1, 2. Se a te ‵toe fakatasiga fakaofoofogia telā ka ‵kau fakatasi i ei a tino i te 2018, kae kaia? (Onoono ki te ata i te kamataga.)

I A Mati 31, 2018, i te taimi ko kamata ei o tō te mata o te la, ka maopoopo a tino o te Atua fakatasi mo tino fia‵fia e tokouke o fakamanatu a te ‵Kaiga a te Aliki i te Afiafi. Kafai ko tō te mata o te la, ka maopoopo a te fia miliona o tino ki te Fakamanatuga o te mate o Keliso. I tausaga takitasi, e fai faeloa a te fakamanatuga tenei e pelā me ko te ‵toe fakatasiga fakaofoofogia ona ko te ‵kau fakatasi o tino i luga i te paneta tenei ko te Lalolagi!

² E mafai eiloa o fakaataata ne tatou i ‵tou mafaufau a te fia‵fia o Ieova mo Iesu i te ‵kilo mai ki te fia miliona o tino i te lalolagi e ‵kau atu ki te fakatasiga fakapito tenei i itula takitasi o te aso tenā ke oko ki te taimi ko oti ei te aso. Ne ‵valo mai te Tusi Tapu me e isi “se vaitino e tokouke, telā e se mafai o lau aka ne se tagata, mai i atufenua mo matakāiga mo tino mo ‵gana katoa” ka ka‵laga atu: “A te ‵tou fakaolataga e maua mai i te ‵tou Atua, telā e sagasaga i te nofogaaliki mo te Tamā Mamoe.” (Faka. 7:9, 10) Ko oko eiloa i te gali te fakaaloaloga e maua ne Ieova mo  Iesu e auala i te faiga o te Fakamanatuga i te tausaga!

3. Ne a fesili ka tali aka i te mataupu tenei?

³ E isi ne fesili kolā ne ‵sae aka kae ka tali mai i te mataupu tenei. (1) E mafai pefea ne tatou taki tokotasi o fakatoka mō te Fakamanatuga kae kaia e aoga ei ke ‵kau atu ki ei? (2) Ne a auala e aoga ei a te Fakamanatuga ki te ‵kau fakatasi o tino o te Atua? (3) E mafai pefea o fesoasoani atu a tino taki tokotasi ke fakatumau te ‵tou ‵kau fakatasi? (4) E mata, e isi se Fakamanatuga fakaoti? Kafai e isi, mafea la?

4. Kaia e tāua ei ke ‵kau atu tatou ki te Fakamanatuga māfai e mafai?

⁴ Ke mafaufau ki te tāua o te ‵kau atu ki te Fakamanatuga. Masaua me i fakatasiga a te fakapotopotoga ne vaega tāua o ‵tou tapuakiga. E mautinoa eiloa me e lavea ne Ieova mo Iesu a tino kolā e taumafai malosi ke ‵kau atu ki te ‵toe fakatasiga tāua tenei i te tausaga. Se mea gali, me ma‵nako eiloa tatou ke lavea mai ne lāua me ka olo atu eiloa tatou ki te Fakamanatuga, seiloga ke ma‵saki malosi tatou io me e se fetaui mo ‵tou fakanofonofoga. Kafai e fakaasi atu ne tatou i ‵tou faifaiga a te tāua o fakatasiga ki a tatou, ko tuku atu ne tatou ki a Ieova a nisi pogai fakaopoopo e ‵tau ei o ‵tu ‵tou igoa i tena “tusi o fakamasauaga”—“te tusi o te ola”—telā e tusi i ei a igoa o tino kolā ka maua ne latou te ola se-gata-mai.—Mala. 3:16; Faka. 20:15.

5. I aso mai mua o te Fakamanatuga, e mafai pefea ne tatou o ‘tofotofo aka me e mata, e ‵piki ‵mau tatou ki te fakatuanaki’?

