A DIANA ko 80 tupu ana tausaga. Ne logo‵mae tena avaga i te masaki o te mafaufau kae ne nofo atu i se koga tausi tino ma‵tua mō se fia tausaga a koi tuai a ia o mate. Ne ‵tau foki mo tou fafine o kufaki i te ‵mate atu o ana tama‵liki tāgata e tokolua kae kufaki foki i tena masaki ko te kenisa o te ū. Kae kafai e lavea ne kautaina i te fakapotopotoga a Diana i te Fale Tapuaki io me i te galuega talai, e lavea ne latou me e fiafia faeloa tou fafine.

A John se ovasia faimalaga mō tausaga e silia atu mo te 43. Ne fiafia a ia ki te vaega tenā o te taviniga—ko tena ola eiloa tenā! Kae ne taofi aka tena taviniga e pelā me se ovasia faimalaga ke tausi atu ki se kāiga masaki o ia, kae ko tavini atu nei a ia i se fakapotopotoga i tena fenua. Kafai e fetaui tou tagata mo latou kolā ne iloa ne latou a ia i se fono o te fenua io me ko te fono o te atufenua, e lavea ne latou me seki ‵fuli eiloa a ia. Koi tumau eiloa tena fiafia.

Ne mafai pefea o tumau te fia‵fia o Diana mo John? E mafai pefea o fiafia faeloa se tino telā e logo‵mae i mea tau lagonaga mo te feitu faka-te-foitino? Kae e mafai pefea ne se tino telā ko sē maua ne ia se tauliaga gali o tumau i te fiafia? E maina eiloa tatou i pati a te Tusi Tapu telā e fai mai penei: “A tino amio‵tonu ka fia‵fia i a Ieova.” (Sala. 64:10) E mafai o malamalama katoatoa tatou i te munatonu tāua tenei, māfai e iloa ‵lei ne tatou a te mea telā e aumai ne ia te fiafia tonu mo te mea telā e se maua mai i ei te fiafia.

E mautinoa me e iloa ne koe me isi ne nāi mea kolā e maua faeloa i ei te fiafia. Mafaufau la ki se tau famau kolā ko avaga. Io me se tino ko fai pelā me se mātua io me se tino e maua ne ia se tauliaga faka-te-agaga? E aumai ne mea konā a te fiafia, me ne māfua mai i a Ieova a vaega konā o te olaga. Ne fakatoka ne ia te avaga, fai ke fanafanau a tino kae tuku mai ne ia a galuega e auala i te fakapotopotoga Kelisiano.—Kene. 2:18, 22; Sala. 127:3; 1 Timo. 3:1.

Kae ko nisi auala ke maua ei te fiafia e mafai o se tumau. Se mea fakafanoanoa me e mafai ne se tino avaga o se fakamaoni io me mate. (Eseki. 24:18; Hose. 3:1) Nisi tama‵liki e se faka‵logo ki olotou mātua mo te Atua, kae kāti e faka‵tea foki. Ne seki tavini atu a tama‵liki tāgata a Samuelu ki a Ieova mo te loto kātoa, kae ne maua ne te kāiga o Tavita a fakalavelave ona ko mea ne fai ne ia. (1 Samu. 8:1-3; 2 Samu. 12:11) E aumai ne vaegā  fakalavelave penā a te fanoanoa mo te loto mafatia. E mautinoa eiloa me e se aumai ne mea konā a te fiafia ki a tatou.

I se auala tai ‵pau, a tauliaga kolā e maua ne tino o te Atua i te taviniga e mafai o fakagata ona ko masaki, tiute fai i te kāiga, io me ko fakamafuli‵fuliga i tōfiga faka-te-agaga. Ne fakaasi mai ne te tokoukega kolā ne fakafesagai mo vaegā ‵fuliga penā me ko sē maua ne latou a te lotomalie ne maua muamua ne latou mai i olotou galuega konā.

E mafai o laveagofie ne tatou me e isi ne mea kolā e mafai o maua i ei ne tatou te fiafia telā e tumau io me sē tumau. Tela la, e mata, e isi aka se vaegā fiafia telā e mafai o tumau māfai ko ma‵fuli a fakanofonofoga? E ‵tau o isi, me ne fakatumau ne Samuelu, Tavita mo nisi tino aka a te vaegā fiafia tenā faitalia eiloa mea faiga‵ta kolā ne fe‵paki mo latou.

