E mata, e isi sou taugasoa telā e se iloa ne koe tena igoa? Ailoga la. Ne fai mai se fafine Bulgaria e igoa ki a Irina, “me e se mafai o pili koe mo te Atua māfai e se iloa ne koe tena igoa.” E pelā mo te mea e fakaasi mai i te mataupu muamua, se mea fakafiafia ke iloa atu me e manako te Atua ke fakapilipili atu koe ki a Ia. Tela la, e auala i te Tusi Tapu, ne fakaasi mai ne Ia a Ia eiloa: “Fai ki tino Isalaelu i a au, [Ieova], te Atua o olotou tupuga . . . E tenā a toku igoa ki te se-gata-mai.”—Esoto 3:14, 15, TTT.

E mata, e tāua ki a Ieova māfai e iloa kae fakaaoga ne koe tena igoa, io me ikai? Ke mafaufau ki te mea tenei: Ne tusi te igoa o te Atua i mataimanu Epelu e fa telā ne lauiloa e pelā me ko te Tetragrammaton, toeitiiti kae kātoa te 7,000 taimi e sae mai ei te igoa tenā i Tusitusiga Epelu. E uke atu a taimi e sae mai ei i lō so se igoa telā e taku mai i te Tusi Tapu. E fakamaoni mai eiloa i te mea tenei, me e manako a Ieova ke iloa kae fakaaoga ne tatou tena igoa. *

Kae mafau‵fau a nisi tino me i te Atua ko tō ‵malu kae malosi katoatoa, tela la, e sē se faifaiga āva a te fakaaogaga ne latou tena igoa. E tonu, se mea ‵se ke fakaaoga te igoa o te Atua i se auala masei, e pelā eiloa mo te sē fia fakaaoga ne koe a te igoa o tou taugasoa i se auala masei. Kae ko te loto eiloa o Ieova ke fakaaloalo atu a tino kolā e a‵lofa ki a Ia kae ke fakailoa atu foki. (Salamo 69:30, 31; 96:2, 8) Masaua me ne fakaakoako ne Iesu ana soko ke ‵talo atu penei: “Te motou Tamana telā i te lagi, ke tapu tou igoa.” E mafai o fai ‵tou tusaga i te faka‵maluga o te igoa o te Atua mai te fakailoa atu ki tino. Ka fai eiloa ne te mea tenā ke fakapili‵pili atu tatou ki a Ia.—Mataio 6:9.

E fakaasi mai i te Tusi Tapu me e saga atu te Atua ki a latou kolā e “ma‵taku kae āva [io me fakatāua ne latou tena igoa] ki te Aliki.” (Malaki 3:16) E tauto mai a Ieova e uiga ki vaegā tino penā: “Kafai e ka‵laga mai latou ki a au, ka tali atu au ki a latou; kafai e puapuagatia latou, ko au ka fesoasoani atu ki a latou, ka fakasao kae faka‵malu ne au latou.” (Salamo 91:14, 15) E tāua ‵ki eiloa ke iloa kae fakaaoga ne tatou a te igoa o Ieova māfai e ma‵nako tatou ke maua se fesokotakiga pili mo Ia.