1, 2. Kafai e filifili a fakamoemoega i te olaga, kaia e fai ei pelā me se faiga poto ke faka‵logo ki te ‵tou Mafuaga? (Ke onoono ki ata i te kamataga.)

KAFAI koe se talavou, e manako eiloa koe ke maua a manatu fesoasoani e uke e uiga ki tou olaga i aso mai mua. E mafai o fakamalosi atu a faiakoga, tino fakatonutonu, io me ko nisi tino ke kausaki atu koe ki akoakoga ma‵luga kae ke maua se galuega ‵togi ‵lei. Kae e tuku mai ne Ieova a manatu fesoasoani tai ‵kese. E tonu, e manako a ia ke tauloto malosi koe i te taimi koi akoga i ei, ko te mea ke mafai o maua ne koe se galuega māfai ko oti au akoakoga. (Kolose 3:23) Kae kafai ko filifili aka ne koe a mea kolā e ‵tau o fakamuamua i tou olaga, e fakamalosi mai a ia ke takitaki koe ne fakatakitakiga aoga kolā e fakatāua i ei ana fuafuaga mo tena loto i te taimi tenei o te gataga.—Mata. 24:14.

² Ke masaua foki me e lavea ne Ieova a te ata kātoa ona ko te mea e iloa ne ia te mea ka tupu ki te lalolagi tenei mo te pili mai o te taimi ka fakaseai atu ei. (Isa. 46:10; Mata 24:3, 36) E iloa foki ne ia tatou—mo mea kolā e maua mai i ei ne tatou te lotomalie tonu mo te fiafia, e pelā foki mo mea kolā e fai ei ke loto vāi‵vai kae sē fia‵fia tatou.  Tela la, faitalia eiloa me e mafai o foliga aoga mai a manatu fesoasoani o tāgata, kafai e se fakavae ki te Muna a te Atua, e sē se faiga poto a te mea tenā.—Faata. 19:21.

3, 4. Ne pokotia pefea a Atamu mo Eva mo lā tama‵liki i manatu fakatonutonu sē ‵lei?

³ Ne kamata eiloa o ‵sae aka a manatu fakatonutonu sē ‵lei i te kamataga talu mai te taimi ne aofia i ei a Satani. Ne fai atu eiloa te tino fakatonutonu tenei mo te fakamatamata ki a Eva me ka fia‵fia eiloa lāua mo tena avaga māfai e pule loa lāua i te auala e ola ei lāua i te olaga. (Kene. 3:1-6) Kae ko te ‵tonuga loa, ne maua eiloa ne Satani se kilokiloga kaimanako. Ne manako a ia ko Atamu mo Eva—mo lā tama‵liki i aso mai mua—ke faka‵logo kae tapuaki atu ki a ia i lō Ieova. Kae mata, e isi se mea ‵lei ne fai ne Satani ki a lāua? Ko Ieova eiloa ne tuku atu ne ia a mea katoa ne maua ne lāua—pelā me se tauavaga, te lā fatoaga gali mo lā foitino ‵lei katoatoa kolā e mafai o ola ki te se-gata-mai.

⁴ Se mea fakafanoanoa, me ne seki faka‵logo a Atamu mo Eva ki te Atua, kae ‵vae kea‵tea lāua mai i a ia. Ne matagā ‵ki eiloa te ikuga, e pelā mo te mea e iloa ne tatou. E pelā mo pulalakau kolā e ‵kati mai te lakau, ne kamata lāua o mage‵mage kae ‵mate atu fakamuli. Ne logo‵mae foki lā tama‵liki mai te ikuga o te agasala. (Loma 5:12) Ke oko mai foki ki ‵tou aso nei, koi filifili eiloa ne te tokoukega ke sē faka‵logo latou ki te Atua. E ma‵nako eiloa ke ola latou i te auala e ma‵nako latou ki ei. (Efe. 2:1-3) Ne a mea e iku mai i ei? E fakaasi manino mai i te Tusi Tapu me e “seai se poto . . . māfai e ‵teke ki a Ieova.”—Faata. 21:30.

