1. Se a te uiga gali e lavea ne tatou i tino o Ieova?

KO LEVA ne ‵valo mai i te Tusi Tapu me i tino o te Atua ka “loto fia‵fia o ofo atu a latou eiloa” o tavini atu ki a Ieova mai lalo i te takitakiga a tena Tama. (Sala. 110:3) Ko taunu eiloa te valoaga tenā i aso nei. I tausaga takitasi, e fakamāumāu ne tavini loto finafinau a Ieova a te fia miliona o itula ki te galuega talai. E fai ne latou te mea tenā e aunoa mo se ‵togi kae e fakaaoga foki olotou tupe totino. E fakaaoga foki olotou taimi ke fesoasoani atu ki olotou taina tali‵tonu i te feitu faka-te-foitino, feitu tau lagonaga, mo te feitu faka-te-agaga. E uke foki a taimi e fakamāumāu ne taina tofia ke fakatoka olotou tofiga i fakatasiga mo te asi atu e pelā me ne tausi mamoe ki olotou taina tali‵tonu. Se a te pogai tonu e fai ei ne latou a galuega katoa konei? Ko te alofa—te alofa ki a Ieova mo te alofa ki tuakoi.—Mata. 22:37-39.

2. E ‵tusa mo te Loma 15:1-3, se a te fakaakoakoga ne tuku mai ne Iesu?

² Ne tuku mai ne Iesu se fakaakoakoga tu ‵kese ki te fakamuamua o manakoga o nisi tino i lō ana manakoga. E taumafai malosi tatou ke tau‵tali i ana kalafaga. (Faitau te Loma 15:1-3.) A tino kolā e fakaakoako ki a ia, ka maua ne latou a mea aoga. Ne fai mai a Iesu: “E sili atu te fiafia o te tino telā e tuku atu ana mea i lō te maua ne ia.”—Galu. 20:35.

3. Ne a mea ka mafau‵fau tatou ki ei i te mataupu tenei?

³ I te mataupu tenei, ka mafau‵fau tatou ki nisi mea ne fai ne Iesu ke fesoasoani atu ki nisi tino mo te auala ke fakaakoako  ki a ia. Ka sau‵tala foki tatou ki te auala ke momea aka te lasi o te ‵tou loto fia‵fia o tavini atu ki nisi tino.

4. Ne fakamuamua pefea ne Iesu a manakoga o nisi tino i lō ana manakoga?

⁴Ne fesoasoani a Iesu ki nisi tino faitalia me ne fi‵ta a ia. Mafaufau ki te auala ne saga atu a Iesu ki se vaitino telā ne fakafetaui atu ki a ia i se feitu mauga, kāti i tafa o Kapanaumi. Ne ‵talo a Iesu i te po kātoa. Kāti ne fi‵ta malosi a ia kae i te laveaga ne ia te vaitino, ne alofa a ia ki tino ma‵tiva kae ma‵saki i a latou. Ne seki faka‵lei fua ne ia latou, kae ne fai atu foki ne ia te ‵toe lāuga fakamalosi loto i lāuga katoa—ko te Lāuga i luga i te Mauga.—Luka 6:12-20.

5. E fakaakoako atu pefea a ulu o kāiga ki a Iesu māfai ko fi‵ta latou?

⁵Te auala e fakaakoako atu a ulu o kāiga ki a Iesu. Mafaufau ki te tulaga tenei: I te fakaotiga o se aso leva ‵ki i te galuega, ko oko atu te ulu o te kāiga ki te fale, kae ko fi‵ta valevale a ia. E tiga eiloa ne tofotofogina a ia ke taofi te lotou tapuakiga a kāiga i te afiafi tenā, kae ne ‵talo a ia ki a Ieova ke tuku atu te malosi ke fai te lotou akoga. Ne tali eiloa ne Ieova tena ‵talo kae ne fai eiloa te lotou sukesukega e pelā mo te masani. Ne tauloto ne tama‵liki se akoakoga tāua i te afiafi tenā, me i olotou mātua e fakamuamua faeloa ne lāua a mea faka-te-agaga i lō nisi mea.