⁵ I aso mai mua o te Fakamanatuga, e mafai o fakaavanoa ne tatou ne taimi ke iloilo ne tatou te ‵tou fesokotakiga totino mo Ieova fakatasi mo te faiga o ‵talo. (Faitau te 2 Kolinito 13:5.) E fai pefea ne tatou te mea tenā? Mai te ‘tofotofo aka me e mata, e ‵piki ‵mau tatou ki te fakatuanaki.’ Ke fai te mea tenā, se mea ‵lei ke fesili ifo: ‘E mata, e talitonu au me e aofia au i te fakapotopotoga e tasi fua telā ko oti ne talia ne Ieova ke fakataunu aka ei tena loto? E mata, e fai ne au te ‵toe mea e mafai ke talai kae akoako atu te tala ‵lei o te Malo? E mata, e fakaasi atu ne au i aku faifaiga me e talitonu katoatoa au me konei eiloa a aso fakaoti kae ko pili mai fua te gataga o te pulega a Satani? E mata, koi ‵pau eiloa te loto talitonu o oku ki a Ieova mo Iesu i te taimi nei fakatusa ki te taimi ne tuku atu ei toku ola ki a Ieova te Atua?’ (Mata. 24:14; 2 Timo. 3:1; Epe. 3:14) A te mafaufau ‵loto ki tali o fesili konā ka fesoasoani mai ki a tatou ke tumau faeloa i te fakamaoni aka ne tatou a tatou eiloa.

6. (a) Se a te auala fua e tasi ki te ola? (e) E fakatoka pefea se toeaina mō te Fakamanatuga i tausaga takitasi, kae e mafai pefea o fai ne koe se mea tai ‵pau penā?

⁶ Faitau kae mafaufau ‵loto ki mataupu mai te Tusi Tapu kolā e fakamatala mai i ei te tāua o te Fakamanatuga. (Faitau te Ioane 3:16; 17:3.) A te auala fua e tasi ki te ola se-gata-mai e aofia i ei te “iloa tonu” ne koe a Ieova mo te “fakaasi atu faeloa te fakatuanaki” ki a Iesu, Tena tama fagasele e tokotasi. Ke fakatoka koe mō te Fakamanatuga, kaia e se filifili aka ei ne mataupu ke sukesuke ki ei kolā ka fesoasoani atu ki a koe ke fakapilipili atu ki a Ieova mo Iesu? Ke mafaufau ki te mea ne fai sāle ne se toeaina. I te fia o tausaga, ne tausi ne ia a mataupu mai i Faleleoleo Maluga kolā e fakamatala mai i ei a mea e uiga ki te Fakamanatuga mo te alofa ne fakaasi mai ne Ieova mo Iesu ki a tatou. I vaiaso mai mua o te Fakamanatuga, e toe faitau a ia ki mataupu konā kae mafaufau ‵loto ki te tāua o te fakatasiga tenei. I nisi taimi, e toe fakaopoopo atu ne ia ne mataupu ‵fou e lua io me tasi ki ana mea mua. Ne iloa aka ne te toeaina tenei me i te toe faitauga ki mataupu konei mo te mafaufau ‵loto ki te faitauga faka-te-Tusi Tapu o te Fakamanatuga, e tauloto faeloa ne ia ne mea ‵fou i tausaga takitasi. Kae sili atu i ei, e lagona ne ia me gasolo faeloa o lasi tena alofa ki a Ieova mo Iesu i tausaga takitasi. A vaegā sukesukega penā e mafai o fesoasoani atu ki a koe ke momea aka te lasi o tou alofa mo tou loto fakafetai  ki a Ieova mo Iesu kae mafai foki o maua ne koe a mea aoga e uke mai te Fakamanatuga.

7. (a) Se a te mea ne ‵talo a Iesu ki ei i te po o te ‵Kaiga a te Aliki i te Afiafi? (e) Se a te mea e fakaasi mai ei me ne tali ne Ieova te ‵talo a Iesu?

⁷ I te po ne fai ei te ‵Kaiga a te Aliki i te Afiafi, ne ‵talo a Iesu ko te mea ke ‵kau fakatasi ana soko katoa kae ke maua foki ne latou te fealofani telā e fakatāua ne lāua mo tena Tamana. (Faitau te Ioane 17:20, 21.) Ne tali mai eiloa ne Ieova te ‵talo a tena Tama pele, kae nei la ko tali‵tonu te fia miliona o tino me ne uga mai ne Ieova a tena Tama. E ‵kese mo nisi fakatasiga aka a tino o te Atua, e lavea atu i te taimi o te Fakamanatuga a fakamaoniga mautinoa o te ‵kau fakatasi o Molimau a Ieova. E maopoopo fakatasi a tino mai atufenua e uke mo telega kese‵kese i koga e fai ei a fakatasiga i te lalolagi kātoa. I nisi koga, a te maopoopo o tino mai fenua kese‵kese i koga tapuaki se mea e faigata o tupu io me ‵kilo fatauva atu ki ei a nisi tino. Kae ko te vaegā ‵kau fakatasi tenei se mea gali eiloa i te kilokiloga a Ieova mo Iesu!

