1, 2. (a) Se a te galuega ne fakamuamua ne Iesu i tena olaga, kae kaia? (e) Ne a mea e ‵tau o fai ne tatou ke manuia e pelā me ne “tino ga‵lue a te Atua”?

A IESU Keliso ne fai pelā me se kamuta mo se tino talai. (Male. 6:3; Loma 15:8) Ne apo malosi a ia i galuega konā. E pelā me se kamuta, ne tauloto a ia ke iloa o fakagalue a mea faigaluega i tena galuega, ko te fakaaogaga o laupapa ke faite ki ei a mea aoga. E pelā me se faiakoga o te tala ‵lei, ne fakaaoga ne ia mo te atamai a tena iloaga lasi e uiga ki te Tusi Tapu ke fesoasoani atu ki tino masani ke malamalama i muna‵tonu i te Muna a te Atua. (Mata. 7:28; Luka 24:32, 45) I te taimi ko 30 ei ana tausaga, ne fakatafa kea‵tea ne Iesu ana mea faigaluega e pelā me se kamuta, me ne iloa ne ia me i te fai mo fai se tino talai se galuega telā e sili atu i te tāua. Ne fai mai a ia me i te galuega ke folafola atu te talai ‵lei o te Malo o te Atua se pogai e tasi ne uga mai ei ne te Atua a ia ki te lalolagi. (Mata. 20:28; Luka 3:23; 4:43) Ne fakamuamua ne Iesu a te galuega talai i tena olaga, ne manako a ia ko nisi tino ke ‵kau atu ki a ia i te galuega tenā.—Mata. 9:35-38.

² E mafai o se fai tatou e pelā me ne kamuta, kae e mautinoa eiloa me i a tatou ne tino talai o te tala ‵lei. A te galuega tenā e tāua ‵ki eiloa me e aofia i ei te Atua; ne taku tatou ki “tino ga‵lue a te Atua.” (1 Koli. 3:9; 2 Koli. 6:4) Ne iloa ne tatou me i “te ‵kano tonu o tau muna [Ieova] ko te munatonu.” (Sala. 119:159, 160) Tenā te pogai e ma‵nako ei tatou o fakamautinoa aka me e “akoako ‵tonu eiloa ne [tatou] te munatonu” i te ‵tou galuega talai. (Faitau te 2 Timoteo 2:15.) Ke maua te mea tenā, e ‵tau o gasolo ki mua ‵tou ata‵mai i te  fakaaogaga o te Tusi Tapu, te mea faigaluega tāua e fakaaoga ne tatou ke akoako atu te munatonu e uiga ki a Ieova, Iesu, mo te Malo. Ke fesoasoani mai ke manuia tatou i te galuega talai, ko oti ne fakatoka ne te fakapotopotoga a Ieova a nisi mea faigaluega tāua kolā e manakogina ke fakamasani tatou ki ei. E fakasino atu tatou ki ei e pelā me ko te Pusa o Mea Faigaluega mo Fai Akoakoga.

3. Se a te mea e ‵tau o ‵saga tonu atu tatou ki ei i te taimi tenei koi ‵toe ke talai atu, kae e fesoasoani mai pefea a te Galuega 13:48 ke fai ne tatou te mea tenā?

³ E mafai o mafaufau koe me kaia e taku i ei ki te Pusa o Mea Faigaluega mo Fai Akoakoga kae e se ko te Pusa o Mea Faigaluega mō Talai. A te “talai” e fakauiga loa ki te folafola atu o se fekau; kae ko te “akoako” e fakauiga loa ki te faka‵gotoga o te fekau tenā ki te mafaufau mo te loto o te tino, ko te mea ke fakagalue aka a mea e tauloto ne ia. I taimi konei koi ‵toe ke talai atu ei tatou, e ‵tau o ‵saga tonu atu tatou o kamata a akoga faka-te-Tusi Tapu kae akoako atu a tino ki te munatonu. E fakauiga loa ki te ‵sala atu mo te loto finafinau ki a latou kolā “ko oti ne filifilia mō te ola se gata mai” kae fesoasoani atu ki a latou ke fai mo tino tali‵tonu.—Faitau te Galuega 13:44-48.

4. E mafai pefea o iloa ne tatou a latou kolā “ko oti ne filifilia mō te ola se gata mai,” kae e mafai pefea o maua ne tatou a latou?