Ne iloa ‵lei ne Iesu a te uiga tonu o te fiafia. I te taimi ne nofo atu ei a ia i te lagi, e mautinoa eiloa me ne ‵lei a fakanofonofoga i ei, ne “fiafia [a ia] i ana mua [Ieova] i taimi katoa.” (Faata. 8:30) Kae i te lalolagi, ne fakafesagai a ia i nisi taimi mo mea faiga‵ta. Kae ne maua eiloa ne Iesu a te fiafia i te faiga ne ia te loto o tena Tamana. (Ioa. 4:34) Kae e a la te taimi fakaoti eiloa telā ne logo‵mae ei a ia? E fai‵tau tatou penei: “Ona ko te fiafia telā i ana mua ne kufaki ei ne ia te pou fakasaua.” (Epe. 12:2) Tela la, se mea ‵lei ke mafau‵fau tatou ki manatu e lua o Iesu e uiga ki te fiafia tonu.

I se taimi e tasi, ne ‵foki atu a soko e toko 70 ki a Iesu mai tua o te lotou galuega talai. Ne fia‵fia eiloa latou me ne fai ne latou a galuega ‵mana, kae ‵tuli foki ne latou a temoni. Kae ne fai atu a Iesu ki a latou: “Sa fia‵fia me i agaga ma‵sei ko faka‵logo ki a koutou, kae ke na fia‵fia me ko oti ne tusi otou igoa i te lagi.” (Luka 10:1-9, 17, 20) E tonu, a te mauaga o te taliaga a Ieova e sili fakafia atu i te tāua i lō te mauaga o se tauliaga fakapito. E mafai eiloa o masaua ne ia a soko fakamaoni—se auala telā e maua i ei a te fiafia sili.

I te suā taimi, ne faipati atu a Iesu ki se vaitino. Ne fakaasi atu ne se fafine Iutaia ana lagonaga me e mautinoa eiloa me ka fiafia te mātua o te faiakoga sili tenei ko Iesu. Kae ne faka‵tonu ne Iesu tou fafine, mai te fai atu: “Ikai, e se penā, kae e fia‵fia a latou kolā e lagona ne latou te muna a te Atua kae tausi ki ei!” (Luka 11:27, 28) A te fai pelā me se mātua telā e fakamatamata i mea ‵lei ne  fai ne tena tama se mea gali ‵ki eiloa; kae ko te mauaga o se fesokotakiga mo Ieova ona ko te fakalogo, se pogai sili e tasi ke maua i ei te fiafia.

E tonu, a te mauaga o te taliaga a Ieova ko te kī ki te mauaga o te fiafia tonu. E tiga eiloa e se maua te fiafia i fakalavelave, kae e se mafai o ave kea‵tea ne fakalavelave a te fiafia mai i a tatou. E ‵kese mai i ei, kafai e kufaki tatou mo te fakamaoni i fakalavelave konā, ka gasolo aka eiloa o lasi ‵tou fia‵fia. (Loma 5:3-5) E se gata i ei, e tuku atu ne Ieova tena agaga ki a latou kolā e tali‵tonu ki a ia, kae ko te fiafia se vaega o fuataga o te agaga. (Kala. 5:22) E fesoasoani mai te mea tenā ke malamalama tatou i te pogai e fai mai ei te Salamo 64:10, penei: “A tino amio‵tonu ka fia‵fia i a Ieova.”