5. Se a te loto talitonu ne maua ne te Atua i tino kolā ne faite ne ia, kae se a te mea e fakatalitonu mai i ei?

⁵ Kae tiga loa te feitu tenā, ne iloa ne Ieova me e isi ne tino e aofia i ei a te tokoukega o talavou, ka ‵sala kae tavini atu ki a ia. (Sala. 103:17, 18; 110:3) Ko oko eiloa i te fakatāua ne ia a vaegā tino penā! E mata, a koe se tokotasi o latou? Kafai e penā loa, e mautinoa eiloa me ka maua ne koe a “mea ‵lei” e uke mai te Atua telā e fesoasoani malosi atu ke maua ne koe te fiafia i te olaga. (Faitau te Salamo 103:5; Faata. 10:22) E pelā mo te mea ka onoono nei tatou ki ei, e aofia i “mea ‵lei” konei a mea‵kai faka-te-agaga e uke, toe taugasoa ‵lei, fakamoemoega aoga, mo te saolotoga tonu.

6. Kaia e ‵tau o tausi atu koe ki ou manakoga faka-te-agaga, kae e tuku mai pefea ne Ieova a mea konā?

⁶ E se pelā mo manu, e isi ne ou manakoga faka-te-agaga, telā e mafai fua o fakamalie aka ne tou Mafuaga. (Mata. 4:4) Kafai e loto fiafia koe o fakalogo ki a ia, ka maua ne koe te atamai, te poto mo te fiafia. “E fia‵fia a latou kolā e iloa ‵lei ne latou olotou manakoga faka-te-agaga,” ko muna a Iesu. (Mata. 5:3) E fakamalie ne te Atua ou manakoga faka-te-agaga e auala i tena Muna mo mea‵kai faka-te-agaga e uke kolā e tuku mai ne ia e auala i “te tavini fakamaoni kae poto.” (Mata. 24:45) Kae e maua eiloa ne koe a vaegā mea‵kai faka-te-agaga kese‵kese e uke!—Isa. 65:13, 14.

7. Ne a nisi mea aoga e maua mai te mafaufau ‵loto ki mea‵kai faka-te-agaga kolā e tuku mai ne te Atua?

⁷ A mea‵kai faka-te-agaga kolā e tuku mai ne te Atua ka aumai ne ia te poto mo te atamai, telā e mafai o puipui ne ia koe i auala e uke. (Faitau te Faataoto 2:10-14.) E pelā me se fakaakoakoga, e fai ne uiga konei ke iloa ‵lei ne koe a akoakoga ‵se, e pelā mo te kilokiloga me e seai se Mafuaga. E puipui ei koe mai te kilokiloga fakaloiloi me i tupe mo koloa ko te kī ke maua ei te fiafia. Kae e fesoasoani atu ke iloa kae ‵teke ne koe a manakoga ‵se mo uiga sē ‵lei. Tela la, ke tumau i te ‵sala atu ki te poto mai te Atua mo te atamai e pelā me ne koloa tāua! Kafai ko maua ne koe a uiga tāua konā, ka iloa ‵lei ei ne koe me i a Ieova e alofa kae  manako ke maua ne koe te ‵toe mea ‵lei.—Sala. 34:8; Isa. 48:17, 18.

8. Kaia e ‵tau ei mo koe o fakapilipili atu nei ki te Atua, kae ka aoga pefea a te mea tenei ki a koe i aso mai mua?

⁸ I se taimi pili mai mua nei, ka tuki pala ei a vaega katoa o te lalolagi a Satani, kae ko Ieova fua ka maua i ei ne tatou a te tokagamalie. E tonu, ka oko mai eiloa te taimi ka fakalago‵lago tatou ke tuku mai ne Ieova a mea e ola ei tatou, e pelā mo mea‵kai! (Sapa. 3:2, 12-19) Ao, tenei eiloa te taimi ke fakapilipili malosi atu koe ki tou Tamana faka-te-lagi kae fakamalosi aka tou loto talitonu ki a ia. (2 Pe. 2:9) Kafai e fai koe penā, faitalia me ne a mea e ‵tupu i ou tafa, ka ‵pau eiloa ou lagonaga mo te faisalamo ko Tavita telā ne tusi mai: “E tuku faeloa ne au a Ieova i oku mua i taimi katoa. Me i a ia e nofo i toku feitu fakaatamai, ka se mafai eiloa au o malaia.”—Sala. 16:8.

9. (a) E ‵tusa mo pati i te Ioane 6:44, ne a mea e fai ne Ieova? (e) Se a te mea e ‵kese i ei māfai ko fetaui koe mo nisi Molimau a Ieova?