⁴ E mafai pefea o iloa ne tatou a tino kolā “ko oti ne filifilia mō te ola se gata mai”? E pelā mo te mea ne tupu i te senitenali muamua, a te auala fua e tasi ke maua a tino penā ko te talai. Tela la, e ‵tau mo tatou o fai a te mea telā ne fakatonu mai a Iesu, penei: “I so se fakai e oko koutou ki ei, ‵sala atu ki tino kolā e mafai o talia ne latou te fekau.” (Mata. 10:11) E se ‵tau o fakamoe‵moe tatou ki tino sē loto fakamaoni, tino kaitaua, io me kolā e seai ne olotou manakoga faka-te-agaga ke ‵saga tonu mai ki te tala ‵lei. E olioli eiloa tatou ke fetaui mo tino kolā e fia‵fia, loto maulalo, kae fia‵kai ki te munatonu. E mafai o faka‵pau ne tatou a te galuega tenei ki te mea ne fai ne Iesu, e pelā me se kamuta, kāti ne ‵sala atu a ia ki se ‵toe laupapa ‵lei mō fai a meaafale, mataloa, mea mo toso a manu, mo nisi mea aka foki. I te taimi ne maua ei ne ia a laupapa kolā e fetaui ‵lei, ne mafai o aumai ne ia tena pusa mea faigaluega, kae fakaaoga tena atamai ke faite ne ia. E ‵tau foki o fai tatou penā i te taimi e taumafai malosi ei tatou o fai a soko mai tino loto ‵lei.—Mata. 28:19, 20.

5. Ne a mea e manakogina ke iloa ne tatou e uiga ki ‵tou Pusa o Mea Faigaluega mo Fai Akoakoga? Fakamatala mai. (Ke onoono ki te ata i te kamataga.)

⁵ E pelā mo so se pusa mea faigaluega, e aoga eiloa a mea faigaluega takitasi konā. Mafaufau aka la ki mea faigaluega kolā ne mafai o fakaaoga ne Iesu. * Ne manakogina ne ia a mea faigaluega ke fua kae māka ki ei a te laupapa; ke ‵kati, vili, kae fakagaligali a te laupapa; kae ke levolo ke ‵tonu, kae ‵tuki fakatasi a mea konā. I se auala tai ‵pau, e isi eiloa ne aoga o mea faigaluega takitasi i ‵tou Pusa o Mea Faigaluega mo Fai Akoakoga. Tela la, ke na onoono nei tatou ki loto i ‵tou pusa o mea faigaluega konā ke iloa aka te auala ke fakaaoga ei a mea faigaluega tāua kolā ne tuku mai ki a tatou.

6, 7. (a) E fakaaoga pefea ne koe a te pepa ki te fakatuatusi? (e) Ne a ‵kamiga e lua e maua i loto i te ‵kamiga ki fakatasiga a te fakapotopotoga?

⁶ Pepa ki te Fakatuatusi. A pepa konei e fo‵liki kae ne mea faigaluega ma‵goi e mafai o fakaaoga ne tatou ke fakamatala atu ei a mea e uiga ki a tatou kae takitaki atu foki a tino ki ‵tou fakatuatusi, ke mafai ei o tauloto latou ki mea e uke e uiga ki a tatou kae fakamolemole atu foki mō se akoga faka-te-Tusi Tapu. Tela la, kāti ko silia atu mo te 400,000 fakamolemole mō ne akoga faka-te-Tusi Tapu i te itaneti ko oti ne maua i te fakatuatusi a tatou ko te jw.org, kae koi lau loa i te fia selau o tino koi fakamolemole atu i aso takitasi! Kāti e mafai o tausi ne koe a nāi pepa ki te fakatuatusi ke mafai o ‵sala atu ki avanoaga ke talai atu i te taimi e fai ei au galuega i aso takitasi.

 ⁷ ‵Kamiga. A te mea masani telā e fakasino atu faeloa ki ei e pelā me ko te ‵kamiga ki fakatasiga a te fakapotopotoga e maua i ei a ‵kamiga e lua. E fai mai: “Ko ‵kami mai koe ke sukesuke ki te Tusi Tapu mo Molimau a Ieova.” Kae e tuku mai ei se filifiliga ke fai te mea tenā “i omotou fakatasiga” “io me motou faiakoga.” Tela la, e se fakamatala mai fua i te mea faigaluega tenei a tatou kae e ‵kami foki ne ia a nisi tino kolā e “iloa ‵lei ne latou olotou manakoga faka-te-agaga” ke suke‵suke ki te Tusi Tapu fakatasi mo tatou. (Mata. 5:3) E tonu, e tali fiafia eiloa a tino kolā e ‵kau atu ki fakatasiga faitalia me e talia ne tatou se akoga faka-te-Tusi Tapu io me ikai. Kafai e ‵kau mai latou, ka lavea kae lagona eiloa ne latou a mea kolā e ofo atu ne tatou e auala i akoakoga ‵tonu mai te Tusi Tapu.

