“EUREKA!” A te uiga o te pati fua e tasi tenā ko te “ko maua ne au!” I te vaitaimi o te 19 senitenali telā ne olo ei a tino e tokouke ki te koga telā ne maua i ei te aulo i California, U.S.A., ne mafai o lagona atu te kalaga tenā māfai ko maua ne se tino keli aulo a te aulo. E ui i ei, ne maua ne Siale Tase Lasalo mo tino A‵koga ki te Tusi Tapu se mea telā e tāua malosi atu—ko muna‵tonu i te Tusi Tapu. Kae ne loto finafinau latou o fakailoa atu ki nisi tino.

I te tau mafanafana o te 1914, ne ua‵lolo mai a te fia miliona o tino mai i fa‵kai ‵lasi o onoono i te “Photo-Drama of Creation,” se ata e valu itula te leva telā ne faite ne te International Bible Students Association (I.B.S.A.). Fakatasi mo ata faitāga fakaofoofogia, ata sē gasuesue, fakamatalaga manino, mo pese fakatagitagi ‵gali, e fai ne te ata tenei e fakavae mai te Tusi Tapu ke onoono a tino mai te faitega o mea i tala fakasolopito o tino ke oko ki te fakaotiga o te Pulega a Iesu Keliso i te Afe Tausaga.—Faka. 20:4. *

Kae pefea a latou kolā ne ola i fa‵kai fo‵liki mo kogā koga kolā e ‵mao mai i fa‵kai ‵lasi? I a Aokuso 1914, ne tala mai ne te I.B.S.A. a te “Eureka Drama”—se vaega o te “Photo-Drama” kae seai ne vaega e gasue‵sue i ei. E tolu a vaega ke filifili mai i ei kae mafai o maua i ‵gana kese‵kese: A te “Eureka X” e maua i ei a tala katoa mo pese. Te “Eureka Y” e maua i ei a tala mo pese katoa fakatasi mo ata e se gasue‵sue. Kae ko te “Eureka Family Drama,” ne filifili a tala mo pese i ei ke fakaaoga i te fale. Ne mafai foki o maua a mea puke leo mo mea faka‵lasi leo ‵togi ma‵ma.

E aunoa mo se mea pei ata io me se laugatu lasi mo pei te ata, ne ave ne Tino A‵koga ki te Tusi Tapu a ata sē ‵togi konei ki koga ‵mao o te fenua o fakaoko atu te fekau o te Malo ki koga ‵fou. A te “Eureka X” telā e fakalogo‵logo fua ki leo ne mafai o pei i te ao io me ko te po. A te mea telā e pei ki ei a te ata sē gasuesue ko te “Eureka Y” e mafai o fakaola kae seai se iti mai te fakaaogaga o te mainaga telā e maua mai te tuku fakatasi o kaponi (carbon) mo nisi fiti aka (carbide lamp). “Toeitiiti ko mafai o fakaaoga ne matou a ata konei i so se koga,” ko te lipoti i te Watch Tower o Finilani. Ko oko eiloa i te ‵tonu o te mea tenā!

I lō te ‵togi o fale ta‵fao ‵lasi, ne maua sāle ne Tino  A‵koga ki te Tusi Tapu a koga sē ‵togi, pelā mo fale a‵koga, fale fono, koga e ‵tu i ei a tuleni, penā foki a potu o fale ‵lasi kolā e fakafia‵fia i ei a tino mata‵mata. I te ukega o taimi, a ata e pei i tua ki luga i se laugatu ‵kena lasi e tautau i tafa o se fale e tausi i ei a mea fagai manu. Ne tusi mai a Anthony Hambuch: “Ne fakatoka ne tino fai fatoaga se tulaga foliki e faite ki lakau i tafa o olotou fatoaga ke mafai ne tino o saga‵saga i ei kae onoono ki te polokalame.” Ne fakaaoga ne te potukau o te “Eureka” a te kā e fakaaoga ki te “Drama” mo ave olotou mea faigaluega, pokisi, mo mea ‵kuka mea‵kai.

A tino ne onoono i te “Eureka” ne nāi tino fua i te kamataga ke oko loa ki se fia selau. I te Iunaite Sitete, e toko 400 ne ‵kau mai i te peiga o te ata i te fale akoga i se fa‵kai e toko 150 a tino i ei. I nisi koga, e lima maila (8 km) e sa‵sale ei a tino o onoono i te “Eureka Drama.” I Sweden, ne “otia tonu a loto” o tuakoi o Charlotte Ahlberg’s kolā ne maopoopo i tena tamā fale i te lagonaga ne latou a leo kolā ne faka‵tagi. E nofo ki te 1,500 tino ne ‵mai o onoono i te taimi e tasi ne pei ei te ata i se fa‵kai e keli ei te aulo i Ausetalia. E lipoti mai te Watch Tower me ne “fia‵fia ‵ki a polofesa mo tamaliki a‵koga ki ata mo motou leo fakaofoofogia kolā ne puke,” i te taimi ne pei ei i akoga ma‵luga. Ne lauiloa a te “Eureka Drama” i koga foki kolā e isi i ei ne fale tamunei.

Ne fai a te “Eureka Drama” mo mea faigaluega aoga ki te “Class Extension Work,” telā ne uga ei ne te potukau o Tino A‵koga ki te Tusi Tapu a failauga o kamata a potukau a‵koga ‵fou. E faigata o iloa aka a te aofaki tonu o tino kolā ne onoono ki te “Eureka Drama.” E uke a “Drama” ne fakaaoga sāle. E ui i ei, e 14 fua mai te 86 potukau “Drama” ne lipoti sāle mai i te 1915. I te fakaasimaiga mo te fanoanoa a te aofaki sē katoa, ne fai mai i te lipoti i te fakaotiga o te tausaga me e silia atu i te tasi miliona tino ne lavea ne latou te “Drama.” A nisi tino e toko 30,000 kolā ne onoono i ei ne fakamolemole mai ki ne tusi faka-te-Tusi Tapu.

Kāti ne fai a te “Eureka Drama” pelā me se faigāmea e se masaua i tala fakasolopito, kae e lau i miliona tino ko oti ne lavea tonu ne latou a te ata tāua tenei, mai i Ausetalia ki Argentina, mai Afelika ki Saute ki te British Isles, India, mo te Caribbean. Ne maua ne tino e tokouke i a latou a te munatonu mai te Tusi Tapu.—telā e tāua atu i te aulo—kae mafai o kalaga atu “Eureka!”