1-2. (a) Se a te faka‵pulaga ko pili o faka‵pula ne takitaki o atufenua? (e) Ne a fesili e manakogina ke tali aka?

MAFAUFAU aka la māfai fatoa oti ne faka‵pula ne takitaki o te lalolagi me ko “filemu kae tokagamalie.” Kāti e fakamata‵mata latou me ko fatoa filemu eiloa te lalolagi i lō taimi mua. Ka ma‵nako a atufenua ke mafau‵fau tatou me e mafai o faka‵lei aka ne latou a fakalavelave o te lalolagi. Kae ka sē mafai eiloa o taofi aka ne latou a te mea telā ka tupu mai tua! Kaia e se mafai ei? E ‵tusa mo te valoaga i te Tusi Tapu, ka “oko fakapoi atu te fakaseaiga ki luga i a latou, . . . kae ka se ‵sao eiloa latou.”—1 Tesa. 5:3.

² E isi ne fesili tāua e manakogina ke tali aka: Ne a mea ka ‵tupu i te taimi o te “fakalavelave lasi”? Se a te mea ka fakamoemoe a Ieova ke fai ne tatou i te taimi tenā? Kae e mafai pefea o fakatoka tatou i te taimi nei ke tumau i te fakamaoni i te taimi o te fakalavelave lasi?—Mata. 24:21.

3. E ‵tusa mo te Fakaasiga 17:5, 15-18, ka fakaseai pefea ne te Atua a “Papelonia te Sili”?

³ Faitau te Fakaasiga 17:5, 15-18. A “Papelonia te Sili” ka fakaseai atu! E pelā mo te mea ne taku mai muamua, ka se mafai ne atufenua o taofi aka a mea ka ‵tupu i te taimi tenei. Kaia e se mafai? Me “[ka] faulu ne te Atua ki olotou loto a tena manatu ke fakataunu tena loto.” Se a tena loto? Ke fakaseai atu a te emupaea o lotu ‵se i te lalolagi kātoa, e aofia i ei a lotu i Fenua Kelisiano. * Ka tuku atu ne te Atua a tena manatu ki loto o “suki  e sefulu” o te “manu fekai lanu ‵kula.” A suki e sefulu e sui ne latou a malo fakapolitiki katoa kolā e ‵lago atu ki “te manu fekai”—te Malo ‵Soko. (Faka. 17:3, 11-13; 18:8) Kafai ko ‵saga atu a malo fakapolitiki konā ki lotu ‵se, tenā te taimi ka kamata i ei a te fakalavelave lasi. Se fakalavelave fakapoi kae fakamataku i te lalolagi kātoa.

4. (a) Ne a pogai kāti ka fai mai ne atufenua ke ‵pulu aka i ei a te lotou taua atu ki lotu ‵se? (e) Ne a mea e mautinoa eiloa me ka fai ne tino kolā ne aofia i lotu konā?

⁴ E se iloa ne tatou a pogai e mafai o tuku mai ne atufenua ke ‵pulu aka i ei a te lotou taua atu ki Papelonia te Sili. E mafai o fai mai latou me i lotu o te lalolagi e fai pelā me se fakalavelave ki te mauaga o te filemu kae e aofia faeloa latou i kinauga fakapolitiki. Io me e mafai o fai mai latou me i fakapotopotoga fakalotu konā ne maua ne latou a maumea mo kope e uke. (Faka. 18:3, 7) E foliga mai me i te taimi e ‵saga atu ei a atufenua ki lotu, ka se fakaseai ne latou a tino katoa e aofia i lotu konā. I lō te fai penā, e foliga mai me i atufenua ka fakaseai muamua ne latou a fakapotopotoga fakalotu. Kafai ko oti ne fakaseai a fakapotopotoga konā, ka iloa ne tino kolā e aofia i lotu konā me ne seki mafai ne olotou takitaki lotu o faka‵sao latou, kae e mautinoa eiloa me ka faka‵mao latou kea‵tea mai lotu konā.

