1, 2. Se a te puipuiga e manakogina ne te fanau a te fafine, kae kaia?

E TĀUA ‵ki te valoaga muamua i te Tusi Tapu i te fakagaluegaga o te fuafuaga a Ieova. I te taimi ne fai ei te tautoga i Etena, ne folafola mai ne te Atua tonu: “Ka fai ne au a koulua [Satani] mo te fafine ke fai fili; a tau fanau mo tena fanau ka fai fili faeloa. Ka tuki pala ne te fanau a te fafine a tou [Satani] ulu, kae ka u ne koe [a tena] vae,” ko pati a Ieova. (Kene. 3:15) Ka mataga ‵ki te fai fili o te gata mo te fafine, tela la, ko sē mapu eiloa Satani i ana taumafaiga o fakaseai te fanau a te fafine.

² E setioa eiloa o tagi atu te faisalamo i tena ‵talo ki te Atua e uiga ki Ana tino: “Kiloke! Ko fai taua atu ou fili, ka ko latou kolā e takalia‵lia ki a koe, ko ‵teke atu. Ko fai olotou togafiti ‵funa ki ou tino; kae fai foki olotou pulepulega ma‵sei, ki tino kolā e puipui ne koe. Olotou muna, ‘O‵mai ke fakamasei ne tatou te lotou fenua.’” (Sala. 83:2-4) E tau o puipui te gafa o te fanau a te fafine mai fakamaseiga mo fakalailaiga. Ke fakataunu a te mea tenei, ne fai ne Ieova a fakatokaga mai lalo i te tulafono kolā ka puipui ei te fakataunuga o tena fuafuaga.

3, 4. (a) Ne kamata anafea o fakagalue te feagaiga o te Tulafono, kae ne a mea ne lotoma‵lie te fenua o Isalaelu ke fai? (e) Ne fai mo a te feagaiga o te Tulafono?

³ I te gasolo aka o tokouke a tamaliki a Apelaamo, Isaako, mo Iakopo ki te fia miliona, fai ei ne Ieova se fenua mai i a latou—te fenua mua o Isalaelu. E auala i a Mose, ne fai ei ne Ieova se feagaiga mo latou pelā me se fenua mai te tukuatuga ki a latou a te Tulafono, kae ne lotoma‵lie te fenua o Isalaelu ki fakanofoga o te feagaiga tenā. E fai mai te Tusi Tapu: “Tela, ave ei ne ia te tusi o te feagaiga ko oti ne tusi ki ei a fakatonuga katoa a te Aliki [Ieova], o faitau mo te leo maluga ki te fenua. Ne tali mai latou penei, ‘Ka faka‵logo matou ki te Aliki [Ieova], kae ka fai ne matou a mea katoa ko oti ne fakatonu mai ne ia.’ Tenā ne ave ei ne Mose a toto i loto i te tanoa o apiapi i luga o tino. Ana muna, ‘Tenei te toto e fakamau ei te feagaiga a te Aliki [Ieova] ne fai mo koutou i te taimi ne tuku atu ei ne ia a fakatonuga.’”—Eso. 24:3-8.

⁴ Ne kamata o fakagalue te feagaiga o te Tulafono i te Mauga o Sinai i te 1513 T.L.M. E auala i te feagaiga tenā, ne fai ei te fenua mua o Isalaelu pelā me se fenua filifilia o te Atua. I te taimi nei, ko fai a Ieova pelā me ko te ‘lotou Famasino, te lotou tino Fai-tulafono, mo te lotou Tupu.’ (Isa. 33:22, NW) E fakaasi mai i te tala fakasolopito o Isalaelu a mea ne tupu i te taimi ne seki tau‵tali io me ‵teke atu latou ki tulaga amio‵tonu o te Atua. Ona ko te a‵vaga mo tino fapaupau kae ‵kau ki tapuakiga ‵se e tapu i te tulafono, ne fai eiloa te mea tenā ke puipui ei te gafa o Apelaamo ke mo a e fakalailaigina.—Eso. 20:4-6; 34:12-16.

5. (a) Se a te avanoaga ne ‵tala mai ne te feagaiga o te Tulafono mō te fenua o Isalaelu? (e) Kaia ne ‵teke atu ei te Atua ki Isalaelu?

