E FAKAMATALA mai i Tusitusiga Tapu a nisi tulaga kolā ne saesae ei ne tino taki tokotasi olotou gatu. Kāti e ‵fou a faifaiga penā ki tino fai‵tau i aso nei, kae ki tino Iutaia, a te mea tenā se fakaasiga o te manavase malosi, fanoanoa, masiasi, kaitaua, io me tagi fanoanoa.

Pelā me se fakaakoakoga, ne “saesae” ne Leupena ana gatu i te iloaga ne ia me ko sē taunu a tena palani ke fakasao a tena taina ko Iosefa me ko oti ne fakatau atu a Iosefa e pelā me se pologa. A te lotou tamana ko Iakopo, “ne saesae ona gatu” i te taimi ne tukutaumate ei ne ia i a Iosefa ko oti ne kai ne se manu fekai. (Kene. 37:18-35) I te taimi ne fakailoa atu ei ki a Iopu i ana tamaliki katoa ko ‵mate, ne tu aka a ia kae “saesae ona gatu.” (Iopu 1:18-20) Ne “saesae” ne se avefekau ana gatu i te taimi ne tu atu ei i mua o te Faitaulaga Sili ko Eli o fakailoa atu ki a ia i tino Isalaelu ko taka‵vale i te taua, ana tamaliki ta‵gata e tokolua ko ‵mate, kae ko te pusa o te feagaiga ko oti ne puke. (1 Samu. 4:12-17) I te lagonaga ne Iosia a muna o te Tulafono kolā ne faitau atu ki a ia kae matea ne ia i ei agasala ana tino ne fai, “saesae ei ona gatu.” —2 Tupu 22:8-13.

I te fakamasinoga a Iesu, a te Faitaulaga Sili ko Kaiafa “ne saesae” ona gatu i te lagonaga ne ia a te mea telā ne fakauiga ‵se ne ia me se muna masei ki te Atua. (Mata. 26:59-66) E ‵tusa mo te tulafono fakalotu ne faite ne takitaki lotu Iutaia, so se tino e lagona ne ia a te igoa o te Atua e muna maseigina e ‵tau o saesae ana gatu. A te suā manatu o takitaki lotu telā ne sae aka mai tua o te fakamaofaga o te faletapu i Ielusalema, e fai mai me “i te tino telā e lagona ne ia te Igoa o te Atua e muna maseigina i aso nei e se ‵tau o saesae ana gatu, i ana gatu ma ma‵sei.”

E tonu, e se tāua ki te Atua a te saesae o gatu o se tino vaganā e tonu eiloa te fanoanoa o se tino. Tenā te mea ne fai atu ei te Atua ki ana tino ‘ke fakaasi mai te lotou loto mafatia a te lotou fanoanoa; me e se lava manafai e saesae olotou gatu.’—Ioe. 2:13.