5. Se a te mea ne tauto mai ki ei a Ieova e uiga ki te fakalavelave lasi, kae kaia?

⁵ E se fakaasi mai i te Tusi Tapu a te leva ka fakaseai atu ei a Papelonia te Sili, kae e iloa ne tatou me ka fai fua i loto i se taimi toetoe. (Faka. 18:10, 21) Ne tauto mai a Ieova me ka “fakamu‵tana a aso” o te fakalavelave lasi ko te mea ke faka‵sao i ei a ana “tino filifilia” mo te lotu tonu. (Male. 13:19, 20) Kae se a te mea ka fakamoemoe a Ieova ke fai ne tatou i te taimi e kamata ei te fakalavelave lasi mo te taua ko Amaketo?

6. Ne a nisi mea e ‵tau o fai ne tatou ke ‵vae kea‵tea mai lotu ‵se?

⁶ E pelā mo te mea ne fakamatala mai i te mataupu mai mua, e manako a Ieova ko ana tino tapuaki ke ‵vae kea‵tea mai Papelonia te  Sili. Kae e uke a mea e manakogina ke fai i lō te ‵kati fua o fesokotakiga mo lotu ‵se. E ‵tau o fakaiku aka ne tatou ke fakamaluga aka te lotu tonu—te tapuakiga ‵ma a Ieova. Ke mafau‵fau ki auala e lua kolā e mafai ne tatou o fai te mea tenā.

7. (a) I te auala fea e mafai o ‵piki ‵mautakitaki tatou ki tulaga amio‵tonu o Ieova i mea tau amioga? (e) I te auala fea e faka‵mafa mai ei i te Epelu 10:24, 25 a te tāua o te ‵tou ‵kau fakatasi i fakatasiga, maise loa i te taimi nei?

⁷ Muamua la, e ‵tau mo tatou o ‵piki ‵mautakitaki ki tulaga amio‵tonu o Ieova i mea tau amioga. E se mafai o talia ne tatou a tulaga o te lalolagi i mea tau amioga. E pelā me se fakaakoakoga, e se talia ne tatou so se vaega o faifaiga fakatauavaga sē ‵tau, e aofia i ei a te avaga i te vā o te tagata mo te tagata io me ko te fafine mo te fafine io me ko nisi faifaiga fakasotoma. (Mata. 19:4, 5; Loma 1:26, 27) Te lua, e ‵tau mo tatou o tumau i te tapuaki fakatasi mo ‵tou taina Kelisiano. E fai ne tatou te mea tenei faitalia te koga e ‵nofo tatou i ei, me i ‵tou Fale Tapuaki, io me i ‵tou fale totino io me fai i se koga e se lavea ne tino. Faitalia me ne a mea e ‵tupu, e se mafai o taofi aka ne tatou a te ‵kau fakatasi i ‵tou fakatasiga. E tonu, e ‵tau mo tatou o ‵kau fakatasi “maise eiloa me ko iloa ne [tatou] i te aso tenā ko pili mai.”—Faitau te Epelu 10:24, 25.

8. Ka mafai pefea o mafuli a te ‵tou fekau i aso mai mua nei?

⁸ I te taimi o te fakalavelave lasi, ka mafai o mafuli a te fekau telā e folafola atu ne tatou. I te taimi nei, koi talai eiloa ne tatou a te tala ‵lei o te Malo kae taumafai tatou o fai a soko. Kae i te taimi tenā, kāti ka fakaoko atu ne tatou se fekau telā e pelā me se vaiua fatu. (Faka. 16:21) E mafai o folafola atu ne tatou a te fakaseaiga o te lalolagi a Satani telā ko pili mai. I te taimi tenā, ka iloa aka ei ne tatou a te ‵tou fekau mo te auala ka fakaoko atu ne tatou ki tino. E mata, ka fakaaoga ne tatou a auala konei ne masani o fakaaoga ne tatou mō tausaga e silia atu mo te selau ke fakataunu ei ‵tou galuega talai? Io me ka fakaaoga ne tatou a nisi auala aka? Ka ‵nofo fua tatou o faka‵tali ki ei. Faitalia te auala ka talai ei tatou, e foliga mai me ka maua eiloa ne tatou a te tauliaga ke folafola atu mo te loto ‵toa a te fekau o te fakamasinoga a Ieova!—Eseki. 2:3-5.