8. E pefea te tāua mo tino ke ‵kau mai kāti fakatasi fua ki ‵tou fakatasiga? Taku mai se fakaakoakoga.

⁸ Se mea tāua ke tumau tatou i te ‵kami o tino ke ‵kau mai kāti fakatasi fua ki ‵tou fakatasiga. Kaia? Ka lavea ne latou a te ‵kesega lasi i te vā o te maumea faka-te-agaga o ‵tou fakatasiga mo te tulaga masei i te feitu faka-te-agaga o Papelonia te Sili. (Isa. 65:13) Ne fakamatala mai ne Ray mo Linda, se tauavaga i te Iunaite Sitete a te mea tenei i nai tausaga ko ‵teka. Ne fakaiku aka ne lāua me e manakogina ke kamata o olo atu lāua ki lotu. Ne tali‵tonu lāua ki te Atua kae ne ma‵nako lāua ki se mea faka-te-agaga, telā ne kamata lāua o olo atu ki lotu katoa i te fakai o lāua. E uke a vaegā lotu kae uke foki a mavae‵vaega. Mai te kamataga, ne fakaiku aka ne te tauavaga tenei a tulaga e lua kolā e ‵tau matea ne lāua i tino i so se lotu e ‵kau lāua ki ei. Te mea muamua, e ‵tau o tauloto ne lāua se mea i te tapuakiga, kae ko te lua, a tino o te lotu e ‵tau o fai pelā me ne tino kolā e sui ne latou te Atua. I ne tausaga mai tua ifo, ne olo atu lāua ki lotu katoa i te fakai, kae ne fanoa‵noa malosi lāua i ei. Ne seki ai eiloa se lā mea ne tauloto, kae e se lavea atu i foliga o tino konā a te ‵malu o latou. I te otiga o te lotu fakaoti i te lā fakasologa, ne foki atu a Linda ki tena galuega kae ne fanatu a Ray ki te fale. I tena auala, ne pāsi ne ia te Fale Tapuaki, kae ne mafaufau tou tagata, penei, ‘Kaia e se fanatu fua ki loto kae onoono aka ki mea e fai ne latou?’ E tonu, tenā eiloa te ‵toe tala fakafiafia mai mea katoa! A tino katoa i te Fale Tapuaki e mata fia‵fia kae atafai kae fai faka‵lei foki a olotou gatu. Ne sagasaga atu a Ray i nofoaga tafa ki mua kae ne fiafia ki mea ne tauloto ne ia! E ‵pau eiloa mo pati a Paulo e uiga ki te tino telā e vau ki fakatasiga Kelisiano mō te taimi muamua kae fai atu: “A te Atua e nofo eiloa i a koutou.” (1 Koli. 14:23-25) Ne kau atu faeloa a Ray ki fakatasiga i Aso Sa katoa mai tua o te taimi tenā; oti aka ne toe kau mai foki ki fakatasiga i loto i te vaiaso. Ne kamata foki o kau mai a Linda, kae e tiga eiloa ko taki 70 tupu lā tausaga, ne talia ne lāua se akoga faka-te-Tusi Tapu kae ne papatiso lāua.

9, 10. (a) Kaia e faigofie i ei te fakaaogaga o tamā pepa konei? (e) Fakamatala mai te auala ke fakaaoga ei a te tamā pepa ko te Se a te Malo o te Atua?

⁹ Tamā Pepa. E nofo ki se valu o tamā pepa kolā e faigofie ke fakaaoga mo fai a mea faigaluega ma‵goi ke kamata ki ei a sau‵talaga. E tiga eiloa ne kamata o ‵tala mai a tamā pepa konei i te 2013, e nofo ki se lima piliona o tamā pepa konei ko oti ne ‵lomi aka! E gali ‵ki a mea faigaluega konei, me kafai ko iloa ne koe te auala e fakaaoga i ei se tamā pepa e tasi mai i ei, ko mafai ei ne koe o fakaaoga a tamā pepa katoa konei me e ‵pau eiloa te auala ne fakatoka i ei. E mafai pefea o fakaaoga ne koe se tamā pepa ke kamata ki ei se sau‵talaga mo se tino?

