FAKAAKOAKO KI TE LOTOU FAKATUANAKI | NOA

Ne Fakasao a ia “Fakatasi mo Nisi Tino e Tokofitu”

A NOA mo tena kāiga ne ‵sai fakatasi i te taimi ne ‵to ‵lotu ifo ei te vaiua. Ke fakaataata ne koe a latou, e lavea atu olotou foliga i te mainaga o se molī sinu, e ‵pula toka atu olotou mata kae fakalogo‵logo ki te ‵sali ifo o vai e uke ki te tuafale kae ‵poko ki te kaokao o te vaka. Kāti ne logoā ‵ki eiloa.

I te taimi ne kilo atu ei a Noa ki mata o tena kāiga pele—tena avaga fakamaoni mo ana tama ta‵gata fakamaoni e tokotolu fakatasi mo olotou avaga—e seai se fakalotolotolua me ne ‵fonu tena loto i te fakafetai. I te toe taimi faigata ne iloa ne tino, ne seki faigata ki a ia me e ‵nofo fakatasi eiloa a ia mo tino kolā ne alofa malosi a ia ki ei. Ne ‵sao katoa latou kae seai se tino ne pakia. E mautinoa ‵lei me ne fai ne ia se ‵talo fakafetai a tena kāiga, ne fai eiloa ne ia ki luga ko te mea ke lagona ne latou.

A Noa se tagata e lasi tena fakatuanaki. Ona ko te fakatuanaki o Noa ne puipui ei a ia mo tena kāiga ne tena Atua, ko Ieova. (Epelu 11:7) E mata, ne gata atu te lotou fakatuanaki i te taimi ne kamata ei o ‵to ifo te vaiua? E ‵kese mai i ei, ka ma‵nako malosi latou ki te uiga tenā i aso faiga‵ta i te taimi mai mua. E penā foki tatou i taimi konei e ‵numi kae manava‵se valevale ei a tino. Tela la, ke onoono aka tatou me ne a mea e mafai o tauloto ne tatou mai te fakatuanaki o Noa.

“FASEFULU AO FASEFULU PO”

Ne tumau eiloa te ‵to ‵lotu o vaiua i te “fasefulu ao fasefulu po.” (Kenese 7:4, 11, 12) Ne fanaka faeloa a te vai. Ne lavea ne Noa i tena Atua, ko Ieova, e puipui ne ia a tino amio‵tonu kae fakasala a tino amio ma‵sei i te taimi eiloa e tasi.

Ne fakagata ne te Lolo se ‵tekeatuga telā ne tupu i va o te kau agelu. Ona ko te fakamalosiga a te uiga kaimanako o Satani, ne tiakina ei ne agelu e tokouke a “koga kolā ne ‵tau o ‵nofo” i ei i te lagi ko te mea ke ‵nofo fakatasi latou mo fāfine o te lalolagi kae fai olotou tamaliki kolā ne fakaigoa ki Nefilimi. (Iuta 6; Kenese 6:4) E seai se fakalotolotolua me ne fiafia ‵ki eiloa a Satani i te salalauga o te ‵tekeatuga tenā, me ne fakamasei malosi atu ki tino, te ‵toe mea tāua a Ieova ne faite i te lalolagi.

Kae i te taimi ne fanaka ei te vai, ne faimālō a agelu ‵teke ke tiakina olotou foitino faka-te-foitino kae toe ‵foki atu ki koga o agaga, kae ne seki toe talia ke maua a foitino faka-te-foitino. Ne tiakina ne latou olotou avaga mo tamaliki ke ‵mate i te lolo fakatasi mo tino.

Mai i aso o Enoka, toeitiiti se fitu senitenali mai mua atu, ne fakailoa atu ne Ieova ki tino me ka fakaseai ne Ia a tino amio ma‵sei, mo tino e se amioatua. (Kenese 5:24; Iuta 14, 15) Talu mai te taimi tenā, a tino ne gasolo aka fua o ma‵sei atu, fakamasei te lalolagi kae faka‵fonu ki amioga fakasauā. Kae nei la ko ‵mate latou. E mata, ne fia‵fia a Noa mo tena kāiga ki te ‵mate o tino konā?