⁹ E ‵taki ne Ieova a latou kolā e talia ne ia ke fai mo fai tena kāiga faka-te-agaga, kae ‵taki mai ne ia a tino loto ‵lei ki te tapuakiga tonu. (Faitau te Ioane 6:44.) Kafai e fetaui koe i te taimi muamua mo se tino telā e se nofo i te munatonu, se a te mea e iloa ne koe e uiga ki te tino tenā? Kāti e iloa fua ne koe tena igoa mo ana foliga, kae e se ko mea katoa e uiga ki a ia. Kae e se penā eiloa māfai e fetaui koe i te taimi muamua mo te tino telā e iloa kae alofa ki a Ieova. Kafai foki loa te tino tenā e ‵kese tena tulaga i te olaga, tena fenua, itukāiga, io me ko tuu, kae e pelā eiloa me ko leva ne iloa ‵lei ne koe a ia—penā foki a ia ki a koe!

10, 11. Se a te mea e tasi i ei a tino o Ieova, kae e aoga pefea a te mea tenei ki a tatou?

¹⁰ E pelā me se fakaakoakoga, i te taimi muamua eiloa e fetaui koe mo te suā Molimau mai se isi fenua, e mautinoa eiloa me ka sau‵tala koulua ki te “‵gana ‵ma” telā ko te munatonu. (Sefa. 3:9) E fakauiga i ei me e tasi te mea e tali‵tonu koulua ki ei e uiga ki te Atua, tulaga i mea tau amioga, mo te fakamoemoega mō aso mai mua. E se gata i ei, a mea konei ne mea tāua ke iloa ne tatou e uiga ki se tino, me e ati aka i ei a te loto talitonu. E fakamalosi foki ne latou se fakavae mo se vā fakataugasoa tumau kae aoga.

 ¹¹ Tela la, kafai e tapuaki atu koe ki a Ieova, e mafai eiloa o maua ne koe a toe taugasoa ‵lei kolā e salalau atu i te lalolagi kātoa, faitalia me seki fetaui aka eiloa mo koe! Ko oi aka foki e maua ne latou te meaalofa tāua tenei i tafa o tino o Ieova?

12. Ne a fakamoemoega faka-te-agaga e mafai o fakatoka ne koe mō koe eiloa?

¹² Faitau te Failauga 11:9–12:1. E mata, e tasi io me e uke a fakamoemoega faka-te-agaga e kausaki koe ki ei? Kāti e taumafai koe o faitau ne vaega o te Tusi Tapu i aso takitasi. Io me taumafai koe ke momea aka tou atamai i te faipati mo te akoako atu. Faitalia me se a te taumafaiga e fai ne koe, kafai e lavea ne koe a ikuga ‵lei—io me lavea ne nisi tino kae fakamālō atu ki a koe—ka pefea ou lagonaga? E mautinoa eiloa me ka lavea ne koe te aoga o au taumafaiga kae fiafia foki. Kae e ‵tau eiloa o fai penā me e fakamuamua ne koe te loto o te Atua i lō ou manakoga totino, mai te fakaakoako atu ki a Iesu.—Sala. 40:8; Faata. 27:11.

13. I te auala fea e ‵lei fakafia atu te tavini ki te Atua i lō te kausaki ki fakamoemoega faka-te-lalolagi?

¹³ Mai te saga tonu atu ki fakamoemoega faka-te-agaga, ko fai foki ne koe se galuega telā e fakamalie loto me e mafai eiloa o aoga. Ne tusi mai te apositolo ko Paulo: “Ke ‵mautakitaki koutou, sa gasue‵sue, kae fai faeloa ke uke otou galuega e fai i te galuega a te Aliki, me e iloa ne koutou me e se mafai o māumāu otou galuega e fai mō te Aliki.” (1 Koli. 15:58) Kae ko te olaga telā ne fakavae ki tōfiga ma‵luga io me ko koloa—faitalia me e foliga mai e pelā me se olaga manuia—kae mautinoa eiloa me e seai se aoga. (Luka 9:25) E tauloto eiloa ne tatou se akoakoga mai mea ne ‵tupu ki te Tupu ko Solomona.—Loma 15:4.

