E fesokotaki faeloa a taugasoa ke ati aka se fesokotakiga ‵lei. E penā foki loa, e ‵kami tatou ke fai‵pati atu ki a ia, telā e ‵tala mai ei te auala mō se va fakataugasoa ‵lei. E fai mai a ia: “Ka ka‵laga mai foki ei koutou ki a au. Ka o‵mai koutou o ‵talo mai ki a au, kae ka tali atu au ki otou talosaga.” (Ielemia 29:12) I te taimi e fai‵pati atu ei koutou ki te Atua, ka “fakapili‵pili atu ki [a ia], kae ka fakapilipili mai a ia ki a koutou.” (Iakopo 4:8) E fakatalitonu mai te Tusi Tapu: “E pili faeloa a [Ieova] ki a latou kolā e ka‵laga atu ki a ia.” (Salamo 145:18) Tela la, ko te uke o taimi e ‵talo atu tatou ki a ia, ko te momea aka foki o malosi te ‵tou va fakataugasoa mo te Atua.

Ne fai mai a Iesu: “Ko oi te tino i a koutou e mafai o tuku atu ne ia se fatu ki tena tama, māfai e fakamolemole mai ki se falaoa? Io me kafai e fakamolemole atu ki se ika kae tuku atu ki a ia se gata? Tela la, kafai . . . e iloa ne koutou o tuku atu a mea ‵lei ki otou tama‵liki, e sili atu la fakafia te fia tuku atu ne te otou Tamana telā i te lagi a mea ‵lei ki tino kolā e fakamolemole atu ki a ia!” (Mataio 7:9-11) Ao, e ‵kami koutou ne te Atua ke ‵talo atu ona ko te mea e “atafai eiloa a ia ki a koutou” kae e manako foki o fesoasoani atu ki a koutou. (1 Petelu 5:7) E ‵kami foki eiloa ne ia koe ke fanatu mo ou fakalavelave ki a ia. E fai mai te Tusi Tapu ki a tatou: “Ke mo a ma manava‵se koutou ki so se mea, kae ke tuku atu a mea katoa kolā e ma‵nako koutou ki ei ki te Atua fakatasi mo otou fakafetai e auala i otou talosaga.”—Filipi 4:6.

Ne iloa ne tino ‵poto me e maua ne te fia selau miliona o tino a te manakoga ke ‵talo. E aofia foki a tino sē tali‵tonu ki te Atua mo tino tali‵tonu me e seai se Atua i te aofaki tenei. * E fakamaoni mai ne te mea tenei a te manatu tonu me ne faite a tino mo se manakoga faka-te-agaga. Ne fai mai a Iesu: “E fia‵fia a latou kolā e iloa ‵lei ne latou olotou manakoga faka-te-agaga.” (Mataio 5:3) A te auala e tasi ke fakamalie aka te manakoga tenā ko te fesokotaki atu faeloa mo te Atua.

Kafai e talia ne tatou te ‵kamiga a te Atua ke ‵talo atu ki a ia, ne a mea aoga e mafai o maua ne tatou?