¹⁰ Kāti e filifili koe ke fakaaoga te tamā pepa ko te Se a te Malo o te Atua? Fakaasi atu ki te tino a te fesili mai mua i te taimi e ‵sili atu ei koe, penei: “E mata, kai mafaufau aka eiloa koe me se a te Malo o te Atua? E mata, ka fai mai koe me se  . . ?” Ko ‵sili atu ei koe me tefea tena tali mai tali e tolu i te tamā pepa. I lō te fai atu me i tena tali e sao io me ‵se, ke ‵suke ki loto i te vaega “Fakamatalaga Mai te Tusi Tapu” kae sau‵tala ki tusi ‵siki kolā e ‵sae mai i ei, te Tanielu 2:44 mo te Isaia 9:6. Kafai e  mafai, ke faka‵soko te sau‵talaga. I te fakaotiga, ke toe fakasae atu ne koe a te fesili i te itulau fakaoti mai lalo i te ulutala tenei “Fesili ke Mafaufau ki ei”: “Ka fai pefea te olaga mai lalo i te pulega a te Malo o te Atua?” Ka fai te fesili tenā e pelā me se fakavae o te suā sau‵talaga mo te tino tenā. Kafai e toe fetaui koulua, e mafai o fakasino atu koe ki te tamā pepa tenā ki te mataupu e 7 o te polosiua ko te Tala ‵Lei Mai te Atua!, telā se tasi o ‵tou mea faigaluega ke kamata ki ei a a‵koga faka-te-Tusi Tapu.

11. Se a loa te pogai ne fakatoka i ei a ‵tou mekesini, kae se a te mea e ‵tau o iloa ne tatou e uiga ki ei?

¹¹ Mekesini. A Te Faleleoleo Maluga mo te Ala Mai! ko toe tusi kolā ko salalau te ‵lomiga mo te ‵fuliga i te lalolagi kātoa! Ona ko te salalau atu i te lalolagi kātoa, ne fakatoka eiloa a mataupu i te ‵kava ke ‵gali ki tino i koga katoa. E ‵tau o fakaaoga ne tatou a tusi konei e pelā me ne mea faigaluega ke fakamalosi aka ei te fiafia o se tino e uiga ki toe mea tāua i te olaga i aso nei. Kae ko te mea ke mafai o tuku atu ne tatou a mekesini konei ki tino kolā e fia‵fia tonu, e ‵tau o iloa ne tatou a tino kolā e fai‵tau ne latou a mekesini takitasi konei.

12. (a) Ne fakatoka mo oi a te Ala Mai!, kae se a eiloa te pogai ne ‵lomi i ei? (e) Ne a mea aoga ne maua ne koe mai te fakaaogaga o te mea faigaluega tenei?

¹² A te Ala Mai! ne fakatoka eiloa mō tino fai‵tau kolā e se lava io me se iloa ne latou a te Tusi Tapu. E mafai o se iloa ne latou a akoakoga faka-Kelisiano, e mafai o se tali‵tonu latou ki lotu, io me e se iloa ne latou me e tāua ‵ki eiloa a te Tusi Tapu. A te pogai tāua ne ‵lomi ei a te Ala Mai! ko te mea ke fakatalitonu atu ki tino fai‵tau me i te Atua e ola. (Loma 1:20; Epe. 11:6) Ne fakatoka fakapitoa foki ke fesoasoani atu ki tino fai‵tau ke ati aka te fakatuanaki me i te Tusi Tapu “ko te muna eiloa a te Atua.” (1 Tesa. 2:13) Konei a matua o lōmiga takitasi mō te tausaga 2018: “Te Auala ke Maua te Fiafia,” “Auala e 12 ke Manuia te Kāiga,” mo te “Fesoasoani Atu ki a Latou Kolā e Fanoa‵noa.”

13. (a) Ne fakatoka mo oi a te lōmiga o Te Faleleoleo Maluga mō tino katoa? (e) Ne a mea aoga ne maua fakamuli ne koe mai te mea faigaluega tenei?