E fakamatala mai ne te mea tenei a te pogai ne mafai ei ne Diana mo John, kolā ne taku atu muamua, o fakatumau te fiafia tumau i te taimi ne fakafesagai lāua mo tulaga faiga‵ta. E fai mai a Diana: “Ne faka‵lafi atu au ki a Ieova, e pelā me se tamaliki telā e faka‵lafi atu ki tena mātua.” Ne maua pefea ne ia te taliaga a te Atua? “E iloa ne au me ne fakamanuia ne ia au ke mafai o tumau i te talai atu i taimi katoa kae fakamisikata atu.” Ne fakamatala mai ne John, telā ne tumau tena loto finafinau i te galuega talai i te taimi ne fakagata ei tena tavini atu e pelā me se ovasia faimalaga, a te mea telā ne fesoasoani malosi atu ki a ia: “Talu mai te 1998 i te taimi ne ‵tofi ei au ke fai pelā me se faiakoga o te Akoga mō Tavini Fesoasoani, ne fai ne au a sukesukega totino e uke atu i lō te taimi muamua.” Ne fai mai a ia e uiga ki a ia mo tena avaga: “Ne faigofie ke fai ne māua a fakamafuli‵fuliga e uiga ki te tavini atu ki a Ieova i te fia o tausaga, ona ko te mea ne loto fia‵fia faeloa māua o fai a mea kolā ne fakatonu mai ne Ieova. Ne seki sala‵mo eiloa māua i te faiga o mea konā.”

Ne fakatalitonu foki ne te tokoukega a te ‵tonu o pati i te Salamo 64:10. E pelā me se fakaakoakoga, se tauavaga kolā ne tavini atu mō tausaga e sili atu mo te 30 i te Peteli i Amelika. Fakamuli ifo, ne ‵tofi aka lāua ke olo ki tua o ga‵lue e pelā me ne paenia fakapito. Ne fai ‵tonu mai lāua: “A te fanoanoa se lagonaga masani e maua ne koe māfai ko galo atu se mea ne fiafia koe ki ei,” kae ne toe fai mai lāua: “E se mafai ne koe o fanoanoa ki te se-gata-mai.” Ne aofia fakavave lāua i te galuega talai fakatasi mo te fakapotopotoga. Ne fai mai foki lāua: “Ne ‵talo atu māua e uiga ki nāi mea kolā e tāua ki a māua. Ne maua ne māua te loto malosi mo te fiafia me ne tali mai mā ‵talo. Mai tua malie o te okoatuga o māua, ne kamata o paenia a nisi tino i te fakapotopotoga, kae ne fakamanuiagina māua e auala i akoga faka-te-Tusi Tapu e lua kolā e ga‵solo ki mua.”

E tonu, e se faigofie faeloa ke fia‵fia, kae ka isi faeloa ne fakalavelave e ‵sae aka. Kae ne fakatalitonu mai ne Ieova i ana pati i te Salamo 64:10. Kafai foki e loto vāi‵vai tatou i nisi taimi, e mafai o tali‵tonu tatou me i a latou kolā e fakatalitonu mai ne latou i a latou ne ‘tino amio‵tonu’ mai te tumau i te fakamaoni faitalia a ‵fuliga ki olotou fakanofonofoga, “ka fia‵fia i a Ieova.” E se gata i ei, e mafai o olioli tatou ki te fakataunuga o te folafolaga a Ieova e uiga ki se “lagi fou mo se lalolagi fou.” Kae ka fakaseai katoatoa atu a te tulaga sē ‵lei katoatoa. Kae ko tino o te Atua ka “‵lifu kae fia‵fia ki te se-gata-mai” i mea kolā e faite kae tuku mai ne ia ki a latou.—Isa. 65:17, 18.

Mafaufau la ki te uiga o te mea tenei: te mauaga o te ola ‵lei katoatoa mo te malosi i aso katoa. Faitalia me pefea te lasi o te fanoanoa i mea tau lagonaga i taimi ona ko mea ‵tupu i aso ko ‵teka, ka sē toe masaua ne tatou a mea konā. Ko oti ne fakatalitonu mai ki a tatou me i “mea mua ka se toe manatua i te mafaufau, kae ka se toe ‵sae aka i te loto.” Ka toe ‵kau fakatasi a tino mo olotou tino pele i te taimi o te toetuga. Ka maua ne te fia miliona a lagonaga kolā ne maua ne mātua o se tamaliki fafine ko 12 ana tausaga telā ne toe fakatu aka ne Iesu ki te ola: “Ne fia‵fia malosi ei ana mātua.” (Male. 5:42) I te fakaotiga loa, ka taku eiloa a tino katoa i te lalolagi e pelā me ne “tino amio‵tonu” mo tino kolā e “fia‵fia i a Ieova” ki te se-gata-mai.