⁵ Ne tuku mai foki i te feagaiga o te Tulafono se fakatokaga mō se faitaulaga, e fakaata mai i ei se fakatokaga e lasi atu i te taimi mai mua. (Epe. 7:11; 10:1) A te tonuga loa, ne maua ne te fenua o Isalaelu mai te feagaiga tenā se avanoaga mo se tauliaga fakapito ke fai mo fai se malo o “faitaulaga,” māfai e faka‵logo latou ki tulafono a Ieova. (Faitau te Esoto 19:5, 6.) Kae ne fakatamala te fenua o Isalaelu o tau‵tali i te manakoga tenei. I lō te fakatāua ne latou te oko mai o te Mesia telā ko te vaega muamua o te fanau a Apelaamo, ne ‵teke atu te fenua ki a ia. I te fakaotiga, ne ‵teke atu te Atua ki te fenua tenā.

6. Se a te mea ne fakataunu ne te Tulafono?

⁶ A te fakatamala o te fenua o Isalaelu o tumau i te fakamaoni ki a Ieova kae ‵lago atu ki a latou katoa kolā e aofia i se malo o faitaulaga, ne seki fakauiga i ei me ne sē ‵lei te fakatokaga o te Tulafono. Ne ‵tau o puipui ne te Tulafono a te fanau kae ‵taki atu a tino ki te Mesia. Ne fakataunu eiloa te tulafono i te taimi ne vau ei te Keliso kae ko iloa atu a ia. E fai mai te Tusi Tapu: “Me i a Keliso ko  te fakagataga o te Tulafono.” (Loma 10:4) Kae tenei la te fesili: Ko oi la ka maua ne latou te avanoaga ke fai mo fai se malo o faitaulaga? Ne fakatoka ne Ieova te suā feagaiga mai lalo i te tulafono ke fakatu se fenua fou.

7. Se a te mea ne fai mai ne Ieova e auala i a Ielemia e uiga ki se feagaiga fou?

⁷ I se taimi leva ‵ki mai mua o fakaseai te feagaiga o te Tulafono, ne fai mai a Ieova e auala i te pelofeta ko Ielemia me ka fai ne Ia “se feagaiga fou” mo te fenua o Isalaelu. (Faitau te Ielemia 31:31-33.) Ka sē ‵pau a te feagaiga tenā mo te feagaiga o te Tulafono me ka sē manakogina i ei taulaga o manu ke fakamagalo ki ei agasala. Ka fai pefea a te mea tenā?

8, 9. (a) Se a te mea e fakataunu ne te toto maligi o Iesu? (e) Se a te avanoaga ne matala mai mō latou kolā e aofia i te feagaiga fou? (Ke onoono ki te ata i te kamataga.)

⁸ I senitenali fakamuli ifo, ne kamata ne Iesu te ‵Kaiga a te Aliki i te Afiafi i a Nisani 14, 33 T.A. I tena faipatiga e uiga ki te ipu uaina, ne fai atu a ia ki ana apositolo fakamaoni e toko 11: “E fakauiga a te ipu tenei ki te feagaiga fou e auala i toku toto, telā ka ‵ligi ki tua mō koutou.” (Luka 22:20) E siki mai i te tala a Mataio a pati a Iesu ne fai e uiga ki te uaina: “Ko tena uiga ko toku ‘toto o te feagaiga,’ telā ka ‵ligi ki tua mō tino e tokouke ke fakamagalo ei agasala.”—Mata. 26:27, 28.

⁹ E fakatumau ne te toto maligi o Iesu a te aoga o te feagaiga fou. E fai foki ne te toto tenā ke mafai o tasi te taimi e fakamagalo ei agasala kae aoga mō taimi katoa. A Iesu e sē se vaega o te feagaiga fou. Me e seai sena agasala, e se manakogina ne ia se fakamagaloga. Kae ne mafai ne te Atua o fakaaoga te aoga o te toto maligi o Iesu ki te fanau a Atamu. Ne mafai foki o puke ne ia a tino fakamaoni e pelā me ne “tamapuke” mai te fakaekega o latou ki te agaga tapu. (Faitau te Loma 8:14-17.) I te kilo atu o te Atua ki ei e pelā me seai ne olotou agasala, ka fai latou pelā mo Iesu, te Tama a te Atua telā e seai se agasala. Ka fai a tino fakaekegina konei mo “sui . . . i te ‵kau fakatasi mo Keliso” kae maua ne latou te avanoaga ke fai mo fai se malo o “faitaulaga.” Tenei te tauliaga ne ‵tau o maua ne te fenua o Isalaelu mai lalo o te Tulafono.E uiga ki ‘sui e ‵kau fakatasi mo Keliso,’ ne fai mai te apositolo ko Petelu: “Koutou ‘se matakāiga ne filifiligina, ne faitaulaga kolā ka fai mo tupu, se fenua tapu, ne tino fakapito o te Atua, ke folafola atu ne koutou ki fenua katoa a galuega fakaofoofogia’ a te tino telā ne kalaga ne ia koutou mai te pouliga ki tena mainaga fakaofoofogia.” (1 Pe. 2:9) Ko oko eiloa i te tāua o te feagaiga fou! Me e fai i ei a soko o Iesu mo fai te lua o vaega o te fanau a Apelaamo.