8. Se a te fekau ne tuku atu ne Ieova ki a Esekielu e uiga ki te ‵kau fakatasi?

⁸ E pelā me ne tino o Ieova, e se ‵poi tatou i te ‵kau fakatasi o tatou. A te tonuga loa, ko leva ne ‵valo mai ne Ieova te mea tenā. Mafaufau ki te fekau ne tuku ne ia ki te pelofeta ko Esekielu e uiga ki lakau e lua kolā ka tuku fakatasi, ko te lakau “mō Iuta” mo te lakau “mō Iosefa.” (Faitau te Esekielu 37:15-17.) E fakamatala mai a te “Fesili Mai Tino Fai‵tau” telā ne ‵lomi i Te Faleleoleo Maluga i a Iulai 2016: “Ne tuku ne Ieova ki a Esekielu se fekau o te fakamoemoega e uiga ki te ‵kau fakatasi o te fenua o Isalaelu mai tua o te faka‵fokimaiga ki te Fenua o te Folafolaga. Te fekau tenā e ‵valo mai ei te ‵kau fakatasi o tino o te Atua telā ne kamata i te kamataga o aso fakaoti.”

9. E lavea atu pefea te fakataunuga o te valoaga a Esekielu i te taimi o te Fakamanatuga i tausaga takitasi?

⁹ Mai te tausaga e 1919 o vau, ne kamata malielie ne Ieova o toe fakatoka faka‵lei kae toe fai ke ‵kau fakatasi a te kau fakaekegina, kolā ne fakatusa ki te lakau “mō Iuta.” Kae i te taimi ne ‵kau mai ei a tino e tokouke kolā e fakamoe‵moe ke ola i te lalolagi —ne fakatusa ki te lakau “mō Iosefa”—ki te kau fakaekegina, ne fai ei a potukau e lua konei e pelā me se “lafu mamoe e tasi.” (Ioa. 10:16; Saka. 8:23) Ne tauto mai a Ieova me ka tuku fakatasi a lakau e lua konei ke fai pelā me se lakau e tasi i tena lima. (Eseki. 37:19) Nei la, ko tavini atu a potukau e lua konei mo te ‵kau fakatasi mai lalo o te takitakiga a te Tupu e tokotasi—ko Iesu Keliso telā ko oti ne fakamaluga aka, kae ne faipati mai se valoaga e uiga ki ei e pelā me ko te ‘tavini a te Atua ko Tavita.’ (Eseki. 37:24, 25) A te tulaga ‵kau fakatasi tāua telā e fakamatala mai i te Esekielu e lavea faka‵lei atu i tausaga takitasi i te taimi e maopoopo ei te ‵toega o te kau fakaekegina fakatasi mo “nisi mamoe” o fakamanatu te Fakamanatuga o te mate o Keliso! Ne a la mea e mafai ne tino taki tokotasi o fai ke fakamalosi aka kae fakatumau te ‵tou ‵kau fakatasi?

10. E fakamalosi aka pefea ne tatou te ‵kau fakatasi o tino o te Atua?

¹⁰ A te auala e tasi e fakamalosi aka ei ne tino o te Atua a te ‵tou ‵kau fakatasi ko te atiakaga o te loto maulalo. I tena nofoga i te lalolagi, ne fakamalosi atu a Iesu ki ana soko ke fakamalalo ne latou a latou eiloa. (Mata. 23:12) Kafai tatou e loto mau‵lalo, ka se mafai o maua ne tatou te agaga fia maluga o te lalolagi. I lō te fai penā, ka fesoasoani mai eiloa te ‵tou loto mau‵lalo ke faka‵logo ki a latou kolā e fai te takitakiga, kae ko te uiga fakalogo tenā e tāua ‵ki eiloa ki te ‵kau fakatasi o te fakapotopotoga. E sili atu i ei, ka fakafiafia atu eiloa a te ‵tou loto maulalo ki te Atua, me i a ia e “‵teke ki tino fakamaua‵luga, kae e tuku atu ne ia te alofa tauanoa ki tino loto mau‵lalo.”—1 Pe. 5:5.

11. E fesoasoani mai pefea a te mafaufau ‵loto ki te uiga o mea fakatusa o te Fakamanatuga ke fakamalosi aka ei te ‵tou ‵kau fakatasi?