¹³ A te lōmiga o Te Faleleoleo Maluga  mō tino katoa, e saga tonu atu loa ki mataupu faka-te-agaga mō tino kolā e isi se lotou tamā āva ki te Atua mo tena Muna. E tiga eiloa e isi ne olotou tamā iloa e uiga ki te Tusi Tapu, e se malamalama faka‵lei eiloa latou i akoakoga i ei. (Loma 10:2; 1 Timo. 2:3, 4) E tali mai eiloa ne mataupu o lōmiga takitasi o te mekesini tenā mō te tausaga 2018 a fesili konei: “E Mata, Koi Aoga Eiloa te Tusi Tapu i Aso Nei?,” “Ne a Mea ka ‵Tupu i Aso Mai Mua?,” mo te “E Mata, e Atafai Mai Eiloa te Atua?”

14. (a) Se a te pogai ne fakatoka i ei a vitio i ‵tou Pusa o Mea Faigaluega mo Fai Akoakoga? (e) Ne a mea aoga ne maua ne koe i te fakaasiatuga ki tino a vitio konei?

¹⁴ Vitio. I aso o Iesu, ne fakaaoga ne se kamuta a mea faigaluega ki lima. Kae i aso nei, ko fakaaoga foki ne tino faite laupapa a mea faigaluega iti—pelā mo soa, vili iti, sanipepa iti, vili fao iti, mo nisi mea aka e uke. E se gata fua i tusi kolā ne ‵lomi, ko maua foki nei ne tatou a vitio ‵gali ke fakaasi atu ki tino—e maua ne tatou a vitio e fa i ‵tou pusa o mea faigaluega mo fai akoakoga: Kaia e Suke‵suke ei ki te Tusi Tapu?, Ne a Mea e ‵Tupu i se Akoga Faka-te-Tusi Tapu?, Ne a Mea e Fai i se Kingdom Hall?, mo te Molimau a Ieova—Ko oi Latou? A vitio kolā e nofo mai lalo o te lua minute te ‵loa e gali ‵ki ma fakaaoga i te asiga muamua. A vitio ‵loa e mafai o fakaaoga i toe asiga penā foki mo latou kolā e avanoa malosi. E mafai o fakamalosi aka ne mea faigaluega ‵gali konei a tino ke suke‵suke ki te Tusi Tapu kae ‵kau atu ki fakatasiga.

15. Fakamatala mai a mea aoga ne maua ne tino mai te onoono ki se tasi o ‵tou vitio i olotou ‵gana totino.

¹⁵ I te taimi ne fetaui ei se tuagane mo se fafine telā ne fanatu mai Micronesia kae e faipati ki te ‵gana Yapese, ne fakaasi atu ne te tuagane a te vitio Kaia e Suke‵suke ei ki te Tusi Tapu? i tena ‵gana totino. I te taimi ne kamata o pei atu te vitio, ne fai atu te fafine: “Tenei taku ‵gana. Au se talitonu! E mafai ne au o  matemate a tena gaugaleo me i a ia se tino mai toku fenua. E faipati eiloa a ia ki taku ‵gana!” Mai tua ifo, ne fai atu tou fafine me ka faitau kae onoono a ia i so se vitio i tena ‵gana i te fakatuatusi ko te jw.org. (Fakatusa ki te Galuega 2:8, 11.) Mafaufau la ki te suā tala. Ne lafo atu ne se tuagane mai Iunaite Sitete ki tena fakatama se link ki te vitio foki tenā i tena ‵gana totino. Ne onoono tou tagata ki ei kae ne meli atu ki tou fafine: “Ne maina ‵lei eiloa au i te vaega e uiga ki se malosi masei telā e pule ne ia a te lalolagi kātoa. Ne lafo atu taku fakamolemole mō se akoga faka-te-Tusi Tapu.” E nofo atu tou tagata i se fenua telā e fakatapu i ei ‵tou galuega talai!

16. Fakamatala mai te pogai tāua ne fakatoka ei a polosiua takitasi konei: (a) Fakalogo ki te Atua Kae ke Ola ki te Se-Gata-Mai. (e) Tala ‵Lei Mai te Atua! (i) Ko oi e Fai ne Latou a te Loto o Ieova i Aso Nei?