14. Se a te mea e mafai o tauloto ne koe mai te mea ne ‵tofo aka ne Solomona e uiga ki mea faka-te-foitino?

¹⁴ Ona ko te maumea kae malosi, ne kamata o “‵tofo aka ne [Solomona] a fakafiafiaga kae ke onoono aka me se a te mea ‵lei e maua mai i ei.” (Fai. 2:1-10) Ne faite ne ia a fale, fakagaligali a fatoaga mo malae ta‵fao, kae kausaki atu ki so se mea e manako a ia ki ei. Ne pefea ana lagonaga fakamuli ifo? E mata, ne lotomalie a ia ki ei? E mata, ne taunu ana fakamoemoega? E mata, ne fakamalie loto ki a ia? E iloa ‵lei ne tatou te tali ki ei, me ne fai mai eiloa ne Solomona. Ne tusi mai a ia: “Kafai e mafaufau au ki galuega katoa ne fai ne oku lima . . . , ne lavea ne au me i mea katoa e seai se lotou aoga . . . E seai eiloa se mea e aoga tonu.” (Fai. 2:11) Ko oko eiloa i te tāua o te akoakoga e faka‵mafa mai i konei! E mata, ka poto koe o faka‵goto ifo ki tou loto?

15. Kaia e tāua ei te fakatuanaki, kae ne a mea aoga e maua mai i ei, e pelā mo te mea ne fakaasi mai i te Salamo 32:8?

¹⁵ E se manako a Ieova ke logo‵mae koe. A te ‵tonuga loa, e manakogina ne koe te fakatuanaki ke fakalogo ki te Atua kae fakamuamua te faiga o tena loto i tou olaga. A te fakatuanaki tenā e tāua ‵ki eiloa, kae ka sē mafai lele o fakafanoanoa. Ao, ka sē mafai lele o puli i a Ieova a “te alofa ne fakaasi ne koutou mō tena igoa.” (Epe. 6:10) Tela la, galue malosi ke ati aka se fakatuanaki malosi, kae ke fakamaoni ne koe a te saga tonu atu o tou Tamana faka-te-lagi ki a koe.—Faitau te Salamo 32:8.

16. Kaia e ‵tau ei mo tatou o fakatāua te saolotoga kae fakaaoga i se auala poto?

¹⁶ “So se koga e nofo i ei te agaga o Ieova, e nofo foki i konā te saolotoga,” ne tusi mai a Paulo. (2 Koli. 3:17) Ao, a Ieova e fiafia ki te saolotoga, kae e tuku atu ne ia te alofa tenā ki tou loto. Kae i te taimi foki tenā, e manako a ia ke fakaaoga faka‵lei ne koe tou saolotoga, me se puipuiga ki a koe. Kāti e iloa ne koe a talavou kolā e onoono ki ata ma‵sei io me aofia i faifaiga fakatauavaga sē ‵tau, tafaoga fakama‵taku, io me fakaaoga a vailakau tapu kae fakaaoga ‵se a meainu  ma‵losi. E mautinoa eiloa me e ma‵nako fua latou ki se tamā fiafia. Kae e iku atu faeloa a mea konā ki se ikuga matagā, kāti e mafai o ma‵saki, umiti ki ei, io me e mafai o iku atu ki te mate. (Kala. 6:7, 8) E manino ‵lei, me i te lotou “saolotoga” e fakaloiloi i ei a latou eiloa.—Tito 3:3.

17, 18. (a) E maua pefea ne tatou te saolotoga mai te faka‵logo ki te Atua? (e) E fakatusa pefea ne tatou a te saolotoga telā ne maua muamua ne Atamu mo Eva mo te saolotoga e maua ne tino i aso nei?

¹⁷ I te suā feitu, e tokofia a tino e iloa ne koe me ne ma‵saki ona ko te faka‵logo o latou ki tulafono i te Tusi Tapu? E tonu, a te fakalogo ki a Ieova e maua mai i ei te ola ‵lei mo te saolotoga. (Sala. 19:7-11) Kae kafai e fakaaoga tou saolotoga i se auala poto—mai te fakalogo ki fakatakitakiga mo tulafono ‵lei katoatoa a te Atua—ko fakaasi atu ei ne koe ki te Atua pelā foki ou mātua i a koe se tino fakatuagagina kae ka maua ne koe a saolotoga tai uke atu. E tonu, ko te fuafuaga eiloa a te Atua ke tuku atu ki ana tavini fakamaoni a te saolotoga ‵lei katoatoa, telā ne fakamatala mai i te Tusi Tapu e pelā me ko “te saolotoga ‵malu o tama a te Atua.”—Loma 8:21.