10. Ko te taimi fea ne kamata ei o fakagalue te feagaiga fou, kae kaia ne seki kamata ei mai mua o te taimi tenā?

¹⁰ Ko te taimi fea ne kamata ei o fakagalue te feagaiga fou? Ne seki kamata i te taimi ne faipati a Iesu e uiga ki ei i tena toe po i te lalolagi. Ko te mea ke fakagalue te feagaiga fou, e ‵tau o maligi te toto o Iesu kae avatu te aoga o tena toto ki a Ieova i te lagi. E se gata i ei, e ‵tau o ‵ligi ifo te agaga tapu ki ‘sui kolā e ‵kau fakatasi mo Keliso.’ Tela la, ne kamata o fakagalue te feagaiga fou i te Penitekoso 33 T.A. i te taimi ne fakaeke ei a soko a‵lofa fakamaoni o Iesu ki te agaga tapu.

11. Ne fai pefea ne te feagaiga fou ke mafai ne tino Iutaia mo tino mai Fenua Fakaa‵tea o fai mo vaega o te Isalaelu faka-te-agaga, kae tokofia e aofia i te feagaiga fou?

¹¹ E tigā eiloa e fai pelā i te feagaiga o te Tulafono ne “fakaseaoga” i te taimi ne faka‵pula mai ei ne Ieova e auala i a Ielemia me  ka fai ne Ia se feagaiga fou mo Isalaelu, ne seki gata tonu atu i ei ke oko eiloa ki te taimi ne kamata ei o fakagalue te feagaiga fou. (Epe. 8:13) I te taimi ne fakagalue ei te feagaiga fou, ne ‵pau eiloa te kilokiloga a te Atua ki tino tali‵tonu Iutaia mo tino mai fenua fakaa‵tea kolā seki pilitome, me i te pilitome o latou ko ‘te pilitome i te loto ne te agaga kae sē ko te tulafono tusia.’ (Loma 2:29) Mai te faiga o te feagaiga fou mo latou, ne tuku atu ne te Atua ana tulafono “ki loto i lotou mafaufau, kae ka tusi [ne ia] i loto i olotou loto.” (Epe. 8:10) A te aofaki o latou kolā e aofia i te feagaiga fou e toko 144,000, e fakatu aka i ei se fenua fou—“te Isalaelu a te Atua”—te Isalaelu faka-te-agaga.—Kala. 6:16; Faka. 14:1, 4.

12. Ne a fakatusatusaga e mafai o fai i te va o te feagaiga o te Tulafono mo te feagaiga fou?

¹² E faka‵tusa aka pefea ne tatou a te feagaiga o te Tulafono mo te feagaiga fou? A te feagaiga o te Tulafono ne fai i te va o Ieova mo te fenua o Isalaelu; a te feagaiga fou se mea i te va o Ieova mo te Isalaelu faka-te-agaga. A Mose ko te sokoga o te feagaiga mua, kae ko Iesu ko te Sokoga o te feagaiga fou. A te feagaiga o te Tulafono ne faka‵mautakitaki ki toto o manu, kae ko te feagaiga fou ne faka‵mautakitaki ki te toto maligi o Iesu. E pelā mo te fenua o Isalaelu ne fakatoka e auala i te feagaiga o te Tulafono mai lalo i a Mose, a latou kolā e aofia i te feagaiga fou e fakatoka mai lalo i a Iesu—te Ulu o te fakapotopotoga.—Efe. 1:22.

13, 14. (a) Se a te sokoga o te feagaiga fou ki te Malo? (e) Se a te mea e manakogina mō te Isalaelu faka-te-agaga ke mafai o pule fakatasi mo Keliso i te lagi?

¹³ E isi se sokoga o te feagaiga fou ki te Malo me e fakatu aka i ei se fenua tapu telā e taulia o fai mo fai a tupu mo faitaulaga i te Malo faka-te-lagi tenā. A te fenua tenā ko te lua o vaega o te fanau a Apelaamo. (Kala. 3:29) Tela la, e fakamalosi ne te feagaiga fou a te feagaiga ki a Apelaamo.