¹⁶ Polosiua. E mafai pefea ne koe o akoako atu a te munatonu ki se tino telā e se ‵lei tena faitau io me seai ne tusi i tena ‵gana totino? E isi eiloa se mea faigaluega a tatou ki ei—te polosiua ko te Fakalogo ki te Atua Kae ke Ola ki te Se-Gata-Mai. * A te ‵toe mea faigaluega gali ke kamata ki ei a akoga faka-te-Tusi Tapu ko te polosiua Te Tala ‵Lei Mai te Atua! E mafai o fakaasi atu ne koe ki se tino a mataupu e 14 kolā e fakasolo mai tua o te itulau fakaoti kae fai atu ke filifili mai ne ia se mataupu telā e fiafia malosi a ia ki ei. Ka oti, ko kamata ei te akoga i te mataupu tenā. E mata, kai tofotofo aka ne koe a te auala tenei i au toe asiga? A te polosiua ko te Ko oi e Fai ne Latou te Loto o Ieova i Aso Nei? ko te tolu o polosiua i ‵tou pusa o mea faigaluega. Ne fakatoka eiloa ke fakailoa atu ki ‵tou tino a‵koga e uiga ki te fakapotopotoga. Ke tauloto ki te auala e fakaaoga i ei a te polosiua tenā i akoga faka-te-Tusi Tapu takitasi, ke onoono ki te lōmiga o te ‵Tou Olaga Kelisiano mo te Galuega Talai-Tusi mō Fakatasiga i a Mati 2017.

17. (a) Se a te pogai tāua o tusi takitasi konei e fai ki ei a akoga? (e) Se a te mea e manakogina ke fai ne latou kolā ko pili o papatiso, kae kaia?

¹⁷ Tusi. Kafai ko oti ne kamata se akoga i se polosiua, e mafai eiloa ne koe i so se taimi o ‵fuli ki te tusi ko te Ne a Mea e Mafai o Tauloto ne Tatou Mai te Tusi Tapu? Ka fakalauefa ne te mea faigaluega tenei a te iloaga o te tino e uiga ki akoakoga fakavae mai te Tusi Tapu. Kafai ko oti te tusi tenā kae ko gasolo ki mua te tino akoga, ke faka‵soko te akoga ki te tusi ko te Te Auala ke Tumau ei i te Alofa o te Atua. Ka fesoasoani atu te mea faigaluega tenei ke iloa ne te tino akoga o fakagalue aka a fakatakitakiga mai te Tusi Tapu i tena olaga i aso katoa. Masaua, me kafai foki ko oti ne papatiso, e ‵tau eiloa o faka‵soko te faiga o te akoga ke oko loa ki te taimi ko oti ei a tusi konei e lua. Ka fesoasoani atu te mea tenei ke isi se fakavae ‵mautakitaki o te tino akoga i te munatonu.—Faitau te Kolose 2:6, 7.

18. (a) Se a te mea e fakamalosi mai i te 1 Timoteo 4:16 ke fai ne tatou e pelā me ne faiakoga o te munatonu, kae ne a ikuga e maua mai i ei? (e) I te taimi e fakaaoga faka‵lei ei ne tatou a te Pusa o Mea Faigaluega mo Fai Akoakoga, se a te fakamoemoega e ‵tau o maua ne tatou?

¹⁸ E pelā me ne Molimau a Ieova, ko oti ne maua ne tatou a “te fekau o te munatonu e uiga ki te tala ‵lei” telā e mafai o takitaki atu ei a tino ki te ola se-gata-mai. (Kolose 1:5; faitau te 1 Timoteo 4:16.) Ke maua te taui tenā, ko maua eiloa ne tatou a te Pusa o Mea Faigaluega mo Fai Akoakoga telā e ‵fonu i mea kolā e manakogina ne tatou. (Ke onoono ki te “ Pusa o Mea Faigaluega mo Fai Akoakoga.”) Ke apo tatou i te fakaaogaga o mea faigaluega konei māfai e mafai. E mafai o filifili ne tino talai taki tokotasi a tusi ke talai atu ei ki se tino fiafia. Kae ko te pogai tāua e fakaaoga ei ne tatou a tusi konei e se ke tufatufa atu fua ki tino; io me tuku atu ne tatou a tusi ki tino kolā e se fia‵fia mai ki te ‵tou fekau. A te ‵tou fakamoemoega ko te faiga o soko mai tino kolā e fakamaoni, loto maulalo, kae fia‵kai i te feitu faka-te-agaga—ko “tino loto ‵lei katoa kolā e ‵tau o maua ne latou a te ola se-gata-mai.”—Galu. 13:48; Mata. 28:19, 20.