9. I te auala fea ka ‵saga mai ei a atufenua ki te ‵tou fekau, kae se a te mea e mautinoa i a tatou?

⁹ E mautinoa eiloa me ka fai ne te ‵tou fekau ke taumafai a atufenua o taofi aka tatou mai te talai atu. E pelā loa mo te fakalago‵lago o tatou ki a Ieova i te ‵tou galuega talai i aso nei, ka manakogina foki ne tatou a tena fesoasoani i te taimi tenā. E mautinoa eiloa me ka faka‵fonu tatou ne te ‵tou Atua ki te ‵mana ke fakataunu ei a tena loto.—Mika 3:8.

10. E pelā mo te valoaga i te Luka 21:25-28, ka ‵saga atu pefea a te tokoukega o tino ki mea e ‵tupu i te taimi o te fakalavelave lasi?

¹⁰ Faitau te Luka 21:25-28. I te taimi o te fakalavelave lasi, ka ‵poi eiloa a tino māfai ko lavea ne latou a mea katoa kolā ne fakalagolago latou ki ei ka fakaseaoga. Ka “manava‵se,” kae ma‵taku latou māfai ko oko mai a te aso o te pouli tagataga. (Sefa. 1:14, 15) I te taimi tenā, ka faigata ‵ki foki eiloa a te olaga ki tino o Ieova. Ona ko te tumau o tatou i te sē fai mo vaega o te lalolagi, e mafai o logo‵mae tatou i nisi mea faiga‵ta. E mafai eiloa o se maua ne tatou a mea kolā e manakogina i te taimi tenei.

11. (a) Kaia ka fai ei a Molimau a Ieova e pelā me ko te taketi? (e) Kaia e se ‵tau ei mo tatou o ma‵taku i te taimi o te fakalavelave lasi?

¹¹ I te suā feitu, a tino i fakapotopotoga lotu kolā ko oti ne fakaseai atu, e mafai eiloa o kaitaua  māfai e lavea ne latou me koi tumau eiloa a te fakapotopotoga a Molimau a Ieova i te faiga o te lotou tapuakiga. Kae ka fakaasi atu ne latou te lotou kaitaua e auala i mea fakasalalau i te itaneti. Ka takalia‵lia mai a atufenua mo te lotou pule ko Satani ona ko te ‵tou tapuakiga fua e seki fakaseai atu. Ka se fakataunu eiloa a te lotou fakamoemoega ke fakaseai atu a lotu katoa mai te lalolagi. Tela la, ka fai eiloa tatou e pelā me ko te lotou taketi. I te taimi tenei, ka fai eiloa a atufenua e pelā mo Koka mai Makoka. * Ka ‵kau fakatasi latou o taua mai ki tino o Ieova. (Eseki. 38:2, 14-16) E mafai eiloa o manava‵se tatou māfai e mafau‵fau ki mea ka ‵tupu i te taimi o te fakalavelave lasi, me e se iloa ne tatou a fakamatalaga liki‵liki e uiga ki ei. Kae tiga te feitu tenā, e tasi te mea e mautinoa i a tatou: E se ‵tau mo tatou o ma‵taku i te taimi o te fakalavelave lasi. Ka tuku mai eiloa ne Ieova a fakatonuga kolā ka fai ei ke ‵sao tatou. (Sala. 34:19) Ka mafai eiloa ne tatou o “‵kilo ki luga” me ka iloa ne tatou me ko “pili mai te taimi ka faka‵sao ei [tatou].” *

12. I te auala fea ne fakatoka ei ne te “tavini fakamaoni kae poto” a tatou mō mea ‵tupu i aso mai mua?

¹² Ko leva ne fakatoka ne te “tavini fakamaoni kae poto” a tatou ke tumau i te fakamaoni i te taimi o te fakalavelave lasi. (Mata. 24:45) Ko oti ne fai a te mea tenei i auala e uke, kae mafaufau la ki se fakaakoakoga: ‵tou polokalame i fono o atufenua mai te tausaga 2016-2018. I loto i polokalame konā, ne fakamalosi mai ke ati aka ne tatou a uiga kolā e manakogina ne tatou ona ko te pili mai o te aso o Ieova. Ke toe onoono aka tatou ki uiga konā.

