1. Kaia ko tu ‵kese ei te taimi ko ola nei tatou i ei?

KO OLA nei tatou i te vaitaimi telā ko oko eiloa i te tu ‵kese. E pelā mo te mea ne ‵valo mai i te Tusi Tapu, ko fakamaopoopo nei ne Ieova “se vaitino e tokouke . . . mai i atufenua mo matakāiga mo tino mo ‵gana katoa.” A tino kolā e fakamaopoopo mai e aofia i ei se “atufenua malosi” o tino fia‵fia e sili atu mo te toko valu miliona kolā “e fai ne latou te taviniga tapu ki [te Atua] i te ao mo te po.” (Faka. 7:9, 15; Isa. 60:22) E seki ai eiloa se taimi i aso mua ke tokouke penei a tino e a‵lofa ki te Atua mo olotou taina tapuaki.

2. Se a te vaegā alofa e maua ne tino kolā e ‵vae kea‵tea mo te Atua? (Onoono ki te ata i te kamataga.)

² Kae ne ‵valo mai foki i Tusi Tapu me i ‵tou aso nei, ko ‵kese ‵ki eiloa te alofa—se vaega o te alofa kaimanako—telā e maua ne tino kolā e ‵vae kea‵tea mo te Atua. Ne tusi mai te apositolo ko Paulo: “I aso fakaoti . . . , tino ka a‵lofa fua ki a latou eiloa, fia‵fai tupe, . . . e va‵lea ki fakafiafiaga i lō te a‵lofa ki te Atua.” (2 Timo. 3:1-4) A te vaegā alofa tenei e se fetaui mo te alofa faka-Kelisiano; e ‵teke ki ei. A te kausaki atu ki te alofa kaimanako e se maua i ei ne tino a te fiafia telā e ma‵nako  latou ki ei. E tonu, e fakamalosi aka ne te vaegā alofa tenā se lalolagi kaimanako telā ko oko eiloa i te “faigata.”

3. Se a te mea ka iloilo ne tatou i te mataupu tenei, kae kaia?

³ Ne iloa ne Paulo me ko salalau valevale a te uiga ko te alofa kaimanako kae fakamataku te mea tenā ki Kelisiano. Tenā ne fakailoa atu ei a ia ke “‵kalo kea‵tea” mai tino kolā e fakaasi atu te vaegā alofa sē tonu penā. (2 Timo. 3:5) Kae e se mafai ‵kalo katoatoa kea‵tea tatou mai vaegā tino penā. Tela la, e mafai pefea o ‵kalo kea‵tea tatou mai faifaiga faka-te-lalolagi i ‵tou tafa kae kausaki atu ke fakafiafia a Ieova, te Atua o te alofa? Ke onoono nei tatou ki te ‵kese o te alofa ki te atua mo te alofa e fakamatala mai i te 2 Timoteo 3:2-4. A te faiga penā ka fesoasoani mai ke iloa ne tatou o fua aka kae toe fakamalosi aka a te alofa telā e ‵tau o fakaasi atu ne tatou, ko te alofa telā e maua mai ei te lotomalie mo te fiafia tonu.

4. Kaia e se masei ei ke isi se alofa paleni o te tino ki a ia eiloa?

⁴ “I tino ka a‵lofa fua ki a latou eiloa,” ko pati ne tusi mai ne te apositolo. E mata, se mea masei ke a‵lofa tatou ki a tatou eiloa? Ikai, se mea masani, se mea ‵tau ke isi se alofa o te tino ki a ia eiloa. Ne faite ne Ieova tatou penā. Muna a Iesu: “E ‵tau mo koe o alofa ki tou tuakoi e pelā mo koe ki a koe eiloa.” (Male. 12:31) Kafai e se a‵lofa tatou ki a tatou eiloa, e se mafai o a‵lofa tatou ki ‵tou tuakoi. E fai‵tau foki tatou i te Tusi Tapu: “E ‵tau . . . o a‵lofa a tāgata a‵vaga ki olotou avaga e pelā eiloa me ko olotou foitino ‵tonu. A te tagata telā e alofa ki tena avaga e alofa ki a ia eiloa, me e seai se tagata kai takalialia ki tena foitino eiloa, e fagai kae e fakapelepele ne ia.” (Efe. 5:28, 29) Tela la, se mea ‵lei ke alofa a te tino ki a ia eiloa.