Ikai! E penā foki te lotou Atua alofa fakamagalo. (Esekielu 33:11) Ko oti ne fai Ieova a mea katoa ke faka‵sao ei a tino e tokouke. Ko oti ne fakatonu atu a ia ki a Enoka ke fakailoa atu ki tino, kae fakatonu atu ki a Noa ke faite te vaka. Ko oti ne galue ‵mafa a Noa mo tena kāiga i te galuega lasi ‵ki tenā i te fia sefulu tausaga, kae mafaufau ‵mafa e uiga ki tino. Tenā, ne fakatonu atu ei a Ieova ki a Noa ke tavini atu e pelā me se “tino talai o te amiotonu.” (2 Petelu 2:5) E pelā mo Enoka, ne fakailoa atu ne ia ki tino e uiga ki te fakamasinoga telā ka oko mai ki luga i te lalolagi.  Kae ne ‵saga atu pefea latou ki ei? Ne fai mai a Iesu, telā ne matea ne ia mai te lagi a mea ne ‵tupu, e uiga ki tino i aso o Noa: “Ne seki fia ‵saga atu latou ki ei ke oko eiloa ki te taimi ne poko ei te Lolo, tapea‵pea atu ei latou keatea.”—Mataio 24:39.

Fakaataata i tou mafaufau a te tulaga o Noa mo tena kāiga i te 40 aso muamua eiloa i te otiga ne ‵pono ne Ieova a te mataloa o te vaka. A koi ‵to ‵lotu ifo a vaiua ki luga i te vaka i aso katoa, kāti ne fai ne te tokovalu o latou se fakasologa o mea e fai ne latou i aso takitasi—tausi atu te suā tino ki te suā tino, ‵saga atu ki te lotou koga ‵nofo, kae tausi atu ki manu i koga kolā e ‵nofo i ei. I te taimi e tasi, ne galulu te foitino kātoa o te vaka kae takasese. Ko gasue te vaka! Ne laga te vaka i te sua o te vai, kae ne fanaka faeloa o maluga ke oko ki te taimi “ko lagalaga ei mai luga o te laukele.” (Kenese 7:17) Se fakaasiga fakaofoofogia o te malosi o te Atua Malosi Katoatoa, ko Ieova!

Kāti ne loto fakafetai eiloa a Noa—e se ona ko te faka‵saoga fua o ia mo tena kāiga, kae mō te alofa fakamagalo foki o Ieova i te fakaaogaga o latou ke fakailoa atu ki tino kolā ne ‵mate mai tua o te vaka. Kāti ne foliga mai me e seai se taui o te ga‵lue fi‵ta o latou i tausaga konā. I tino ko oko eiloa i te sē fia ‵saga mai! Mafaufau la—kāti e isi ne taina, tuagane, mo fakatama a Noa ne ola a koi tuai o oko mai te Lolo; e seai eiloa se tino ne fakalogo ki a ia, kae na ko tino eiloa o tena kāiga tonu ne faka‵logo ki a ia. (Kenese 5:30) Nei la, te ‵nofo atu o te tokovalu konā i te vaka ke ‵sao latou, e mautinoa ‵lei me ne fakamafanafana atu ki a latou a te ‵toe mafau‵fau ki taimi katoa ne fakamāumāu ne latou o tuku atu ki tino penā se avanoaga ke ‵sao latou.

Talu mai i aso o Noa, ne seki ‵fuli eiloa a Ieova. (Malaki 3:6) Ne fakamatala mai ne Iesu Keliso i ‵tou taimi i aso nei e tai ‵pau eiloa mo “aso o Noa.” (Mataio 24:37) E matea faka‵lei a ‵tou vaitaimi nei, se taimi o fakalavelave ‵lasi telā ka oti atu i te fakaseaiga o te lalolagi sē fakamaoni tenei. I aso nei, e fakailoa atu foki ne tino o te Atua se fekau tai ‵pau ki tino katoa kolā ka faka‵logo mai. E mata, ka talia ne koe te fekau tenā? Kafai ko oti ne talia ne koe a te ‵tonu o te fekau fakaola tino tenā, e mata, ka kau atu koe ki te fakailoatuga o te fekau tenā ki nisi tino? Ne fai ne Noa mo tena kāiga se fakaakoakoga mō tatou katoa.