¹¹ A te lua o auala e fakamalosi aka ei ne tatou te  ‵tou ‵kau fakatasi ko te mafaufau ‵loto ki te uiga o mea fakatusa kolā e fakaaoga i te Fakamanatuga. Mai mua o te po fakapito tenā—kae maise ko te po eiloa tenā—ke mafaufau faka‵lei koe ki te tāua o te falaoa sē faka‵fete mo te uaina kula. (1 Koli. 11:23-25) E fakauiga a te falaoa ki te foitino sē agasala o Iesu telā ne ofo atu e pelā me se taulaga, kae e fakauiga a te uaina ki tena toto telā ne maligi. Kae e uke atu a mea e ‵tau o iloa ne tatou i tafa o te malamalama fua i te uiga o mea fakatusa konā. Masaua la, me e aofia i te taulaga togiola a Keliso a fakaasiga sili e lua o te alofa—ko te alofa ne fakaasi mai ne Ieova mai te tukumaiga o tena Tama mō tatou, mo te alofa ne fakaasi mai ne Iesu mai te talia ne ia mo te loto fiafia ke tuku atu tena ola mō tatou. A te mafaufau ‵loto ki te a‵lofa o lāua e fakamalosi mai ki a tatou ke a‵lofa foki ki a lāua. Kae ko te alofa ki a Ieova telā e maua ne tatou fakatasi mo ‵tou taina tapuaki e fai pelā me se uka telā e ‵sai fakatasi ei tatou kae fakamalosi aka ei te ‵tou ‵kau fakatasi.

12. I tena tala fakatusa e uiga ki te tupu telā ne fai ke ‵tina mai ana kaitalafu, ne fakaasi faka‵lei mai pefea ne Iesu me manako a Ieova ke loto fakamagalo tatou?

¹² A te tolu o auala e mafai o fakamalosi aka ei te ‵tou ‵kau fakatasi ko te fakamagaloga o nisi tino. Kafai e fakamagalo ne tatou a tino kolā ne fai ne latou ke kaitāua tatou, e fakaasi atu i ei me e loto fakafetai tatou ki te fakamagaloga o ‵tou agasala telā ne mafai o fakataunu e auala i te taulaga togiola a Keliso. Ke mafaufau ki se tala fakatusa a Iesu i te Mataio 18:23-34. Ke fesili ifo ki a koe eiloa: ‘E mata, e fakamalosi aka au ke fakagalue a mea ne akoako mai ne Iesu? E mata, e fakaasi atu ne au te kufaki mo te loto malamalama ki oku taina tavini? E mata, e toka au o fakamagalo a tino kolā ne agasala mai ki a au?’ E tonu, e kese‵kese a tulaga o agasala, kae ko nisi mea ‵se e faigata ‵ki ke fakamagalo ne tino sē ‵lei katoatoa. Kae e akoako mai i te tala fakatusa tenei a te mea telā e manako a Ieova ki ei. (Faitau te Mataio 18:35.) Ne fakaasi faka‵lei mai ne Iesu me ka se fakamagalo ne Ieova tatou māfai e se fakamagalo ne tatou ‵tou taina māfai e isi ne pogai ‵lei ke fai penā. E tāua ‵ki te manatu tenā! E puipui kae fakatāua ne tatou te ‵tou ‵kau fakatasi māfai e fakamagalo ne tatou a nisi tino e pelā mo te mea ne akoako mai ne Iesu ke fai ne tatou.

13. E fakamalosi aka pefea ne tatou te ‵tou ‵kau fakatasi mai te faiga e pelā me ne tino fakatupu te filemu?

¹³ Kafai e fakamagalo ne tatou a nisi tino, ko  fakamaoni atu ei ne tatou i a tatou ne tino fakatupu te filemu. Ke masaua a pati a te apositolo ko Paulo me e ‵tau mo tatou o “taumafai malosi ke fakatumau . . . te tasi o te agaga telā ko te fusi o te filemu.” (Efe. 4:3) I te taimi tenei o te Fakamanatuga kae maise ko te po o te Fakamanatuga, ke mafaufau ‵loto koe e uiga ki au faifaiga e fai ki nisi tino. Ke fesili ifo ki a koe eiloa: ‘E mata, e lavea faka‵lei mai ne tino i a au se tokotasi telā e se ave ‵loa toku kaitaua? E mata, e lauiloa au e pelā me se tino telā e gasue muamua o fakamalosi aka te filemu mo te ‵kau fakatasi?’ Konei eiloa a fesili tāua e ‵tau o mafaufau ‵loto ki ei i te taimi tenei o te tausaga.

