“KAIA NE TUPU KI A AU? Kaia ne talia ei ne te Atua ke tupu te mea tenei ki a au?” Konā eiloa a fesili kolā ne fakafanoanoa atu ki a Sidnei, telā ko 24 ana tausaga, mai Pasili. Mai tua o te ‵tupuga o se fakalavelave, ne ‵tau o fakaaoga faeloa ne ia se nofoga fakatekateka.

E mafai eiloa o fai tatou ne logo‵maega kolā e iku mai i se fakalavelave tupu, masaki, mate o se tino pele, fakalavelave o te natula, io me ko taua ke se fia‵fia tatou ki te Atua. A te mea tenei e sē se mea fou. Ne fepaki a te toeaina i aso mua ko Iopu mo fakalavelave e uke i te taimi eiloa e tasi. Ne ‵losi ‵se atu tou tagata ki te Atua, i ana muna: “Au ne kalaga sale atu ki a koe, kae ne seki tali mai eiloa koe; i te taimi e talo ei au, ka ko koe e se saga mai lele eiloa. Au ko fai fakamasei ne koe; ko fakasaua ne koe a au i tou mana katoatoa.”—Iopu 30:20, 21.

Ne seki iloa ne Iopu a te pogai o ana fakalavelave mo te pogai ne oko atu ei ki a ia io me ne taliagina ke tupu ki a ia. Se mea fakafiafia me ne fakaasi mai ne te Tusi Tapu a te pogai e ‵tupu ei a vaegā mea penā mo te auala ke ‵saga atu ki ei.

Ne fai mai te Tusi Tapu e uiga ki te Atua: “E tonu kae amiotonu i ana auala katoa; a te otou Atua e fakamaoni kae amiotonu; e fai ne ia te mea tonu kae nofogamalie.” (Teutelonome 32:4) Ona ko te mea tenā, e mata, se manatu ‵lei io me e tonu me e manako te Atua telā e “fakamaoni kae amiotonu” ke logo‵mae a tino io me ke fakaaoga ne ia a tulaga faiga‵ta ke fakasala io me ke fakaseai aka ei latou?

E ‵kese mai i ei, e fai mai te Tusi Tapu ki a tatou: “Kafai e tofotofogina se tino, ke mo a ma fai mai a ia penei: ‘Au ko tofotofo ne te Atua.’ Me e se mafai o tofotofogina te Atua ki mea ma‵sei io me e tofotofo ne ia se tino.” (Iakopo 1:13) A te ‵tonuga loa, ne tauloto ne tatou mai te Tusi Tapu me ne tuku atu eiloa ne te Atua ki te tagata se kamataga ‵lei katoatoa. Ne tuku atu ne ia ki tino muamua, Atamu mo Eva, se fale gali, mea katoa e manakogina mō te olaga, mo galuega aoga ke fai. Ne fai atu a ia ki a lāua: “Fakatokouke otou tamaliki, ko te mea ko otou fanau ke nofo i te lalolagi kae pule i ei.” E mautinoa eiloa me ne seai se pogai ke se fia‵fia a Atamu mo Eva ki te Atua.—Kenese 1:28.

Kae i aso nei, ko ‵mao ‵ki eiloa a fakanofonofoga i te olaga nei mai te ‵lei katoatoa. A te ‵tonuga loa, ne gasolo aka eiloa o ma‵sei a fakalavelave o tino i tala fakasolopito. E fetaui tonu mo te fakamatalaga tenei: “I mea ne faite ne ma‵nava fi‵ta kae logo‵mae fakatasi ke oko mai eiloa ki te taimi tenei.” (Loma 8:22) Se a te mea ne tupu?

Ke malamalama i te pogai o logo‵maega, e ‵tau o toe ‵foki atu tatou ki te kamataga. Ona ko te fakaloiloiga ne se agelu ‵teke, telā ne fakaigoa fakamuli ki a Satani te Tiapolo, ne ‵teke atu ei a Atamu mo Eva ki tulaga o te Atua e uiga ki te mea ‵lei mo te mea masei telā e fakaata mai i te “lakau telā e fai ne ia te tino ke iloa te ‵lei mo te masei.” Ne fai atu te Tiapolo ki a Eva me ka se ‵mate lāua māfai e se faka‵logo ki te Atua, telā ne ‵losi atu ei a ia me i te Atua se tino loi. Ne fakamasei foki ne Satani a te Atua mō te taofiga ne ia mai i ana tino a te saolotoga ke fakaiku aka a te mea ‵lei mo te mea masei. (Kenese 2:17; 3:1-6) Ne fai atu a Satani me e sili atu te ‵lei o tino e aunoa mo te pulega a te Atua. Ne faka‵sae aka ne mea katoa konei se kinauga tāua ‵ki—E mata, ne ‵tau o pule mai te Atua?

