‵Talo

7 E Mata, ka Lagona Kae Tali Mai ne te Atua?

E FAKAASI mai i te fesili mai luga nei se fakatokaga gali e uiga ki te fiafia mo te fia iloa. E fakaasi mai i te Tusi Tapu me i a Ieova e fakalogologo eiloa ki ‵talo i aso nei. A te lagona mo te sē lagona ne ia a ‵tou ‵talo e fakalagolago malosi eiloa ki a tatou.

Ne taku fakamasei ne Iesu a takitaki lotu i ana aso kolā ne ‵talo fakaloi‵loi atu; ne fia fakaasi atu fua te lotou fia amio‵tonu i mua o tino. Ne fai mai a ia me ka maua ne vaegā tagata penā a “te lotou taui,” ko tena uiga, ko mea fua kolā e ma‵nako malosi latou ki ei, ko tino ke ‵saga atu ki a latou, kae e se ko te mea telā e ‵tau o maua, ke lagona ne te Atua. (Mataio 6:5) E penā foki i aso nei, e ‵talo atu a nisi tino e ‵tusa mo te mea e ma‵nako latou ki ei kae e se ko te loto o te Atua. Kafai e se ‵saga atu latou ki fakatakitakiga i te Tusi Tapu kolā ne sau‵tala tatou ki ei, ka se lagona eiloa ne te Atua olotou ‵talo.

Kae e a koe? E mata, ka lagona kae tali mai te Atua ki au ‵talo? E se faka‵na a te tali ki tou telega, fenua io me ko tou tulaga i te fenua. E fakatalitonu mai te Tusi Tapu, penei: “Se mea tonu i te Atua e se fakailoga tino. So se tino o so se fenua e mataku ki te Atua, kae amiotonu foki, e talia faeloa a ia ne te Atua.” (Galuega 10:34, 35) E mata, e fakamatala mai ne pati konā a koe? Kafai e mataku koe ki te Atua, ka fakatāua malosi ne koe a ia, kae mataku ma fakafanoanoa ne koe a ia. Kafai e amiotonu koe, e ‵tau o fai ne koe a te mea telā e tonu ki te Atua i lō te fai o tou loto io me ko mea e ma‵nako ki ei a tino. E mata, e manako koe ke fakalogologo mai te Atua ki au ‵talo? E fakaasi mai i te Tusi Tapu a te auala ke ‵talo atu i ei ko te mea ke fakalogologo mai te Atua. *

E tonu, e ma‵nako a tino e tokouke ke tali mai ne te Atua olotou ‵talo i se auala fakavavega. Kae i taimi o te Tusi Tapu, ne fai foki ne te Atua a vavega. I nisi taimi, e fia senitenali e ‵teka atu, kae fatoa fai a te suā vavega. E se gata i ei, e fakaasi mai i te Tusi Tapu me ne oti atu a te vaitaimi o vavega mai tua o aso o te kau apositolo. (1 Kolinito 13:8-10) E mata, e fakauiga a te mea tenei me e se tali mai ne te Atua a ‵talo i aso nei? Ikai, e se penā loa! Mafaufau ki nisi ‵talo kolā e tali mai ne ia.

E tuku mai ne te Atua te poto. A Ieova ko te Mafuaga tāua o te poto tonu. E kaimalie a ia o tuku mai ki tino kolā e ma‵nako ki tena takitakiga kae fia ola e ‵tusa mo te mea tenā.​—Iakopo 1:5.

E tuku mai ne te Atua tena agaga tapu mo mea aoga kolā e maua mai i ei. A te agaga tapu ko te malosi galue o te Atua. E seai aka eiloa se mea e sili atu tena malosi i ei. E mafai o fesoasoani mai ke kufaki tatou i mea faiga‵ta. E mafai o faka‵fonu ne ia tatou ki te filemu māfai e fe‵paki tatou mo fakalavelave. E fesoasoani mai ke ati aka ne tatou a nisi uiga ‵gali. (Kalatia 5:22, 23) Ne fakatalitonu atu ne Iesu ki ana soko me e tuku atu ne te Atua a te meaalofa tenei mo te kaimalie.​—Luka 11:13.

E tuku mai ne te Atua te malamalama ki tino kolā e ‵sala atu ki a ia. (Galuega 17:26, 27) I te lalolagi kātoa, e isi ne tino kolā e ‵sala tonu atu ki te munatonu. E ma‵nako latou ke iloa ne latou te Atua​—ko oi tena igoa, se a tena fuafuaga mō te lalolagi mo tino, mo te auala e mafai ei ne latou o fakapili‵pili atu ki a ia. (Iakopo 4:8) E fetaui faeloa a tino o Ieova mo vaegā tino penā kae e fia‵fia o fakaasi atu ki a latou a tali i te Tusi Tapu ki vaegā fesili penā.

E mata, tenā eiloa te pogai ne maua ei ne koe te mekesini tenei? E mata, e ‵sala atu koe ki te Atua? Kāti tenei eiloa te auala e tali ei ne ia au ‵talo.

[Fakamatalaga fakaopoopo]