14. E fakaasi atu pefea ne tatou me i a tatou e ‘fakatau fa‵ki i ‵tou mea ‵se i te alofa’?

¹⁴ A te fa o auala ke fakamalosi aka ei te ‵tou ‵kau fakatasi ko te fakaasiatuga o te alofa mai te fakaakoako ki a Ieova, te Atua o te alofa. (1 Ioa. 4:8) E se ‵tau eiloa o fai atu tatou e uiga ki ‵tou taina tapuaki, “Kāti e ‵tau o alofa au ki a latou, kae e se ‵tau mo au o fiafia ki a latou”! A te vaegā mafaufauga tenā e ‵kese ‵mao eiloa mo pati fakatonutonu a Paulo me e ‵tau mo tatou o “fakatau fa‵ki . . . i otou mea ‵se i te alofa.” (Efe. 4:2) Masaua me ne seki fai mai a ia me e ‵tau mo tatou o ‘fakatau fa‵ki i otou mea ‵se.’ Ne fakaopoopo mai a ia me ‵tau o fai tatou penā “i te alofa.” E isi se ‵kese o mea konā. E maua i loto i ‵tou fakapotopotoga a vaegā tino valevale kolā ne aumai ne Ieova ki a ia. (Ioa. 6:44) Ona ko te mea ne aumai ne Ieova a tino konā ki a ia, ko tena uiga e alofa a ia ki a latou. Kaia la e fakamasino ei ne tatou me e se ‵tau mo tatou o a‵lofa ki se taina tapuaki? E se ‵tau o taofi aka ne tatou a te alofa telā ne fakatonu mai a Ieova ke fakaasi atu ne tatou!—1 Ioa. 4:20, 21.

15. E iloa pefea ne tatou me ka isi se Fakamanatuga fakaoti?

¹⁵ I se aso e tasi ka fai ei te Fakamanatuga mō te ‵toe taimi eiloa. E iloa pefea ne tatou te mea tenā? I tena tusi muamua ki te kau i Kolinito, ne tusi atu a Paulo ki Kelisiano fakaekegina, me mai te fakamanatuga faeloa o te mate o Iesu i tausaga takitasi, ko “folafola atu faeloa i ei ne koutou te mate o te Aliki ke oko eiloa ki tena oko mai.” (1 Koli. 11:26) A te pati “oko mai” i konei e fakasino atu foki ki te taimi telā ka “vau” ei a Iesu e pelā mo te mea ne fai mai ne ia i tena valoaga e uiga ki te taimi o te gataga. E uiga ki te fakalavelave lasi telā ka tupu mai mua nei, ne fai mai a ia: “Tenā ka lavea atu ei a te fakailoga o te Tama a te tagata i te lagi, kae ko matakāiga katoa o te lalolagi ka ‵tagi fanoa‵noa, kae ka lavea ne latou a te Tama a te tagata e vau i kaumana o te lagi mo tena ‵mana mo tena ‵malu sili. Kae ka uga atu ne [Iesu] ana agelu fakatasi mo te ‵tagi o pu, kae ka fakamaopoopo fakatasi mai ne latou ana tino filifilia mai feitu e fa o te lalolagi, mai te mata e tasi o te lagi ke oko ki te suā mata.” (Mata. 24:29-31) A te ‘fakamopoopoga o tino filifilia’ konei e fakasino atu ki te taimi ka maua ei ne Kelisiano fakaekegina katoa kolā koi ‵toe mai i te lalolagi nei a te lotou taui faka-te-lagi. Ka tupu a te mea tenei mai tua o te vaega muamua o te fakalavelave lasi kae mai mua o te taua o Amaketo. Tenā ko ‵kau atu ei te toko 144,000 ki a Iesu i te fakatakavalega o tupu o te lalolagi. (Faka. 17:12-14) A te Fakamanatuga fakaoti telā ka fai mai mua o te fakamaopoopoga o te kau fakaekegina ki te lagi ko te ‵toe Fakamanatuga fakaoti eiloa, me i a Iesu ka ‘vau’ i te taimi tenā.

16. Kaia ne fakaiku aka ei ne koe ke kau atu ki te Fakamanatuga i te tausaga tenei?

¹⁶ Ke na fakaiku aka eiloa ne tatou ke ‵kau atu ki te Fakamanatuga i a Mati 31, 2018 ke maua a mea aoga mai i ei. Kae ke fakamolemole atu tatou ki a Ieova ke fesoasoani mai ke fakamalosi aka faeloa ne tatou a te ‵kau fakatasi o ana tino! (Faitau te Salamo 133:1.) Ke masaua, e isi se aso ka fai ei te Fakamanatuga tenei e fakamanatu ne tatou e pelā me ko te fakamanatuga fakaoti. Ke oko atu ki te taimi tenā, ke na fai eiloa ne tatou te ‵toe mea e mafai o fai ke ‵kau atu ki ei, kae ke fakatāua eiloa ne tatou te gali o te ‵kau fakatasi i te taimi o te Fakamanatuga.