6. Taku mai se fakaakoakoga ki te auala ne loto fiafia a Iesu o fesoasoani atu i so se taimi.

⁶Ne loto fiafia Iesu o fesoasoani atu ki nisi tino i so se taimi. E mafai o fakaataata ne koe i tou mafaufau a lagonaga o Iesu i te taimi ne iloa ne ia me i tena taugasoa ko Ioane te Papatiso ko oti ne tamate? Kāti ne fanoanoa malosi a Iesu. E fai mai te Tusi Tapu: “I te lagonaga ne Iesu a te mea tenei [te mate o Ioane], fano ei a ia i te pōti ke ‵mao atu kea‵tea mai i a latou.” (Mata. 14:10-13) E malamalama tatou i te pogai ne fia nofo tokotasi ei a ia. E ma‵nako a nisi tino ke ‵nofo atu i a latou eiloa māfai ko fanoa‵noa. Kae ne seki mafai o fai penā a Iesu. Ne oko muamua atu se vaitino ki te koga ‵mao tenā, i lō Iesu. Ne saga atu pefea a Iesu ki ei? Ne mafaufau a ia ki manakoga o te vaitino, kae “ne  alofa malosi” a ia ki a latou. Ne lavea ne ia a te lasi o te lotou ma‵nako ki fakamalosiga faka-te-agaga, kae ne fakataunu fakavave aka ne ia te manakoga tenā. Tenā, “ne kamata o akoako atu ne ia [e se ne nai mea fua, kae ko] mea e uke.”—Male. 6:31-34; Luka 9:10, 11.

7-8. Tuku mai se fakaakoakoga e fakaasi atu ei a te auala e fakaakoako a toeaina a‵lofa ki a Iesu māfai e manakogina ne se tino a te fesoasoani.

⁷Te auala e fakaakoako atu a toeaina a‵lofa ki a Iesu. E loto fakafetai eiloa tatou ki galuega e fai ne ‵tou toeaina mō tatou! A te ukega o galuega konā e se lavea ne tino i te fakapotopotoga. Kafai ko tupu se fakalavelave fakafuasei, e olo fakavave atu a te Komiti Fesokotaki mo Fa‵kaimasaki o fesoasoani ki olotou taina tali‵tonu. E masani o ‵tupu a vaegā fakalavelave penā i te valuapo! Kae ona ko te lotou a‵lofa atafai ki te lotou taina io me ko te tuagane, e fakamuamua ne toeaina a‵lofa konā mo olotou kāiga a manakoga o olotou taina tali‵tonu i lō latou.

⁸ E fesoasoani atu foki a toeaina ki te faitega o Fale Tapuaki mo nisi fale, e pelā foki mo galuega fesoasoani mō fakalavelave ‵tupu. Kae penā foki te fia o itula e fakaaoga ne toeaina i ‵tou fakapotopotoga ki te akoako, fakamalosi, kae ‵lago mai ki a tatou. E ‵tau eiloa o fakamālō atu tatou ki taina konei mo olotou kāiga. Ke fakamanuia eiloa ne Ieova te lotou uiga tenā! E tonu, e ‵tau foki mo toeaina o paleni ‵lei i olotou mea e fai e pelā eiloa mo nisi tino. E se ‵tau o tō uke olotou taimi e fakamāumāu ki mea faka-te-agaga kae ko se fia ‵saga atu ki olotou kāiga.

9. E ‵tusa mo te Filipi 2:4, 5, se a te kilokiloga e ‵tau o maua ne Kelisiano katoa?

⁹ Faitau te Filipi 2:4, 5. E tonu, a tatou katoa e se ne toeaina, kae e mafai ne tatou katoa o fakaakoako ki te loto fia fesoasoani o Iesu. E fai mai te Tusi Tapu me i a ia ne “fai mo fai se pologa.” (Fili. 2:7) Mafaufau ki mea e tauloto ne tatou mai i pati konā. A te tavini, io me ko te pologa tāua, ka ‵sala ki so se avanoaga ke fakafiafia tena matai. E pelā me ko te tavini a Ieova mo te pologa a ou taina, e mautinoa me e manako koe ke aoga malosi koe ki a Ieova mo ou taina tali‵tonu. E mafai o fai koe penā mai te mafaufau faka‵lei ki manatu konei.

