau ei o manava‵se tatou.

¹³ “E iloa ne Ieova ana tino.” (2 Timo. 2:19) A tino kolā e lau ne latou te aofaki o tino kolā e fakaaoga ne latou a mea fakatusa i te Fakamanatuga e se mautinoa i a latou me ko oi e maua tonu ne latou te fakamoemoega ke ola i te lagi. E aofia i tino kolā e fakaaoga ne latou a mea fakatusa, ko latou kolā e mafau‵fau me i a latou ne tino fakaekegina. A nisi tino kolā ne fakaaoga muamua ne latou a mea fakatusa,  ko sē fakaaoga nei ne latou. Kae ko nisi kolā e ma‵saki ki olotou mafaufau io me ko mea tau lagonaga, e fai ei ke fakaaoga ne latou a mea fakatusa me e tali‵tonu latou me ka pule fakatasi latou mo Keliso i te lagi. Tela la, e se mautinoa tonu a te aofaki o tino fakaekegina koi ‵toe i te lalolagi nei kolā e fakaaoga ne latou a mea fakatusa.

14. Se a te mea e fakaasi mai i te Tusi Tapu e uiga ki te aofaki o tino fakaekegina kolā koi ‵toe mai i te lalolagi nei māfai ko kamata te fakalavelave lasi?

¹⁴ Ka isi eiloa ne tino fakaekegina i feitu katoa o te lalolagi i te taimi e vau ei a Iesu o fakamaopoopo latou ki te lagi. E uiga ki te taimi tenā, e fai mai te Tusi Tapu e uiga ki a Iesu, penei: “Ko uga atu ei ne ia ana agelu fakatasi mo ‵tagi o pu, kae ka fakamaopoopo ne latou ana tino filifilia mai feitu e fa o te lalolagi, mai te suā kapakapalagi ke oko ki te suā kapakapalagi.” (Mata. 24:31) E fakaasi mai eiloa i te Tusi Tapu me se ‵toega fua o te kau fakaekegina ka ‵toe mai i te lalolagi nei i aso fakaoti. (Faka. 12:17) Kae e se fakaasi mai i ei a te aofaki o tino fakaekegina kolā koi ‵toe mai i te kamataga o te fakalavelave lasi.

15, 16. Se a te mea e ‵tau o malamalama tatou e uiga ki te filiga ne Ieova o te toko 144,000?

¹⁵ E fakaiku eiloa ne Ieova a te taimi telā ka filifili ne ia a tino fakaekegina. (Loma 8:28-30) Ne kamata o filifili ne Ieova a tino fakaekegina mai tua o te mate mo te toetuga o Iesu, kae e foliga mai me i tino katoa i te fakapotopotoga Kelisiano i te senitenali muamua ne fakaekegina. Mai te senitenali muamua ke oko mai ki te kamataga o aso fakaoti, a te tokoukega o latou kolā ne fai pelā me tau‵tali atu i a Keliso ne Kelisiano ‵loi; ne fakatusa ne Iesu latou ki “mouku ma‵sei.” E ui i ei, ne tumau eiloa a Ieova i te fakaeke o nisi tino fakamaoni i te taimi tenā, kae ne taku ne Iesu a latou e pelā me ne “saito.” (Mata. 13:24-30) I aso fakaoti, e tumau eiloa a Ieova i te filifili ne ia a latou kolā ka aofia i te toko 144,000. ^[2] Kafai e fakaiku aka ke filifili ne ia a nisi tino mō te tauliaga tenā a koi tuai o oko mai te gataga, e mata, e ‵tau o fakafesili ne tatou a tena poto? (Isa. 45:9; Tani. 4:35; faitau te Loma 9:11, 16.) ^[3] E ‵tau mo tatou o fakaeteete ke mo a ma fai tatou e pelā mo tino ga‵lue kolā ne fāmeo e uiga ki te auala ne saga atu ei a te matai ki a latou kolā ne ga‵lue i te 11 o itula.—Faitau te Mataio 20:8-15.

¹⁶ E se ko tino katoa kolā e fakamoe‵moe ke ola i te lagi e aofia i te “tavini fakamaoni kae poto.” (Mata. 24:45-47) E pelā mo mea ne fai i te senitenali muamua, e fagai eiloa ne Ieova mo Iesu a te tokoukega i aso nei e auala fua i nāi tino. Ne nāi Kelisiano fakaekegina fua i te senitenali muamua ne fakaaoga ke tusi ne latou a te Tusi Tapu i Tusitusiga Eleni. I se auala tai ‵pau, ne nāi Kelisiano fakaekegina fua ko oti ne filifili aka i aso nei ke fakasoa mai ne latou a mea‵kai faka-te-agaga i te “taimi tonu.”

17. Ne a mea ne tauloto ne koe mai te mataupu tenei?

¹⁷ Ne a mea ne tauloto ne tatou mai te mataupu tenei? Ko oti ne fakaiku aka ne Ieova ke tuku mai ne ia a fakamoemoega kese‵kese e lua—ka maua ne te Iutaia faka-te-agaga a te ola i te lagi, kae ko tagata fakatusa e tokosefulu ka ola i te lalolagi nei. Kae e seai eiloa se ‵kese o te tulaga o te fakamaoni e manako a ia ke maua ne tino kolā e fakamoe‵moe ke ola i te lagi e pelā foki mo latou kolā ka ola i te lalolagi nei. E ‵tau mo latou katoa o tumau i te loto maulalo kae ‵kau fakatasi. E ‵tau foki o fakamalosi aka ne latou a te filemu i te fakapotopotoga. Ona ko te pili mai o te gataga, ke na fakaiku aka ne tatou katoa ke tavini atu e pelā me se lafu e tasi mai lalo i te takitakiga a Keliso.