5. E fakamatala mai pefea ne koe a tino kolā ko tō fakatāua ne latou a latou eiloa?

⁵ A te alofa o te tino ki a ia eiloa telā e taku mai i te 2 Timoteo 3:2 e sē se alofa masani telā e ‵lei. A te mea tenei se alofa sē tonu, ko te alofa kaimanako. A tino kolā e a‵lofa ki a latou eiloa e fakatāua malosi ne latou a latou eiloa i lō nisi tino. (Faitau te Loma 12:3.) A te mea telā e manavase malosi latou ki ei i te olaga ko latou eiloa. E se fia ‵saga atu latou ki nisi tino. Kafai ko tupu se fakalavelave, e taumafai latou o ‵losi atu ki nisi tino i lō te talia ne latou te mea ‵se. E fakatusa ne se tusi faka-te-Tusi Tapu e tasi a tino kolā e a‵lofa ki a latou eiloa ki te manu ko ‘te hedgehog telā e pelu a ia ke pukupuku pelā me se pōlo, ko te mea ke mafanafana a ia i ana fulufulu kae tuku faka‵sau atu ana mea makaikai ki nisi mea.’ A vaegā tino kaima‵nako penei e se maua te fiafia tonu.

6. Ne a ikuga e maua mai i te alofa ki te Atua?

⁶ E fai mai a tino ‵poto i te Tusi Tapu me i te alofa o te tino ki a ia eiloa e tafa ki luga i te fakasologa a Paulo ki uiga sē ‵lei kolā ka salalau atu i aso fakaoti me e māfua mai i ei a nisi uiga aka. E ‵kese mai i ei, a tino kolā e a‵lofa ki te Atua e ‵fua mai i a latou se vaegā fuataga fakaa‵tea. E soko tasi ne te Tusi Tapu a te alofa ki te Atua mo te fiafia, te filemu, te kufaki, te atafai, te aga‵lei, te fakatuanaki, te agamalu, mo te loto pulea. (Kala. 5:22, 23) “E fia‵fia a tino kolā e fai a Ieova mo olotou Atua!” ko pati ne tusi mai ne te faisalamo. (Sala. 144:15) A Ieova se Atua fiafia, kae e fakaata mai ne ana tino te uiga tenā. E se gata i ei, e ‵kese mo tino kolā e a‵lofa ki a latou eiloa kae e fia‵fia fua ke maua ne latou a mea, a tavini a Ieova e fia‵fia ke tuku atu olotou mea mō te ‵lei o nisi tino.—Galu. 20:35.

7. Ne a fesili ka fesoasoani mai ke iloilo aka ne tatou te ‵tou a‵lofa ki te Atua?

⁷ E mafai o iloa aka pefea ne tatou me ko lasi atu te ‵tou a‵lofa ki a tatou eiloa i lō te alofa ki te Atua? Mafau‵fau ki te fakamalosiga e maua i te Filipi 2:3, 4: “Ke se fai ne koutou se mea i te loto fakatautau io me ko te fia takutakua, kae i te loto maulalo mo te manatu me e tāua atu a nisi tino i a koutou, ke se onoono fua koutou ki mea e ‵lei ei koutou kae ki mea foki e ‵lei ei a nisi tino.” E mafai  o fesili ifo tatou: ‘E mata, e fakagalue ne au te fakatakitakiga tenei i toku olaga? E mata, e manako tonu au ke fai ne au te loto o te Atua? E mata, e taumafai au o fesoasoani atu ki nisi tino, i loto i te fakapotopotoga mo te galuega talai?’ E se faigofie ke tuku atu ne tatou a tatou eiloa. E manakogina i ei a taumafaiga e uke mo te taliaga o mea faiga‵ta. Kae se a te suā mea e mafai o fakafiafia mai ki a tatou māfai ko iloa ne tatou me ko maua ne tatou te taliaga a te Pule Sili o te iunivesi?