10. Ne a fesili e ‵tau o ‵sili ifo ne tatou?

¹⁰Iloilo aka tau kilokiloga. Ke fesili ifo penei: ‘E pefea te lasi o toku loto fiafia o fesoasoani atu ki nisi tino? Ka saga atu pefea au, māfai ko fakamolemole mai ke asi atu ki se taina matua i se koga tausi tino ma‵tua io me avatu se tuagane matua ki fakatasiga? E mata, e toka au o fesoasoani fakavave atu māfai e manakogina ke ‵fulu te koga ne fai ei te fono io me ke faite a koga ma‵sei o te Fale Tapuaki?’ E fiafia eiloa a Ieova māfai e tuku atu ne tatou e aunoa mo te alofa sē fakapito a ‵tou taimi mo kope—mea katoa kolā ne tukugina atu ki a ia—ke fesoasoani ki nisi tino. Kafai e manakogina ke momea aka te ‵lei o tatou i nisi feitu, ne a ‵tou mea e ‵tau o fai?

11. E fesoasoani mai pefea a ‵talo ke ati aka ne tatou te loto fia fesoasoani?

¹¹‵Talo malosi ki a Ieova. Kāti ko iloa ne koe a nisi feitu e manakogina ke momea aka tou ‵lei i ei, kae e se manako koe ke fai a ‵fuliga. Kafai e penā loa, ke ‵talo malosi atu ki a Ieova. Taku atu te mea tonu ki a ia. Fai atu ki a Ieova ou lagonaga, kae akai atu ke maua “te fiafia mo te ‵mana ke galue” koe.—Fili. 2:13.

12. E mafai pefea o fesoasoani atu se taina talavou papatiso ki te fakapotopotoga?

¹² Kafai koe se taina talavou papatiso, fakamolemole ki a Ieova ke ati aka se manakoga fia fesoasoani atu i te fakapotopotoga. I nisi fenua, e tokouke atu a toeaina i tavini fesoasoani, kae ko te tokoukega i a latou ko tai ma‵tua eiloa. I te taimi e gasolo aka ei o tokouke a tino i te fakapotopotoga saukātoa, e manakogina te fesoasoani o taina talavou e tokouke ke tausi atu ki tino o Ieova. Kafai e loto fiafia koe o tavini atu i so se auala, ka fiafia eiloa koe. Kaia? Me ka fakafiafia ne koe a Ieova, ka maua ne koe se ata ‵lei, mo te lotomalie telā e maua māfai e fesoasoani atu ki nisi tino.

13-14. Ne a fesoasoani aoga e mafai o fai ne tatou mō ‵tou taina mo tuagane? (Onoono ki te ata i te ‵kava.)

¹³Ke matapulapula ki manakoga o nisi tino. Ne fakamalosi atu te apositolo ko Paulo ki Kelisiano i Epelu: “Ke mo a ma puli o fai a mea ‵lei kae tufa atu a mea kolā ko maua ne koutou ki nisi tino, me i te Atua e fiafia malosi ki vaegā taulaga penā.” (Epe. 13:16) Ko oko eiloa i te aoga o te manatu fesoasoani tenā! Mai tua malie o te mauaga o te tusi tenei, ne ‵tau mo Kelisiano i Iutaia o tiaki olotou fale, pisinisi, mo olotou kāiga sē tali‵tonu kae “kamata o ‵tele ki luga i mauga.” (Mata. 24:16) I te taimi tenā, e mautinoa me ne manakogina ke fakatau fesoasoani latou. Kafai ne fakagalue muamua ne latou a te manatu fesoasoani o Paulo ke fakatau tufa atu olotou mea, penei ko faigofie atu ke ola latou e aunoa mo mea e uke i te koga fou tenā.

¹⁴ E se fai mai faeloa ne ‵tou taina mo tuagane a mea kolā e ma‵nako latou ki ei. E pelā loa mo se tuagane telā ko mate atu kae ‵toe  mai fua tena avaga loto fanoanoa. E mata, e manako te ‵tou taina ki se fesoasoani i te kukaga o meakai, se mea fakateletele, io me ko galuega i te fale? Kāti ka se fai mai ne ia i te mea ma fakalavelave mai a ia ki tatou. Kae kāti ka loto fakafetai eiloa a ia māfai e ga‵sue muamua tatou o fesoasoani atu ki a ia. E se ‵tau o fakaiku aka me e isi se tino e fesoasoani atu ki a ia io me faka‵tali tatou ke fakailoa mai ne te taina a te mea e manako a ia ki ei. Fesili ifo ki a koe, ‘Moi fai ko au tenā, se a te fesoasoani ka loto fakafetai malosi au ki ei?’