 NE “‵SAO . . . LATOU I LUGA I TE VAI”

A koi tapeapea te vaka i te moana sousou tenā, e mautinoa me e lagona eiloa ne latou kolā i loto a te ‵tagi i‵tia o laupapa ‵lasi. E mata, ne manavase a Noa ki te ‵lasi o galu io me ko te vaka mana maofa? Ikai. E mafai o ‵sae aka a manavasēga penā i aso nei i tino sē tali‵tonu, kae ko Noa e se fakalotolotolua. E fai mai te Tusi Tapu: “Ona ko te fakatuanaki, ne fakaasi atu ei ne Noa tena mataku ki te Atua i te faitega o te vaka.” (Epelu 11:7) Fakatuanaki ki te a? Ne fai ne Ieova se feagaiga, ke faka‵sao a Noa mo mea ola katoa kolā ne ‵nofo fakatasi mo ia i te Lolo. (Kenese 6:18, 19) E mata, e se mafai ne te Tino telā ne faite ne ia te iunivesi, lalolagi, mo mea ola katoa i ei o tausi te vaka ke sē maofa? E mafai! Ne ‵tau o talitonu a Noa ki a Ieova me e tausi eiloa ki Tena feagaiga. Kae tonu eiloa, i a ia mo tena kāiga ne “‵sao . . . i luga i te vai.”—1 Petelu 3:20.

Mai tua o te 40 ao mo te 40 po, ne gata ei te ‵to o te vaiua. I ‵tou kalena i aso nei, kāti se taimi i a Tesema i te 2370 T.L.M. Kae ko te malaga a te kāiga i luga i te vaka e seki gata. Koi tapeapea tokotasi eiloa te vaka tenā mai luga i ulu o mauga, kae ‵fonu i mea ola. (Kenese 7:19, 20) Kāti e mafaufau tatou me ko tuku atu ne Noa a te galuega tai ‵mafa ki ana tamaliki ta‵gata ko Semu, Hamo, mo Iafeta ko te mea ke fagai, tausi ke ‵ma, kae tausi ke ma‵losi a manu katoa. E tonu, ko te Atua foki telā ne fai ne ia a manu fe‵kai katoa ke ‵lata kae ke ulu ki te vaka ko te mea ke mafai o tausi atu ki a latou i se tulaga penā e ‵tusa mo te leva o te Lolo. a

E manino ‵lei me ne tausi faka‵lei ne Noa se tala o mea ne ‵tupu. E fakaasi mai i ei a te taimi ne kamata kae oti atu ei a vaiua. E fakaasi mai foki i ei me ne ufi ne vai a te lalolagi i aso e 150. I te fakaotiga loa, ne fanaifo te vai o ‵masa. I te aso e tasi, ne kasa te vaka i te ulu o te “atumauga o Alalata,” e tu i Turkey i aso nei. A te taimi tenā kāti ko Apelila i te 2369 T.L.M. I a Iuni, i te 73 aso mai tua ifo, ne ‵sae ei a ulu o mauga. I a Setema, i te tolu masina fakamuli ifo, ne fakaiku aka ne Noa ke tapale a nisi koga o te vaka kolā e ‵pono, io me ko te tuafale. Ne manuia eiloa te galuega ‵mafa tenā me ko sae mai te mainaga mo te ea fou. Mai mua atu, ne kamata a Noa o tofotofo aka me ko ‵lei te koga i tua ma nofo a tino i ei io me ikai. Ne fakaeva ne ia te oleva, telā ne vau kae fano mō se taimi toetoe, kāti e tutu fua i te vaka i taimi e fanofano ei; oti aka, fakaeva ei ne Noa se lupe, kae ne fokifoki mai faeloa ki a Noa ke oko ki te taimi ko maua ei sena koga mo ana nofo.—Kenese 7:24–8:13.