8. Ne a mea ko oti ne fai ne nisi tino ona ko te lotou a‵lofa ki te Atua?

⁸ Ne fakamalosi aka a nisi tino ne te lotou a‵lofa ki te Atua ke tiaki olotou galuega ‵togi ‵lei ko te mea ke mafai o tavini faka‵lei atu latou ki a Ieova. A Ericka telā e nofo i te Iunaite Sitete, se tokita. Kae i lō te kausaki malosi atu ke maua sena tulaga maluga i mea tau tokita, ne fai a ia pelā me se paenia tumau kae ne tavini atu lāua mo tena avaga i fenua e uke. Mai te mafaufau ki taimi ko ‵teka, ne fai mai tou fafine: “A tala ‵gali e uke e uiga ki te fesoasoani atu o talai i se isi ‵gana, fakatasi mo taugasoa e uke ne fai ne māua, ne fakamalosi mai eiloa ki a māua. Koi galue eiloa au pelā me se tokita, kae ona ko te fakaaoga faka‵lei ne au oku taimi mo toku malosi ke fesoasoani atu o faka‵lei a tino i te feitu faka-te-agaga kae ke tausi atu foki ki manakoga o te fakapotopotoga, ne maua ei ne au te fiafia tonu mai te loto fakatasi mo te lotomalie tonu.”

9. Kaia e se maua ei te fiafia tonu i te fiafai tupe?

⁹ Ne tusi mai a Paulo me i tino ka “fia‵fai tupe.” I nai tausaga ko ‵teka ne faipati atu se paenia i Ireland ki se tagata e uiga ki te Atua. Ne tapale aka ne te tagata tenā a tena pausi tupe, tapale mai a tupe pepa mai loto i ei, sau aka ki luga, kae faipati atu mo te fakamatamata: “Tenei toku atua!” E ui eiloa e se mafai ne tino e tokouke o fakaasi ‵tonu mai te mea tenei, kae ko ‵fonu eiloa te lalolagi i tino kolā e fia‵fai tupe mo mea kolā e mafai o ‵togi ki ei. Kae e polopoloki mai te Tusi Tapu: “A te tino e fiafai ki siliva ka se mafai o lotomalie ki siliva, penā foki loa te tino e fiafai ki koloa kae e isi sena peofuga e maua sāle.” (Fai. 5:10) A vaegā tino penā ka ma‵nako faeloa ki tupe e uke atu, kae mai te kausaki malosi atu ki ei, e aumai fua ne latou a “logo‵maega e uke” ki a latou eiloa.—1 Timo. 6:9, 10.

10. Ne a pati ne tusi mai ne te Tupu ko Solomona e uiga ki te maumea mo te mativa?

¹⁰ E tonu, e ma‵nako katoa tatou ki tupe. E maua ne tatou se puipuiga mai i ei. (Fai. 7:12) Kae e mata, e mafai o fiafia se tino māfai e lava eiloa ana tupe mo ‵togi a mea e manakogina? Ao! (Faitau te Failauga 5:12.) Ne tusi mai te Tupu ko Solomona: “Sa tuku mai ki a au a te mativa io me ko te maumea. Talia mai fua ke kai ne au aku meakai.” E mafai o malamalama tatou i te pogai e se manako ei ke mativa malosi a ia. E pelā mo ana fakamatalaga ne fai mai, ne seki manako a ia ke tofotofogina ke kaisoa me i te Atua e se fiafia ki te kaisoa. Kae kaia ne ‵talo ei a ia ke mo a ma maumea? Ne tusi mai a ia: “Ko te mea ke mo a ma makona au kae fakafiti ne au a koe kae fai aka, ‘Ko oi a Ieova?’” (Faata. 30:8, 9) Kāti e iloa ne koe ne tino kolā e tali‵tonu malosi ki olotou koloa i lō te Atua.

11. Ne a pati polopoloki ne fai mai ne Iesu e uiga ki tupe?

¹¹ A tino kolā e fia‵fai ki tupe e se mafai o fakafiafia ne latou te Atua. Muna a Iesu: “E seai se tino e mafai o tavini ki matai e tokolua; me ka takalialia a ia ki te tino e tokotasi kae alofa ki te suā tino, io me ka ‵piki a ia ki te tino e tokotasi kae e se fiafia ki te suā tino. E se mafai o tavini koutou ki te Atua fakatasi mo Koloa.” Ne kamata ne ia ana pati konā mai te fai atu: “Ko lava te fakaputu o koloa mō koutou i te lalolagi nei, me e oko ki ei a mogamoga mo te pala kae oko foki ki ei a tino o kaisoa ne latou. Kae fakaputu ne otou koloa i te lagi, me e se oko ki ei a mogamoga mo te pala kae e se oko foki ki ei a tino o kaisoa ne latou.”—Mata. 6:19, 20, 24.