¹⁸ Tenei te saolotoga ne maua Atamu mo Eva. I te fatoaga o Etena, e fia a fakatonuga ‵mafa ne tuku atu ne te Atua ki a lāua? E tasi fua. Ne seki ‵tau mo lāua o ‵kai ki te fuaga o se lakau fua e tasi. (Kene. 2:9, 17) E mata, e kilo atu koe ki te fakatonuga fua tenā e tasi e pelā me ko tō faigata kae makeke? Ikai loa! Ke fakatusatusa aka la mo tulafono e uke a tāgata kolā e faimālō ne latou a tino ke tauloto kae ke faka‵logo ki ei.

19. I auala fea e akoako ei tatou ke fai mo tino saoloto?

¹⁹ E fakaasi mai eiloa ne Ieova se auala poto ki ana tavini. I lō te tuku mai fua ne ia a tulafono e uke, e akoako ne ia tatou mo te kufaki ke tau‵tali ki te tulafono o te alofa. E manako a ia ke ola tatou e auala i fakatakitakiga amioatua kae ke takalia‵lia ki te masei. (Loma 12:9) I tena Lāuga i luga i te Mauga, ne fesoasoani mai a Iesu ke malamalama tatou i te pogai e fai ei ne tino a mea ma‵sei. (Mata. 5:27, 28) E pelā me ko te Tupu o te Malo o te Atua, ka tumau eiloa i te akoako ne Keliso tatou i te lalolagi fou ko te mea ke ‵lei katoatoa a ‵tou kilokiloga e pelā mo ia e uiga ki te mea ‵lei mo te mea masei. (Epe. 1:9) Ka fakamaluga aka ne ia tatou ki te tulaga ‵lei katoatoa i te feitu faka-te-foitino mo te feitu faka-te-mafaufau. Mafaufau aka la, ka se toe logo‵mae koe i te agasala io me ko ikuga ma‵sei o te agasala. Kae fakamuli loa, ka maua ne koe a te “saolotoga ‵malu” telā ne tauto mai a Ieova me ka maua ne koe.

20. (a) E fakaaoga pefea ne Ieova tena saolotoga? (e) E mafai pefea o maua ne koe a mea aoga mai te fakaakoakoga a te Atua?

²⁰ E tonu, ka se mafai eiloa o maua ne tatou te saolotoga katoatoa. Ka takitakigina eiloa ne te ‵tou a‵lofa ki te Atua mo tino. A te ‵tonuga loa, e fakamolemole mai a Ieova ke fakaakoako tatou ki a ia. E seai se tapulā ki tena saolotoga; kae ne filifili ne ia ke takitakigina ne te alofa i ana faifaiga ki ana mea ola ne faite. (1 Ioa. 4:7, 8) Tela la, e mautinoa eiloa me ka mafai o maua ne tatou te saolotoga katoatoa māfai fua e takitakigina ne te alofa o te Atua.

21. (a) Ne pefea a lagonaga o Tavita e uiga ki a Ieova? (e) Ne a mea ka sau‵tala tatou ki ei i te suā mataupu?

²¹ E mata, e loto fakafetai koe ki “mea ‵lei” e uke ne tuku mai ne Ieova, e pelā mo mea‵kai faka-te-agaga e uke, toe taugasoa ‵lei, fakamoemoega aoga, mo te fakamoemoega ke maua te saolotoga ‵lei katoatoa? (Sala. 103:5) Kafai e penā loa, ke mafau‵fau eiloa tatou ki te ‵talo telā ne maua i te Salamo 16:11: “E fakailoa mai ne koe ki a au te auala o te ola. E lasi te fiafia e maua i ou mua; E maua faeloa te fiafia i tou lima fakaatamai ki te se-gata-mai.” Ka sau‵tala eiloa tatou i te suā mataupu ki taemani faka-te-agaga kolā ne maua i te Salamo 16. Ka fakamaina mai ne mea konei a auala ke mafai o maua se olaga tonu telā e fakamalie loto.