E seai se fakalotolotolua me koi saga malosi atu eiloa a Noa ki mea faka-te-agaga i te fakasologa o ana mea e fai. E mafai o fakaataata ne tatou a te kāiga e maopoopo faeloa o ‵talo fakatasi kae sau‵tala e uiga ki te puipuiga a te lotou Tamana faka-te-lagi. Ne fakalagolago a Noa ki a Ieova i so se fakaikuga tāua e fai ne ia. Ke oko foki ki te taimi ne lavea ei ne Noa a te laukele me ko “‵masa pakupaku” a te vai—mai tua o se tausaga tupu i loto i te vaka—ne seki ‵tala eiloa ne Noa a te mataloa kae ulu ki tua mo te vaka tenā. (Kenese 8:14) Ikai, ne faka‵tali eiloa a ia ki te fakatonuga mai i a Ieova!

E mafai ne ulu o kāiga i aso nei o tauloto a mea e uke mai te tagata fakamaoni tenā. A iae fakatoka faka‵lei, e galue malosi, e loto kufaki, kae puipui ne ia a latou kolā e ‵nofo mai lalo i tena tausiga. Kae sili i mea katoa, e fakamuamua ne ia te faiga o te loto o Ieova i mea katoa. Kafai e fakaakoako tatou ki te fakatuanaki o Noa i feitu konā, ka aumai eiloa ne tatou a fakamanuiaga ki tino katoa kolā e a‵lofa tatou ki ei.

“ULU KI TUA MO TE VAKA”

I te fakaotiga, ne oko mai ei te fakatonuga a Ieova. “Ulu ki tua mo te vaka,” ko ana pati ki a Noa, “fakatasi mo tau avaga, au tamaliki tagata, mo olotou avaga.” Ne faka‵logo te kāiga o ulu ki tua, kae tau‵tali atu a manu katoa. Pefea la? Ne fetuli valevale? Ikai loa! E fai mai te tala me “ne solo ifo ki tua mo te vaka i olotou itukāiga eiloa.” (Kenese 8:15-19) I te ‵toga ki tua, ma‵nava ki te ea fou mai mauga kae kilo atu ki ulu mauga o Alalata, lavea ei ne Noa mo tena kāiga se lalolagi ‵ma pakipaki. Ko ‵galo atu a Nefilimi, amioga fakasauā, agelu ‵teke, mo tino ma‵sei katoa konā! b Ne maua ne tino se avanoaga ke fai se kamataga fou.

Ne iloa ne Noa a te mea e ‵tau o fai. Ne kamata tou  tagata o tapuaki. Ne faite ne ia se fatafaitaulaga kae fakaaoga a nisi manu kolā e ‵ma i te kilokiloga a te Atua—kolā ne aumai ne latou i luga i te vaka e “fitu vasoa”—kae ofo atu se taulaga ‵sunu ki a Ieova. (Kenese 7:2; 8:20) E mata, ne fakafiafia atu te tapuakiga tenā ki a Ieova?

E tali mai te Tusi Tapu i pati gali konei: “Ne fiafia te Aliki [Ieova] ki te manogi o te taulaga.” A te ‵mae telā ne oko ki te loto o te Atua i te faka‵fonuga ne tino a te lalolagi ki amioga fakasauā ne sui ki lagonaga filemu kae fiafia i te kiloatuga ki se kāiga o tino tapuaki fakamaoni i te lalolagi kolā e ‵mautakitaki i te faiga o tena loto. Ne seki fakamoemoe a Ieova ke ‵lei katoatoa latou. E fai mai te fuaiupu foki tenā: “I te taimi koi foniki ei a ia, a tena mafaufau e se ‵lei.” (Kenese 8:21) Ke mafaufau ki te auala ne fakaasi malosi atu ei ne Ieova a tena kufaki ona ko te alofa ki tino.