12. E fakafaigofie aka pefea ne te ola i se olaga faigofie a te tavini atu ki te Atua? Taku mai se fakaakoakoga.

 ¹² Ko oti ne iloa ne tino e tokouke me i te ola i se olaga faigofie e se fai fua i ei ko latou ke fia‵fia malosi kae maua foki i ei ne latou a taimi e uke ke tavini atu ki a Ieova. A Jack, telā e nofo i te Iunaite Sitete, ne ‵togi ki tua tena fale lasi mo tena pisinisi me iloa ne ia me mai te faiga penā ka mafai ei o paenia a ia fakatasi mo tena avaga. Ne fai mai a ia: “Ne faigata ke tiaki ne māua te mā fale gali mo te mā manafa i te vao. Kae mō se fia tausaga, ne vau faeloa au ki te fale mo te kaitaua ona ko fakalavelave i te galuega. A taku avaga, telā se paenia tumau, ne fiafia faeloa. E fai mai sāle tou fafine, ‘A toku pule ko te ‵toe pule gali eiloa!’ Nei la, ko paenia foki au, ko ga‵lue fakatasi māua mō te Tino e tokotasi ko Ieova.”

13. E mafai pefea o iloilo aka ne tatou te ‵tou kilokiloga ki tupe?

¹³ Ke iloilo aka ‵tou kilokiloga ki tupe, e mafai o mafau‵fau faka‵lei tatou ki te auala ka tali aka ei mo te fakamaoni ne tatou a fesili konei: ‘E mata, e talitonu eiloa au kae ola foki au e ‵tusa mo pati a te Tusi Tapu e uiga ki tupe? E mata, e fakamuamua ne au te mauaga o tupe i toku olaga? E mata, e fakatāua malosi atu ne au a kope faka-te-foitino i lō toku fesokotakiga mo Ieova pelā foki mo tino? E mata, e talitonu katoatoa au me ka tausi mai a Ieova ki oku manakoga?’ E mafai o mautinoa i a tatou me ka se fakafanoanoa eiloa ne ia a tino kolā fakamoe‵moe ki a ia.—Mata. 6:33.

14. Se a te kilokiloga ‵lei e ‵tau o maua ki fakafiafiaga?

¹⁴ A aso fakaoti ka ‵fonu eiloa i tino kolā e “va‵lea ki fakafiafiaga.” E seai se fakalavelave māfai e maua se kilokiloga paleni ki fakafiafiaga e pelā eiloa mo te seai o se fakalavelave māfai e maua se kilokiloga ‵lei ki a koe eiloa pelā foki mo tupe. E se manako a Ieova ke ola tatou i se olaga fakataputapu io me ke ‵kalo katoatoa kea‵tea mai fakafiafiaga ‵lei kolā e maua mai ei te fiafia. E fakamalosi mai te Tusi Tapu ki tino fakamaoni: “Fano, kai au meakai mo te fiafia kae inu au uaina mo te loto fiafia.”—Fai. 9:7.

15. Ne a vaegā fakafiafiaga e fakasino ki ei te 2 Timoteo 3:4?

 ¹⁵ E fakasino atu a te lua Timoteo 3:4 ki te ‵sala atu ki fakafiafiaga kolā e se aofia i ei te Atua. Masaua la, me e se fai mai te fuaiupu tenā me i tino ka fia‵fia ki fakafiafiaga i tafa o te Atua, ke fakasino mai ei me koi isi eiloa se alofa o latou ki a ia. E fai mai penei ‘i lō te Atua.’ Ne tusi mai se tino poto penei: “E se fakauiga a te [fuaiupu] tenei me e a‵lofa foki latou ki te Atua. E fakauiga i ei me e se a‵lofa eiloa latou ki te Atua.” Ko oko eiloa i te tāua o te fakamasauaga tenei ki tino kolā e fakamalosi aka ne latou te lotou a‵lofa malosi ki fakafiafiaga! A te tugapati “va‵lea ki fakafiafiaga” e fakamatala faka‵lei mai i ei a tino kolā ko “‵saga atu ki . . . fakafiafiaga o te olaga tenei.”—Luka 8:14.

16, 17. Se a te fakaakoakoga ne tuku mai ne Iesu e uiga ki fakafiafiaga?