13. E mafai pefea o fakamalosi aka ‵tou fakamaoni ki a Ieova, kae kaia e ‵tau ei o fai ne tatou i te taimi nei?

¹³ Fakamaoni: A te matua o te fono o te atufenua i te 2016 ko te “Ke Tumau i te Fakamaoni ki a Ieova!” Ne akoako tatou i te polokalame tenei me kafai e maua ne tatou se fesokotakiga malosi mo Ieova, ka fakamaoni tatou ki a ia. Ne fakamasaua mai ki a tatou me e mafai o fakapili‵pili atu tatou ki a Ieova e auala i ‵tou ‵talo kolā e fai atu mo te loto kātoa kae suke‵suke faka‵lei ki tena Muna. A te faiga tenā e tuku mai i ei ki a tatou a te malosi ke manumalo i toe mea faiga‵ta. Ona ko te pili mai o te gataga o te fakanofonofoga tenei a Satani, e fakamoe‵moe tatou ke fe‵paki mo toe tofotofoga faiga‵ta o te fakamaoni ki te Atua mo tena Malo. E mautinoa eiloa me ka fakatauemu mai a tino ki a tatou. (2 Pe. 3:3, 4) Tasi o pogai ona ko te sē ‵lago atu o tatou ki se vaega o te lalolagi a Satani. E ‵tau o fakamalosi aka ne tatou a te ‵tou fakamaoni i te taimi nei ko te mea ke tumau tatou i te fakamaoni i te taimi o te fakalavelave lasi.

14. (a) Se a te ‵fuliga e uiga ki ‵tou taina kolā e fai ne latou a te takitakiga i te lalolagi? (e) Kaia e ‵tau ei mo tatou o fakamaoni i te taimi tenā?

¹⁴ I te fakalavelave lasi, ka isi se ‵fuliga e uiga ki taina kolā e fai ne latou a te takitakiga i te lalolagi nei. E isi eiloa se taimi, ka fakamaopoopo i ei a tino fakaekegina katoa koi ‵toe i te lalolagi ki te lagi ke aofia i te taua i a Amaketo. (Mata. 24:31; Faka. 2:26, 27) E fakauiga i ei me ka seai se sui o te Potukau Pule ka ‵nofo mo tatou i te lalolagi nei i te taimi tenā. Kae ui i ei, ka fakamaopoopo eiloa a te vaitino  tokouke. Ka fai ne taina kolā e fetaui ‵lei a te takitakiga o nisi mamoe. Ka manakogina i ei ke fakaasi atu ne tatou a te fakamaoni mai te ‵lago atu ki taina konei kae tau‵tali i olotou fakatonuga kolā e tuku mai ne te Atua. Ka faka‵na eiloa a te ‵tou faka‵saoga ki ei!

15. E mafai pefea o fakamalosi aka ne tatou a te ‵tou kufaki, kae kaia e tāua ei ke fai penā i te taimi nei?

¹⁵ Kufaki: A te matua o te fono o te atufenua i te 2017 ko te “Ke se ‵Fiu Tatou!” Ne fesoasoani mai te polokalame tenei ke fakamalosi aka ‵tou kufaki ke mafai o fakafesagai atu ki mea faiga‵ta. Ne tauloto tatou me e se fakalagolago ‵tou kufaki ki ‵tou fakanofonofoga. E mafai o fakamalosi aka ‵tou kufaki mai te fakalago‵lago ki a Ieova. (Loma 12:12) Ke mo a ma puli i a tatou a te tautoga a Iesu ne fai: “Ko te tino telā e kufaki ke oko ki te gataga ka sao eiloa.” (Mata. 24:13) E fakauiga eiloa te tautoga tenei me e ‵tau mo tatou o tumau i te fakamaoni faitalia so se fakalavelave e fepaki mo tatou. Mai te kufaki i mea faiga‵ta i te taimi nei, ka mafai ei o ma‵losi tatou mai mua o kamata te fakalavelave lasi.

16. Se a te mea e fai ne ia tatou ke loto ma‵losi, kae e mafai pefea o fakamalosi aka ne tatou a te uiga tenā i te taimi nei?

