A te tagata muamua ko Atamu, ne ola i senitenali e uke. Kae i te fakaotiga, ne gasolo a ia o matua kae mate. Talu mai te taimi tenā, ne taumafai a tino o fakaaoga a auala e uke ke sē oko latou ki te tulaga matua. Kae seki ai eiloa se tino ne sao mai te mate. Kaia? Ne gasolo aka a Atamu o matua kae mate i a ia ne agasala mai te sē fakalogo ki te Atua. E olo aka tatou o ma‵tua me ne maua ne tatou te agasala mai i a Atamu mo tena ‵togi ko te mate.​—Faitau te Kenese 5:5; Loma 5:12.

Ko te mea ke maua ne tatou te ola se-gata-mai, e manakogina ne tatou se tino ke ‵togi ne ia se togiola mō tatou. (Iopu 33:24, 25) A te togiola se togi e ‵tau o ‵togi ke fakasaoloto ei se tino, kae mō tatou e manakogina ke fakasaoloto tatou mai te mate. (Esoto 21:29, 30) Ne ‵togi ne Iesu te togi i te taimi ne mate ei mō tatou.​—Faitau te Ioane 3:16.

E se ko tino katoa ka fakasaoloto mai masaki mo te tulaga matua. A te tonuga loa, ko tino kolā ne ‵teke ki te Atua, e pelā mo Atamu, ka sē maua ne latou te ola. Ko tino fua kolā e fakamagalogina olotou agasala ka maua ne latou te ola se-gata-mai.​—Faitau te Isaia 33:24; 35:3-6.

E ‵tau mo tatou o gasue‵sue ko te mea ke fakamagalogina ‵tou agasala. E manakogina ke iloa ne tatou te Atua mai te sukesuke ki tena Muna, ko te Tusi Tapu. E akoako mai i ei ki a tatou a te auala e maua ei ne tatou se olaga e ‵lei atu, mo te auala foki e maua i ei ne tatou a te taliaga a te Atua mo te ola se-gata-mai.​—Faitau te Ioane 17:3; Galuega 3:19.