Ne fakasae aka ne te Tiapolo a te suā kinauga. Ne fakamasei ne ia a tino me e tavini atu latou ki te Atua ona ko olotou manakoga kaima‵nako. Ne fai atu te Tiapolo ki te Atua e uiga ki te tagata fakamaoni ko Iopu: “Ne puipui faeloa ne koe a ia mo tena kāiga, mo ana mea katoa. . . . I te taimi nei, se taumate kafai e ave keatea ne koe ana mea katoa, e iku eiloa o muna masei ne ia a koe!” (Iopu 1:10, 11) E tiga eiloa ne fai atu a pati a Satani e uiga ki a Iopu, ne fakauiga loa a ia ki tino katoa e tavini atu mo manakoga kaima‵nako ki te Atua.

Se a te ‵toe auala ‵lei ke faka‵lei aka a kinauga tāua konā mō taimi katoa? A te Atua, telā e poto katoatoa, e nofo mo te ‵toe faka‵leiga katoatoa—se mea telā ka se mafai o se fia‵fia tatou i ei. (Loma 11:33) Ne fakaiku aka  ne tou tagata ke tuku a tino ke pule atu ki a latou eiloa mō se taimi kae ke fakamaoni aka ne mea kolā e iku mai i ei me tefea te pulega e ‵lei atu.

E fakaasi manino mai i tulaga fakaa‵lofa i te lalolagi i aso nei me ne seki iku manuia eiloa a pulega a tino. E se gata fua i te seki mafai ne pulega i te lalolagi o aumai te filemu, tokagamalie, mo te fiafia kae ne fakamasei foki ne latou te lalolagi. E fakamaoni mai ne te mea tenei a te ‵tonu o te munatonu fakavae i te Tusi Tapu: “E seai se tino e pule i tena ola.” (Ielemia 10:23) Ko te pulega fua a te Atua e mafai o tuku mai i ei a te filemu, fiafia, mo te manuia tumau ki tino, me tenā eiloa te fuafuaga a te Atua.—Isaia 45:18.

Ka fakataunu pefea ne te Atua tena fuafuaga mō tino? Masaua a mea ne akoako atu ne Iesu ki ana soko ke ‵talo ki ei: “Ke oko mai tou Malo. Ke fai te mea e loto koe ki ei i te lalolagi nei e pelā mo te faiga i te lagi.” (Mataio 6:10) Ao, i te taimi tonu o te Atua, e auala i tena Malo, ka ave keatea ei ne ia a pogai katoa o logo‵maega. (Tanielu 2:44) Ka aofia eiloa i mea mua a te mativa, masaki, mo te mate. E fakaasi mai i te Tusi Tapu me ka “fakasao ne [te Atua] a tino ma‵tiva kolā e ka‵laga ki a ia.” (Salamo 72:12-14) E pelā mo tino masaki, e folafola mai penei te Tusi Tapu: “Ka seai eiloa se tino i luga i te ‵tou fenua e tagi i a ia e masaki.” (Isaia 33:24) Ke oko foki eiloa ki tino ‵mate kolā e masaua ne te Atua, ne fai mai a Iesu: “Ka oko mai eiloa te itula e lagona ei ne tino katoa kolā e i loto i tanuga a tena leo ko ulu mai ei ki tua.” (Ioane 5:28, 29) Ko oko eiloa i te fakamalosi loto a folafolaga konā!

I se 17 tausaga mai tua o te fakalavelave ki a ia, ne fai mai a Sidnei, telā ne taku mai i te kamataga: “Ne seki ‵losi lele atu eiloa au ki te Atua mō te fakalavelave, kae e taku ‵tonu atu ne au me ne seki fiafia au ki a ia i te taimi muamua. E isi ne taimi ne fanoanoa ei au, kae ne tagi au māfai e mafaufau ki te sē katoatoa o toku malosi. Kae ko malamalama nei au mai te Tusi Tapu me i te fakalavelave e sē se fakasalaga mai te Atua. E pelā eiloa mo pati i te Tusi Tapu, “a te malaia e maua ne tino katoa.” A te ‵talo atu ki a Ieova mo te faitau ki tusi siki fakapito ne fai ei ke momea aka toku malosi i te feitu faka-te-agaga kae tumau i te kilokiloga aoga.”—Failauga 9:11; Salamo 145:18; 2 Kolinito 4:8, 9, 16.

A te masaua faeloa a pogai ne talia ei ne te Atua a logo‵maega mo te auala ka faka‵lei aka ei ne ia, e fesoasoani mai ke manumalo tatou i ‵tou lagonaga sē fiafia ki te Atua. E fakatalitonu mai ki a tatou me i te Atua ko te tino telā “e avatu ne ia te taui ki tino kolā e ‵sala malosi atu ki a ia.” Ka seai eiloa se tino e se fiafia i tino kolā e fakatuanaki ki a Ia mo tena Tama.—Epelu 11:6; Loma 10:11.