¹⁶ Ne fakaasi mai ne Iesu te kilokiloga paleni kae ‵lei katoatoa e uiga ki fakafiafiaga. Ne kau atu a ia ki se “‵kaiga o te avaga” mo se “‵kaiga lasi.” (Ioa. 2:1-10; Luka 5:29) I te avaga, ne ‵fuli ne ia fakavavega a vai ki uaina, ke fakaopoopo atu a uaina me ko se lava. Kae i te suā taimi, ne ‵teke atu a ia ki te kilokiloga a tino fia amio‵tonu kolā ne taku fakamasei ne latou a ia i a ia ne kai kae inu.—Luka 7:33-36.

¹⁷ Kae ne seki aofia malosi a Iesu i se olaga e ‵fonu i fakafiafiaga. Ne fakamuamua ne ia a Ieova kae galue malosi a ia o fesoasoani atu ki nisi tino. Ko te mea ke mafai o ola a tino e tokouke, ne loto fiafia a ia ke kufaki te mate fakalogo‵mae i luga i se pou. I ana pati ki tino kolā ka tautali i ana kalafaga, ne fai atu Iesu: “E fia‵fia koutou māfai e fakatauemu kae fakasauagina koutou ne tino, kae ‵losi atu a vaegā mea ma‵sei katoa ki a koutou ona ko au. Ke fia‵fia kae ‵lifu, me i te otou taui e lasi ‵ki i te lagi, me ne penā foki o fakasaua ne latou a pelofeta kolā ne ‵mua atu i a koutou.”—Mata. 5:11, 12.

18. Ne a fesili ka fesoasoani mai ke iloilo aka ne tatou te lasi o te ‵tou a‵lofa ki fakafiafiaga?

¹⁸ E iloilo aka pefea ne tatou te lasi o ‵tou a‵lofa ki fakafiafiaga? Se mea ‵lei ke fesili ki a tatou eiloa: ‘E mata, e tulaga lua a fakatasiga mo te galuega talai ki fakafiafiaga? E mata, e loto fiafia au o ola i se olaga fakataputapu me manako au o tavini atu ki te Atua? I te ‵sala atu ki fakafiafiaga, e mata, e mafaufau au me se a te kilokiloga a Ieova ki te filifiliga ka fai ne au?’ Kafai e a‵lofa tonu tatou ki te Atua, ka fakaeteete eiloa tatou kae ‵kalo kea‵tea mai mea kolā e iloa ne tatou me e se fiafia a ia ki ei e penā foki loa mo mea kolā e mafau‵fau tatou me kāti ka se fiafia a ia ki ei.—Faitau te Mataio 22:37, 38.

19. Ko oi a tino kolā e se mafai o maua ne latou te fiafia tonu?

¹⁹ Mai tua o se 6,000 tausaga ne logo‵mae ei a tino, ko pilipili atu eiloa te lalolagi a Satani ki tena gataga. Ko ‵fonu te lalolagi i tino kolā e a‵lofa malosi ki a latou eiloa, tupe mo fakafiafiaga. Ko tino kolā e ma‵nako malosi ki mea e mafai o maua ne latou, ko tino kolā e fakatāua ne latou i te lotou olaga olotou manakoga totino. A vaegā tino penā e se mafai eiloa o fia‵fia. Kae pelā mo pati a te faisalamo ne tusi mai: “E fiafia a te tino telā e fai ne ia a te Atua o Iakopo mo fai tena fesoasoani, telā e fakamoemoe ki a Ieova tena Atua.”—Sala. 146:5.

20. Ne maua pefea ne koe te fiafia ona ko te alofa ki te Atua?

²⁰ A te alofa ki te Atua e malosi eiloa i tino o Ieova, kae gasolo faeloa o tokouke ‵tou tino i tausaga takitasi. A te mea tenei se fakamaoniga me ko pule mai te Malo o te Atua kae ko pili o fakaoko mai ne ia ki te lalolagi nei a fakamanuiaga fakaofoofogia. A te fiafia tonu kae tumau e maua mai te faiga o te loto o te Atua, kae māfai foki e iloa ne tatou me fakafiafia ne tatou a te Atua Sili. Kae ko tino kolā e a‵lofa ki a Ieova ka fia‵fia ki te se-gata-mai! I te suā mataupu ka sautala tatou ki nisi uiga kolā e māfua mai i te alofa kaimanako ka onoono tatou ki auala e ‵kese i ei mo uiga kolā e maua i tavini a Ieova.