¹⁴ E toe tasi te vaega o te Malo koi ‵tau o fakatu aka. E fakatu aka ne te feagaiga fou a te Isalaelu faka-te-agaga kae tuku mai i ei se fakavae mō ana tino ke fai mo “sui . . . i te ‵kau fakatasi mo Keliso.” Tela la, e manakogina se fakatokaga mai lalo o te tulafono, e fakatalia ei latou ke ‵kau fakatasi mo Iesu i tena Malo e pelā me ne tupu mo faitaulaga i te lagi.

15. Se a te feagaiga totino ne fai ne Iesu mo ana apositolo fakamaoni?

¹⁵ Mai tua o te kamataga ne Iesu a te ‵Kaiga a te Aliki i te Afiafi, fai ei ne ia se feagaiga mo ana soko fakamaoni, kae ne taku sāle pelā me ko te feagaiga o te Malo. (Faitau te Luka 22:28-30.) E ‵kese mai i nisi feagaiga kolā e aofia i ei a Ieova, a te mea tenei se feagaiga totino i te va o Iesu mo ana soko fakaekegina. I te faimaiga, “e pelā eiloa mo te feagaiga ko oti ne fai ne toku Tamana ki a au,” e manino ‵lei me ne fakasino atu a Iesu ki te feagaiga telā ne fai ne Ieova mo ia ke fai mo “faitaulaga ki te se-gata-mai e pelā eiloa mo Mekisateko.”—Epe. 5:5, 6.

16. Se a te mea ne fai ne te feagaiga o te Malo mō Kelisiano fakaekegina?

¹⁶ A apositolo fakamaoni e toko 11 ne ‘‵piki eiloa ki a Iesu i ana tofotofoga.’ E fakatalitonu atu ki a latou a te feagaiga o te Malo me ka ‵nofo fakatasi latou mo ia i te lagi kae saga‵saga i nofogaaliki o pule pelā me ne tupu kae tavini pelā me ne faitaulaga. Tela la, e se ko te toko 11 fua konā e maua ne latou te tauliaga tenā. Ne fakasae atu a Iesu ki te apositolo ko Ioane i se fakaasiga kae fai atu: “Ka talia ne au te tino telā e manumalo ke saga‵saga fakatasi mo au i toku nofogaaliki, e pelā eiloa mo au ne manumalo kae ne saga‵saga fakatasi māua mo toku Tamana i tena nofogaaliki.” (Faka. 3:21) Tela la, a te feagaiga o te Malo ne fai mō Kelisiano fakaekegina  e toko 144,000. (Faka. 5:9, 10; 7:4) Tenei te feagaiga telā e fakatalia ei latou mai lalo o te tulafono ke pule fakatasi mo Iesu i te lagi. E tai ‵pau a te mea tenei mo se fafine mai i se kāiga o tupu telā ka avaga ki se tupu kae ‵kau fakatasi i tena pulega. A te tonuga loa, e fakasino atu te Tusi Tapu ki Kelisiano fakaekegina e pelā me ko “te avaga” a Keliso, “se tamāfine ‵ma” telā ne tauto ke avaga ki te Keliso.—Faka. 19:7, 8; 21:9; 2 Koli. 11:2.

17, 18. (a) Taku mai a feagaiga e ono kolā ne sukesuke tatou ki ei kae tau atu ki te Malo. (e) Kaia e mafai ei o ‵mautakitaki ‵tou fakatuanaki ki te Malo?

¹⁷ E tasi io me uke atu a vaega tāua o te Malo e ‵soko tasi mo feagaiga katoa kolā ne mafau‵fau tatou ki ei i mataupu e lua konei. (Ke onoono ki te pokisi “Te Auala ka Fakataunu ei ne te Atua a Tena Fuafuaga.”) E faka‵mafa mai i te mea tenei i fakatokaga o te Malo e fakavae katoatoa ki feagaiga mai lalo o te tulafono. Tela la, e maua ne tatou a pogai tonu ke tali‵tonu katoatoa ki te Malo faka-Mesia e pelā me ko te mea faigaluega telā e fakaaoga ne te Atua ke fakataunu a tena fuafuaga mō te lalolagi mo tino.—Faka. 11:15.

¹⁸ E mata, e ‵tau o fakalotolotolua tatou i mea kolā e fakataunu ne te Malo ke maua i ei ne tino a fakamanuiaga se-gata-mai? Mai te talitonu katoatoa ki ei, e mafai o folafola atu ne tatou mo te loto talitonu me i te Malo o te Atua ko te faka‵leiga tumau fua e tasi ki fakalavelave katoa o tino. Ke loto finafinau tatou o sau‵tala fakatasi mo nisi tino ki te munatonu tenā!—Mata. 24:14.