E fakailoa mai ne te Tusi Tapu ki a tatou me ka aofia i te gataga a fakamaseiga: “Me ko te taimi eiloa tenā ka tupu i ei te ‵toe fakalavelave lasi telā e seki tupu aka eiloa talu mai te kamataga o te lalolagi ke oko atu eiloa ki te aso tenei. . . A te ‵tonuga loa, moi se fakamu‵tana a aso konā, e seai eiloa se tino e sao, kae ona ko tino filifilia, ka fakamu‵tana ei a aso konā” (Mataio 24:21, 22) Kae ne folafola mai ne te Atua me e tokouke a tino ka ‵sao atu: “Ka fakaseai atu te lalolagi . . . , kae ko te tino telā e fai ne ia te loto o te Atua ka tumau eiloa ki te se-gata-mai.”—1 Ioane 2:17.

Kafai e fia sao atu koe i te taimi e fakaseai atu ei te lalolagi tenei kae ‘tumau ki te se-gata-mai,’ ne a au mea e ‵tau o fai? E mata, e ‵tau mo koe o kamata o fakaputuputu a nisi mea io me e fai a nisi fakatokaga faka-te-foitino? Ikai. E fakamalosi mai te Tusi Tapu ke fakamuamua ne tatou a nisi mea kolā e ‵kese mai i mea konei. E fai‵tau tatou: “Ona ko mea katoa konei ka fakaseai atu i te auala tenei, e ‵tau o fai otou amioga ke ‵ma kae fakamaoni ki te Atua, a koi fakatali‵tali kae olioli faeloa koutou ki te oko mai o te aso o Ieova.” (2 Petelu 3:10-12) E fakaasi mai ne te mataupu me i “mea katoa konei’ kolā ka fakaseai atu, ko pulega o te lalolagi masei tenei mo tino katoa kolā ne filifili aka ne latou a vaegā pulega penā i lō te pulega a te Atua. E manino ‵lei i ei, me kafai e fakaputuputu ne tatou a mea faka-te-foitino, ka se faka‵sao tatou ne mea konā mai i se fakamaseiga penā.

A te ‵tonuga loa, e aofia i te ‵tou ‵sao atu a te tuku katoatoa o tatou ki a Ieova te Atua kae tauloto ki vaegā amioga mo faifaiga kolā e fakafiafia atu ki a ia. (Sefanaia 2:3) I lō te tautali atu i te tokoukega o tino i aso nei kae fakaseaoga a fakailoga ‵tonu me ko ‵nofo tatou i taimi tāua konei, e ‵tau mo tatou o ‘fakatali‵tali kae olioli faeloa ki te oko mai o te aso o Ieova.’ E mafai o fakaasi atu ne Molimau a Ieova ki koe mai te Tusi Tapu, a te auala e mafai ei o aofia koe i tino kolā ka ‵sao atu i te aso tenei ko pili mai.