Ne tapale ne te Atua a te fakamalaiaga ki te laukele. I aso ne ‵teke atu ei Atamu mo Eva, ne folafola atu ne te Atua a te fakamalaiaga tenā, ne faigata ei a te fakagaluegaga o te laukele. Ko oti ne fakaigoa ne te tamana o Noa, ko Lameko, a tena tama tagata ki a Noa, ko tena uiga “malōlō,” io me “fakamafanafana,” kae folafola mai me ka ‵taki atu ne tena tama a tino ki se taimi malōlō mai te fakamalaiaga tenā. Kāti ne fiafia eiloa a Noa i te iloaga ne ia me ko kilo eiloa a ia ki te fakataunuga o te valoaga tenā kae ko te laukele ka ‵fua ‵lei māfai e taumafai latou o ‵toki. E se tioa eiloa o saga fakavave a Noa o ‵toki fatoaga!—Kenese 3:17, 18; 5:28, 29; 9:20.

I te taimi foki tenā ne tuku atu ne Ieova ki fanau katoa a Noa ne tulafono ma‵nino kae faigofie ke takitaki ei latou i olotou olaga—e aofia i ei a te fakatapuga o te tatino mo te fakaaoga ‵se o te toto. Ne fai foki ne te Atua se feagaiga mo tino, e tauto atu ei me ka sē toe aumai eiloa ne ia se lolo ke fakaseai a tino katoa i te lalolagi. E pelā me se fakailoga e fakatalitonu atu ei me ka fakataunu eiloa a tena tautoga, ne tuku atu ne Ieova ki tino te fakailoga o se mea fakaofoofogia o te natula—ko te nuanua. Ke oko mai ki te aso tenei, a nuanua katoa kolā e lavea ne tatou e tuku mai i ei se fakamasauaga fakamafanafana loto e uiga ki te tautoga alofa a Ieova.—Kenese 9:1-17.

Moi fai a te tala o Noa se tala ‵kai fua, penei ko oti ne gata atu fakatasi mo te nuanua tenā. Kae ko Noa se tagata tonu, kae ne seki faigofie foki a tena olaga. Ona ko tino i aso konā ne ola leva, ne kufaki eiloa te tagata fakamaoni tenā ke oko atu ki te suā 350 tausaga, kae ne maua ne ia i senitenali konā a logo‵maega e uke. Ne fai ne tou tagata se mea ‵se fulafulaki i te taimi e tasi ne konā ei a ia, kae ne faopoopo atu ki te mea ‵se tenā ko te agasala matagā ne fai ne tena mokopuna ko Kanana—se agasala telā ne maua i ei ne te kāiga o Kanana a ikuga sē ‵lei. Ne ola leva a Noa ke kilo atu ki ana fanau ko fai a agasala pelā mo te ifo ki tupua kae amio fakasauā i aso o Nimalota. Kae ‵kese ‵ki mo mea konā, ne lavea ne Noa a te fakaakoakoga ‵lei ‵ki o te fakatuanaki ne fai ne tena tama tagata o Semu ki tena kāiga.—Kenese 9:21-28; 10:8-11; 11:1-11.

E pelā mo Noa, e manakogina ke tumau tatou i te fakamaoni faitalia a fakalavelave. Kafai a ‵teke atu a tino i ‵tou tafa ki te Atua tonu, io me fakagata te tavini atu ki a ia, e ‵tau eiloa o tumau tatou e pelā mo Noa. E fakatāua ne Ieova a te kufaki mo te fakamaoni. E pelā mo pati a Iesu Keliso, “ko te tino telā e lotomau ke oko ki te gataga ka sao eiloa a ia.”—Mataio 24:13.

[Fakamatalaga fakaopoopo]

[Ata i te itulau e 13]

Ne takitaki ne Noa te faiga o te tapuakiga a te kāiga ke oko foki ki taimi faiga‵ta

[Ata i te itulau e 15]