E MATA, e lavea ne koe me e mafau‵fau a tino e tokouke i te lalolagi nei me e ‵tau o tu ‵kese a faifaiga e fai ki a latou io me maua ne latou a tauliaga fakapito? Faitalia te uke o tauliaga e maua ne latou, kae koi ma‵nako eiloa ki mea e uke atu. Tenei eiloa te kilokiloga ko ‵mautakitaki i mafaufau o tino uiga fia sili kae seai se loto fakafetai, telā se fakamailoga o aso fakaoti.—2 Timo. 3:2.

E tonu, a te kaimanako e sē se uiga fou. Ne fakaiku aka ne Atamu mo Eva ke fai ne lāua te filifiliga o te mea ‵lei mo te mea masei, kae ne iku atu ei ki te mauaga ne tatou a logo‵maega e uke. I se fia senitenali fakamuli ifo, ne mafaufau te tupu o Iuta ko Usia me ne maua ne ia te tauliaga ke ofo atu a mea ma‵nogi i te faletapu, kae ne ‵se ‵ki tena mea ne fai. (2 Nofo. 26:​18, 19) Ne penā foki a te kau Falesaio mo te kau Satukaio, ne mafau‵fau latou me ‵tau o ‵kese a faifaiga a te Atua ki a latou ona ko latou ne ‵mai i te ‵gafa o Apelaamo.—Mata. 3:9.

E sikomia tatou ne tino kolā e uiga fia sili kae fia takutakua, kae e mafai o ‵pisi mai olotou uiga konā ki a tatou. (Kala. 5:26) E mafai o kamata o mafau‵fau tatou me e ‵tau o maua ne tatou se tauliaga fakapito, io me tu ‵kese a faifaiga e ‵tau o fai mai ki a tatou. E ‵kalo kea‵tea pefea tatou mai te mafaufauga tenei? Muamua la, e ‵tau o malamalama tatou i te kilokiloga a Ieova e uiga ki ei. E lua a fakatakitakiga mai te Tusi Tapu ka fesoasoani mai ki a tatou.

Ko Ieova eiloa e fakaiku aka ne ia a mea e ‵tau o maua ne tatou. Mafaufau ki nisi fakaakoakoga konei.

• I loto i te kāiga, e ‵tau o lavea mai ne te tagata avaga me āva a tena avaga ki a ia, kae e ‵tau o  maua ne te fafine avaga a lagonaga me e alofa a tena avaga ki a ia. (Efe. 5:33) E ‵tau mo taki tauavaga o fakaasi atu fua te alofa fakatauavaga ki a lāua eiloa. (1 Koli. 7:3) E ‵tau o lavea ne mātua me faka‵logo olotou tama‵liki ki a latou, kae e ‵tau o lavea mai ne tama‵liki a te a‵lofa mo te fesoasoani o olotou mātua ki a latou.—2 Koli. 12:14; Efe. 6:2.

• I te fakapotopotoga, e ‵tau eiloa o fakaasi atu ne tatou a te āva ki toeaina ga‵lue malosi. (1 Tesa. 5:12) Kae e se ‵tau o pule mālō atu latou ki olotou taina mo tuagane.—1 Pe. 5:​2, 3.

• Ne tuku atu ne te Atua ki malo o tāgata a te saolotoga ke fakatonu atu ki tino ke ‵togi olotou lafoga kae ke āva atu foki a tino ki a latou.—Loma 13:​1, 6, 7.

E uke atu a mea e tuku mai ne Ieova mo te alofa i lō mea e ‵tau o maua ne tatou. Ona ko ‵tou tulaga agasala, e ‵tau fua o maua ne tatou te mate. (Loma 6:23) Kae e tuku mai ne Ieova a fakamanuiaga e uke ona ko tena alofa fakamaoni mō tatou. (Sala. 103:​10, 11) A fakamanuiaga io me ko tauliaga e maua ne tatou mai i a ia e maua fua ona ko tena alofa tauanoa.—Loma 12:​6-8; Efe. 2:8.

Fakaeteete i mafaufauga o te lalolagi. E aunoa mo te iloa ne tatou, e mafai eiloa o mafau‵fau tatou me e ‵tau o maua ne tatou a nisi tauliaga fakapito i lō nisi tino. Ne fakaasi mai ne Iesu a te faigofie ke maua te mafaufauga tenā mai te fakaaogaga ne ia a te tala fakatusa e uiga ki tino ga‵lue kolā ne ‵togi ki se tenali e tasi. Nisi tino ne ga‵lue i te aso kātoa mai lalo o te la ‵vela; nisi tino ne ga‵lue fua i se itula e tasi. Ne mafau‵fau te potukau muamua me e ‵tau o lasi atu te lotou ‵togi e maua ona ko te uke o olotou galuega ne fai. (Mata. 20:​1-16) E ‵tusa mo tena tala fakatusa, ne fakaasi atu ne Iesu me e ‵tau mo ana soko o lotoma‵lie ki mea e tuku atu ne te Atua mo te loto fiafia ki a latou.

Ke loto fakafetai, kae sa manako ki mea e uke mai nisi tino. (1 Tesa. 5:18) Fakaakoako ki te apositolo ko Paulo, telā ne seki fakamolemole atu ki ana taina i Kolinito ke tuku atu a mea e manako a ia ki ei, faitalia me mafai o fai a ia penā. (1 Koli. 9:​11-14) E ‵tau eiloa o loto fakafetai tatou ki fakamanuiaga e maua ne tatou kae ke ‵kalo kea‵tea mai te manako ki mea mai nisi tino.

 Ati aka te loto maulalo. Kafai ko tō fakatāua ne se tino a ia eiloa, ko kamata ei o mafaufau me e ‵tau o maua ne ia a mea e uke atu. A te loto maulalo ko te vailakau fua telā e mafai o faka‵lei ne ia a te mafaufauga poisini tenā.

Ne tuku mai ne te pelofeta ko Tanielu se fakaakoakoga ‵lei o te loto maulalo. A ia ne vau i se kāiga mau‵mea, e matagali, kae e poto foki. Ne mafai fua o mafaufau a ia me e ‵tau o tu ‵kese a faifaiga e fai ki a ia mo tauliaga e maua ne ia. (Tani. 1:​3, 4, 19, 20) Kae ne tumau eiloa a Tanielu i te loto maulalo, kae ne fai ne te uiga tenei ke tāua a ia ki a Ieova.—Tani. 2:30; 10:​11, 12.

Ke na ‵teke atu eiloa ne tatou te uiga fia sili mo te fia takutakua telā ko salalau valevale i te lalolagi i aso nei. Kae ke fia‵fia faeloa tatou ki fakamanuiaga e tuku mai ne Ieova ki a tatou e auala i tena alofa tauanoa.