E fakamau i te Tusi Tapu a nai tala sē ‵lei e uiga loa ki te fakapuapuaga ne tino ma‵luga a tino ma‵lalo. E pelā mo Napota. * A Aapo, se tupu o Isalaelu i te sefulu o senitenali T.A., ne talia ne ia tena avaga, ko Iesepela, ke tamate a Napota mo ana tama tāgata ko te mea ke puke ma te tupu tena togavine. (1 Tupu 21:1-16; 2 Tupu 9:26) Kaia ne talia ei ne te Atua ke tupu se vaegā mea matagā penā ki te fakaaogaga ‵se o tena tulaga pule?

Ke ‵saga tonu atu nei tatou ki se pogai tāua e tasi: E se mafai o loi te Atua. (Tito 1:2) Se a te sokoga o te mea tenā mo faifaiga matagā kae fakasaua? Ia, i te kamataga eiloa, ne fakailoa atu ne te Atua ki tino me ka isi eiloa se ikuga sē ‵lei o te ‵teke atu ki a ia—ko te mate. Ne taunu eiloa a muna a te Atua, me ne fai faeloa a te mate mo fai se vaega o te olaga o tino talu mai te ‵tekeatuga i te fatoaga o Etena. A te ‵tonuga loa, a te tino muamua ne mate, ne māfua mai i se faifaiga fakasaua—i te taimi ne tamate ei ne Kaino tena taina ko Apelu.—Kenese 2:16, 17; 4:8.

Ne fakamatala fakatoetoe mai ne te Muna a te Atua a te tala fakasolopito o tino talu mai te taimi tenā: “Ka ko tino kolā e ‵nofo i se tulaga malalo, e ‵nofo puapuaga i te pulega a tino ma‵luga.” (Failauga 8:9) E mata, e ‵tonu eiloa a pati konā? Ne fakailoa atu ne Ieova ki te fenua o Isalaelu, ana tino, me ka amio fakasaua olotou tupu, telā ka fai ei a tino ke ‵tagi atu ki te Atua mō se fesoasoani (1 Samuelu 8:11-18) Ke oko foki eiloa ki te tupu ko Solomona ne fakapuapuaga ne ia ana tino ki te ‵togi atu olotou lafoga i se aofaki lasi ‵ki. (1 Tupu 11:43; 12:3, 4) A tupu ma‵sei, e pelā mo Aapo, ne silia atu foki te lotou fakasaua atu. Mafaufau ki te mea tenei: Moi ne puipui ne te Atua a vaegā faifaiga amio fakasaua penā, e a, ka se pati loi eiloa a ia?

Masaua foki la me ne ‵losi atu Satani me e tavini atu fua a tino ki te Atua ona ko uiga kaima‵nako. (Iopu 1:9, 10; 2:4) Moi ne puipui ne te Atua ana tavini katoa mai i vaegā pulega katoa penā, e mata, ka se ‵lago atu ei a ia ki ‵losiga ‵se a Satani? Kae e a moi ne puipui ne te Atua a tino katoa mai i vaegā puapuaga katoa, e a, ka se ‵losi atu ki a ia mō te loi tafasili i te maluga? Mai lalo i vaegā puipuiga penā, e mafai o mafau‵fau a tino e tokouke me e mafai eiloa o pule atu a tino ki a latou mo te manuia e aunoa mo te Atua. Kae e ‵kese ‵ki te mea ne fai mai i te Muna a te Atua—e se mafai lele eiloa ne te tino o pule faka‵lei atu ki a ia. (Ielemia 10:23) E ma‵nako tatou ke oko mai te Malo o te Atua; tenā fua te taimi ka gata atu ei a faifaiga sē fakamaoni.

E mata, e fakauiga i ei me e seai eiloa se mea e fai ne te Atua ki puapuaga? Ikai. Mafaufau ki mea e lua e fai ne ia: Muamua la, e fakaasi faka‵sau atu ne ia te māfuaga o fakasauaga. E pelā mo te fakaasi faka‵sau atu ne tena Muna a vaega katoa o te togafiti a Iesepela ke tamate a Napota. E fakaasi mai foki i te Tusi Tapu me e fakamalosi aka a vaegā faifaiga ma‵sei penā ne se pule ‵mana telā e manako ke ‵funa a mea ‵tonu e uiga ki a ia. (Ioane 14:30; 2 Kolinito 11:14) E fakaasi faka‵sau mai ne te Tusi Tapu me ko Satani te Tiapolo. Mai i te fakaasi faka‵sau atu o amioga ma‵sei mo puapuaga fakatasi mo te lotou māfuaga tonu, e fesoasoani mai te Atua ke tumau tatou i te saoloto mai mea ma‵sei. Tela la, e puipui faka‵lei ne ia ‵tou olaga ki te se-gata-mai i aso mai mua.

A te lua, e tuku mai ne te Atua se fakamoemoega ‵mautakitaki ki te fakagataga o puapuaga. A te auala e fakaasi faka‵sau atu ei ne ia, e fakamasino, kae fakasala ne ia a Aapo mo Iesepela—e pelā foki mo nisi tino e tokouke—e tuku mai i ei te loto talitonu ki ana folafolaga ke fakasala a tino amio ma‵sei i se aso e tasi. (Salamo 52:1-5) E tuku mai foki ne te Atua se fakamoemoega e fakatalitonugina ki tino kolā e a‵lofa tonu ki a ia me ko pili o ‵fuli ne ia a ikuga ma‵sei o amioga ma‵sei. * Ka kilo atu ei a Napota ki te taimi telā ka ‵nofo atu ei a ia mo ana tama tagata i te lalolagi palataiso ki te se-gata-mai telā e seai ne faifaiga sē fakamaoni i ei.—Salamo 37:34.