Se Fakaasiga ki a Ioane 11:1-19
11 Kae ne tuku mai ki a au se lakau* e pelā me se tokotoko+ kae fai mai a ia: “Tu ki luga o fua aka te faletapu* o te Atua, mo te fatafaitaulaga, penā foki loa mo latou kolā e tapuaki atu i ei.
2 Kae e pelā mo te koga ateatea i tua o te faletapu, tiaki te koga tenā kae sa fuagina, me ko oti ne tuku atu te koga tenā ki atufenua, kae ka lakalaka ne latou te fakai tapu+ i masina e 42.+
3 Ka fai ne au aku molimau e tokolua ke ‵valo atu i aso e 1,260 kae ‵pei ki gatu lautaga.”
4 E fakaata mai a lāua konei ne lakau olive e lua+ mo tugamoli e lua+ kae e ‵tu atu i mua o te Aliki o te lalolagi.+
5 Kafai se tino e fia fakalogo‵mae atu ki a lāua, ka tō mai te afi i lā gutu kae ka fakaseai atu lā fili. Kae kafai se tino e manako o fakalogo‵mae lāua, tenei te auala e ‵tau o tamate ei a ia.
6 E maua ne lāua konei te malosi ke ‵pono te lagi+ ke seai se vaiua e ‵to+ i aso e ‵valo atu ei lāua, kae e isi se lā malosi ki luga i te vai ke ‵fuli ke liu toto+ kae ke fakaoko atu ki te lalolagi a vaegā mala katoa i so se taimi e ma‵nako lāua ki ei.
7 Kafai ko oti te lā molimau, ka taua atu ki a lāua a te manu fekai telā e fanaka mai i te lua ‵poko kae fakatakavale kae tamate foki lāua.+
8 Kae ka ta‵kato lā foitino ‵mate i te auala lasi o te fakai takutakua telā e fakatusa ki Sotoma mo Aikupito i te feitu faka-te-agaga, ko te koga foki telā ne tamate i ei te lā Aliki i luga i te pou.
9 Kae ko tino mo matakāiga mo ‵gana mo atufenua ka ‵kilo atu ki lā foitino ‵mate i aso e tolu mo te āfa,+ kae e se talia ne latou ke tuku lā foitino ‵mate ki se tanuga.
10 Kae ko latou kolā e ‵nofo i te lalolagi e fia‵fia ona ko lāua kae fai fakafiafiaga, kae ka fakatau fai meaalofa latou, me ne fakapuapuaga atu te avā pelofeta konā ki tino kolā e ‵nofo i te lalolagi.
11 Mai tua o te tolu mo te āfa aso, ne ulu atu te agaga o te ola mai te Atua ki loto i a lāua,+ kae ne ‵tu aka lāua i lā vae, kae ne ma‵taku malosi a tino kolā ne lavea ne latou a lāua.
12 Kae ne lagona ne lāua se leo maluga mai i te lagi ne fai atu ki a lāua: “O‵mai ki luga nei.” Kae ne olo aka lāua ki te lagi i te kaumana, kae ne lavea ne lā fili a lāua.*
13 I te itula eiloa tenā ne poko se mafuie lasi, kae ne malepe te tasi-vae-sefulu o te fakai; kae ne ‵mate atu i ei a tino e toko 7,000 i se mafuie, kae ko te ‵toega o tino ne ma‵taku kae tuku atu te ‵malu ki te Atua o te lagi.
14 Ko oti atu te lua o mala.+ Kiloke! Ka oko fakavave mai te tolu o mala.
15 Ne ili ne te tokofitu o agelu tena pu.+ Kae ne fai mai a leo ma‵luga i te lagi: “Ko oti ne fai te malo o te lalolagi mo fai te Malo o te ‵tou Aliki+ mo tena Keliso,+ kae ka pule mai a ia e pelā me ko te tupu ki te se-gata-mai, se-gata-mai eiloa.”+
16 Kae ne faka‵siga ifo te toko 24 toeaina+ kolā ne saga‵saga i olotou nofogaaliki i mua o te Atua kae tapuaki atu ki te Atua,
17 olotou muna: “E fakafetai atu matou ki a koe, e Ieova* te Atua Malosi Katoatoa, ko te tino telā+ e ola nei kae ne ola foki mai mua loa, me ko oti ne puke koe ki tou ‵mana sili kae kamata o pule e pelā me ko te tupu.+
18 Kae ne kaitaua a atufenua, kae ne oko mai tou kaitaua, kae ne oko mai te taimi tonu ke fakamasino i ei a tino ‵mate kae ke tuku atu te taui+ ki au tavini ko te kau pelofeta,+ mo tino tapu mo latou kolā e ma‵taku ki tou igoa, ko tino ma‵lalo mo tino ma‵luga, kae ke fakamasei a latou kolā e fakamasei ne latou te lalolagi.”+
19 Kae ne ‵tala mai te faletapu* o te Atua i te lagi, kae ne matea atu te pusa o tena feagaiga i tena faletapu.*+ Kae ne ‵lapa a uila kae ne lagona atu a leo mo te pa‵pa mai o fa‵tili kae ne oko mai te mafuie mo se vaiua fatu fakamataku.
Fakamatalaga mai lalo
^ Io me “se lakau e fua ki ei a mea.”
^ Telā ko te koga lasi o te faletapu telā e tu i ei te Potu Tapu mo te Potu Tafasili i te Tapu.
^ Io me “ne kilo‵kilo atu ki.”
^ Telā ko te Potu Tafasili i te Tapu o te faletapu.
^ Telā ko te Potu Tafasili i te Tapu o te faletapu.
