NE SA‵SALE fakatasi se tokolua fāfine i se koga fai pisinisi i te fakai ko Baguio i Filipaina. Ne lavea ne lāua se kā talai kae ne seki olo atu ki ei. Ne tu atu a te tuagane ko Helen i tafa o te kā talai tenā kae ne fakamisikata malosi atu ki fāfine konā. Ne sa‵sale eiloa a fāfine konei, kae ne seki puli i a lāua te fakamisikata a Helen ki a lāua.

Fakamuli ifo, i te lā auala ki te fale i luga i te pasi, ne lavea ne lāua te fakailoga ko te jw.org i se Fale Tapuaki. Ne masaua ne lāua te fakailoga tenā i te kā talai telā ne lavea ne lāua mai mua atu. Ne ‵tu katoa lāua ki lalo mo te pasi kae olo atu o onoono ki te fakasologa o polokalame e fai i ei a fakatasiga i fakapotopotoga kese‵kese kolā e tusi mai tua i te ‵pui o te Fale Tapuaki.

Ne ‵kau atu loa a fāfine e tokolua konā ki te fakatasiga i te suā taimi. Kae ko oi ne lavea ne lāua i te sa‵saleatuga ki loto i te Fale Tapuaki? Ko Helen! Ne masaua fakavave ne lāua a ia i tena fakamisikata. “I taimi ne ‵mai ei lāua ki a au,” ko pati a Helen, “ne tai manavase eiloa au. Ne mafaufau au me kāti ne fai ne au se mea ‵se.” Kae ne fakamatala atu ne fāfine konei ki a Helen a te mea ne tupu.

Ne fia‵fia eiloa a fāfine konei ki te fakatasiga mo te ‵kau fakatasi o taina; ne seki ‵mā eiloa lāua. I te laveaga ne lāua a nisi tino e ‵fulu te koga tapuaki mai tua o te fakatasiga, ne fia fesoasoani foki lāua. E tokotasi te fafine i a lāua ko oti ne fano ki te suā fenua, kae ko te suā fafine e kau faeloa ki fakatasiga kae ko kamata foki o fai tena akoga faka te Tusi Tapu—ne ‵tupu a mea katoa i se fakamisikata!