15. Se a te mea e ‵tau o fai ne tatou māfai e fia fesoasoani atu tatou ki nisi tino?

¹⁵Fai ke se ma‵taku a tino i a koe. E mautinoa me e iloa ne koe a taina mo tuagane i tau fakapotopotoga kolā e toka faeloa o fesoasoani ki nisi tino. E faigata o fai ne latou ke mafau‵fau tatou me e fakalave‵lave atu tatou ki a latou. E iloa ne tatou me e mafai o faka‵na tatou ki a latou i so se taimi, kae e fia fai foki eiloa tatou pelā mo latou! Ne manako a Alan, se toeaina telā ko 40 tupu ana tausaga, ke se ma‵taku a tino i a ia. Mai te mafaufau ki te fakaakoakoga a Iesu, ne fai mai a Alan: “Ne fakalavelave faeloa a Iesu, kae ne olo atu ki a ia a tino mai tupulaga kese‵kese kae se ma‵taku ke fakamolemole atu mō tena fesoasoani. Ne ‵kilo atu latou ki a ia e pelā me se tagata telā e atafai malosi atu ki a latou. E manako malosi au ke fakaasi atu te uiga tenā o Iesu, kae ke lauiloa e pelā me se tino e se ma‵taku a tino i ei, e alofa, kae atafai.”

16. E fesoasoani mai pefea te Salamo 119:59, 60 ke fakaakoako faka‵lei atu tatou ki a Iesu?

¹⁶ E se ‵tau o loto vāi‵vai tatou māfai e se mafai o fakaakoako faka‵lei tatou ki a Iesu. (Iako. 3:2) E se mafai o ‵pau katoatoa a te ata a se tamaliki ‵lomi ata mo te ata a tena  faiakoga. Kae kafai e tauloto a te tamaliki mai i ana mea ‵se, kae taumafai o fakaakoako faka‵lei atu ki tena faiakoga, ka gasolo aka faeloa o ‵lei a ia. E penā foki loa, kafai e fakagalue ne tatou a ‵tou mea ne tauloto e auala i sukesukega totino, kae fai te ‵toe mea e mafai ke faka‵tonu aka so se mea ‵se, ka mafai eiloa o manuia tatou i te fakaakoako atu ki a Iesu.—Faitau te Salamo 119:59, 60.

17-18. Kafai e fakaakoako tatou ki te loto fia fesoasoani o Iesu, ne a mea aoga ka maua mai i ei?

¹⁷ A te ‵tou loto fia fesoasoani e mafai o fakamalosi ki nisi tino ke fai foki penā. Ne fai mai te toeaina ko Tim: “E isi ne motou taina talavou kolā ne gasolo ki mua kae ne ‵tofi aka ke fai pelā mo tavini fesoasoani—nisi o latou koi fo‵liki—e tasi te pogai me ne fakaakoako latou ki te loto fia fesoasoani ne lavea ne latou i nisi tino. Ne fesoasoani eiloa a taina konei mo te alofa sē fakapito ki te motou fakapotopotoga kae ‵lago malosi atu ki toeaina.”

¹⁸ Ko ola tatou i se lalolagi telā ko ‵fonu i te uiga kaimanako. Kae tu ‵kese eiloa a tino o Ieova. Ne otia eiloa tatou i te loto fia fesoasoani o Iesu kae ma‵nako tatou o fakaakoako ki a ia. Ikai, e se mafai o fakaakoako atu tatou i se auala ‵lei katoatoa ki a ia, kae e mafai ne tatou o “tau‵tali fakapili‵pili atu i ana kalafaga.” (1 Pe. 2:21) Kafai e taumafai malosi tatou ke fakaakoako atu ki te loto fia fesoasoani o Iesu, ka fia‵fia eiloa tatou i te taimi ko maua ei te taliaga a Ieova.