NE FAKAFESAGAI atu a Iosua mo se mea faigata. Ne ‵tau o takitaki ne ia te fenua o Isalaelu ki te Fenua o te Folafolaga i loto i fakalavelave fakama‵taku. Kae ne fakatalitonu atu a Ieova me i a ia ka manumalo, kae fakamalosi atu a ia: ‘Ke loto toa kae loto malosi kae fakalogo ki taku Tulafono. Faitau ki ei i te ao mo te po, ko te mea ke mafai o fakalogo faka‵lei koe ki mea katoa kolā e tusi i loto i ei; kae ka manuia ei ou auala kae gasuesue koe mo te poto.’—Iosua 1:7, 8.

I “toe taimi faiga‵ta” konei, e fe‵paki foki tatou mo mea faiga‵ta. (2 Timo. 3:1) E pelā mo Iosua, e mafai o manumalo tatou mai te tau‵tali ki te manatu fesoasoani ne tuku atu ne Ieova ki tou tagata. E mafai o fai‵tau tatou ki te Tusi Tapu i aso katoa, kae fakagalue faka‵lei a fakatakitakiga i ei ki tofotofoga kolā e fe‵paki mo tatou.

Kae e mafai o mafau‵fau a te tokoukega o tatou me i a tatou e se ‵lei kae e se faigofie ki a tatou te faiga o sukesukega. Kae ona ko te tāua malosi o te sukesuke ki te Tusi Tapu, ke onoono ki te pokisi “ Tofotofo Aka ki Manatu Fesoasoani Konei” ke maua ne manatu aoga kolā e mafai o fai ke tai magoi kae fakafiafia ‵tou sukesukega.

“Takitaki mai au i te auala o au fakatonuga,” ne usu mai te faisalamo, “me i a au e fiafia ki ei.” (Sala. 119:35) E mafai o maua ne koe te fiafia sili mai te sukesuke ki te Muna a te Atua. Ka maua eiloa ne koe a taemani faka-te-agaga māfai e keli malosi koe ki ei.

E tiga eiloa e se manakogina ke takitaki ne koe se fenua e pelā mo Iosua, e isi ne fakalavelave e fe‵paki mo koe. Tela la, e pelā mo Iosua, ke sukesuke kae mafaufau ‵loto ki mea ne tusi ne koe mō te ‵lei o koe. Kafai e fai koe penā, ka manuia eiloa koe kae gasuesue mo te poto.