Se Fakaasiga ki a Ioane 10:1-11
10 Kae ne matea ne au te suā agelu malosi e fanaifo mai te lagi, e pei ki se kaumana, mo se nuanua i luga i tena ulu, kae ko ana mata e pelā mo te la,+ kae ko ana vae e pelā me ne pou afi,
2 kae e puke i tena lima se tamā peluga tusi telā ko oti ne ‵tala. Kae ne fakatu ne ia tena vae fakaatamai i luga i te tai, kae ko tena vae fakamaui i luga i te laukele,
3 kae ne pakalaga atu a ia i te leo maluga e pelā eiloa mo te leona māfai ko tagi.+ Kae kafai ko pakalaga a ia, ne fai‵pati mai a leo o fa‵tili+ e fitu.
4 I te taimi ne fai‵pati mai ei a fa‵tili e fitu, ne fakatoka au o tusi ki lalo a mea konā, kae ne lagona ne au se leo mai te lagi+ e fai mai: “‵Funa* a pati a fa‵tili e fitu konā, kae sa tusigina ki lalo.”
5 A te agelu telā ne matea atu ne au e tu i te tai mo te laukele ne sisi aka tena lima fakaatamai ki te lagi,
6 kae ne tauto atu a ia i te igoa o te Atua telā e ola ki te se-gata-mai,+ se-gata-mai eiloa, telā ne faite ne ia te lagi mo mea i loto i ei mo te lalolagi mo mea i luga i ei mo te tai mo mea i loto i ei:+ “Ka se toe fakatuai eiloa.
7 Kae i aso kolā ko pili ei o ili ne te fitu o agelu+ tena pu,+ ka fakaoti i ei te fuafuaga ‵funa kae tapu+ telā ne folafola atu ne te Atua e pelā me se tala ‵lei ki ana tavini, ko te kau pelofeta.”+
8 Kae ne lagona ne au te leo mai te lagi+ e toe faipati mai ki a au kae ne fai mai: “Fano o puke te peluga tusi telā ko matala i te lima o te agelu telā e tu i te tai mo te laukele.”+
9 Ne fanatu au ki te agelu kae fai atu ki ei ke tuku mai te tamā peluga tusi. Ana muna ki a au: “Puke kae kai ke palele,+ kae ka fai i ei ke ‵kona tou tinae, kae ka magalo e pelā me se hani i tou gutu.”
10 Ne puke ne au te tamā peluga tusi mai i te lima o te agelu kae kai ne au,+ kae ne magalo e pelā me se hani i toku gutu,+ kae i te otiga ne kai ne au, ne ‵kona te mea tenā i toku tinae.
11 Kae ne fai mai ki a au: “E ‵tau mo koe o toe ‵valo atu e uiga ki tino mo atufenua mo ‵gana mo tupu e tokouke.”
Fakamatalaga mai lalo
^ Eleni, “Faka‵mau faka‵lei.”