¹⁶ Loto malosi: A te matua o te fono o te atufenua i te 2018 ko te “Ke Loto Ma‵losi!” Ne fakamasaua mai i te fono tenei me e se mafai o maua ne tatou a te loto malosi i ‵tou atamai eiloa. E pelā loa mo te kufaki, a te loto malosi tonu e maua mai te fakalagolago ki a Ieova. E mafai pefea o fakalago‵lago malosi tatou ki a ia? Mai te fai‵tau ki tena Muna i aso katoa kae mafaufau ‵loto ki te auala ne faka‵sao ne Ieova ana tino i aso ko ‵teka. (Sala. 68:20; 2 Pe. 2:9) Kafai ko taua mai a atufenua ki a tatou i te fakalavelave lasi, e manakogina ‵ki ne tatou i te taimi tenā a te loto malosi mo te loto talitonu ki a Ieova i lō taimi mua. (Sala. 112:7, 8; Epe. 13:6) Kafai e fakalago‵lago tatou ki a Ieova i te taimi nei, ka maua eiloa ne tatou a te loto malosi ke fakafesagai atu ki te osomaiga a Koka. *

17. Kaia e se ‵tau ei o ma‵taku tatou i te taua o Amaketo? (Ke onoono ki te ata i te ‵kava.)

¹⁷ E pelā mo te mea ne fakasae aka i te mataupu mai mua, a te tokoukega o tatou ne ola i te vaitaimi o aso fakaoti. Kae e fakamoe‵moe foki  tatou ke ‵sao atu i loto i te fakalavelave lasi. A te taua i a Amaketo ko te fakaotiga eiloa o te gataga o te olaga tenei. Kae e se ‵tau o ma‵taku tatou. Kaia? Me i te taua tenei ko te taua a te Atua. (Faata. 1:33; Eseki. 38:18-20; Saka. 14:3) Kafai ko tuku mai ne Ieova te fakailoga, tenā te taimi ka takitaki mai ei ne Iesu Keliso a tena kautau. Ka ‵kau fakatasi atu ki a ia a te kau fakaekegina kolā ko oti ne faka‵tu aka mo te fia miliona o agelu. Kae ka taua mai latou ki a Satani, ana temoni, mo tena kautau i te lalolagi nei.—Tani. 12:1; Faka. 6:2; 17:14.

18. (a) Se a te mea ne tauto mai ki ei a Ieova? (e) Kaia e fesoasoani mai ei a te Fakaasiga 7:9, 13-17 ke talitonu koe e uiga ki aso mai mua?

¹⁸ Ne tauto mai a Ieova: “E seai se meatau ne faite ke ‵teke atu ki a koe ka manuia.” (Isa. 54:17) Ka ola eiloa a te “vaitino tokouke” o tino tapuaki fakamaoni a Ieova kolā “ne ‵sao i te fakalavelave lasi”! Kae ka tumau eiloa latou i te tuku atu ki a ia a te taviniga tapu. (Faitau te Fakaasiga 7:9, 13-17.) E maua ne tatou i te Tusi Tapu a pogai e uke ke tali‵tonu ei tatou ki aso mai mua! E iloa ne tatou me e “puipui ne Ieova a tino fakamaoni.” (Sala. 31:23) A tino katoa kolā e a‵lofa kae ‵viki atu ki a Ieova ka fia‵fia ke lavea ne latou me e fakamaluga ne ia tena igoa tapu.—Eseki. 38:23.

19. Se a te fakamoemoega gali e faka‵tali mai mō tatou i aso mai mua nei?

¹⁹ Mafaufau la ki te auala ka ‵fuli i ei a pati kolā ne siki mai i te 2 Timoteo 3:2-5 māfai ko fakamatala mai ei a faifaiga mo amioga a tino i te lalolagi fou kolā ka se toe ‵nofo mai lalo i te pulega a Satani. (Ke onoono ki te pokisi “ Faifaiga mo Amioga a Tino i Aso Mai Mua.”) Ne fakamatala mai ne te Taina ko George Gangas, * telā ne tavini atu e pelā me se sui o te Potukau Pule a te tulaga tenā, penei: “Ka fai eiloa a te lalolagi i te taimi tenā e pelā me se koga gali māfai ko fai a tino katoa e pelā me ne taina io me ne tuagane! Ko pili nei o maua ne tatou a te tauliaga ke ola i te lalolagi fou. Ka tumau eiloa koe i te ola e pelā eiloa mo Ieova e tumau i te ola. Ka ola tatou ki te se-gata-mai.” Mafaga o fakamoemoega gali tenā!