Hakai 1:1-15
1 I te lua o tausaga o te Tupu ko Taliu, i te ono o masina, i te aso muamua o te masina, ne oko mai te fekau a Ieova e auala i te pelofeta ko Hakai*+ ki a Selupapelu+ te tama tagata a Salatielu, te kovana o Iuta, mo Iosua te tama tagata a Iosataka, te faitaulaga sili, ana muna:
2 “Konei a pati a Ieova o kautau ne fai mai, ‘Ne fai mai a tino konei, “E seki oko nei ki te taimi ke faite ei te fale* o Ieova.”’”*+
3 Kae ne toe oko mai te fekau a Ieova e auala i a Hakai+ te pelofeta, ana muna:
4 “E a, tenei te taimi ke ‵nofo koutou i otou fale laupapa ‵gali, kae ko te fale tenei e maofa valevale fua?+
5 Konei a pati a Ieova o kautau ne fai mai, ‘Ke na tuku atu otou loto ki* otou amioga.
6 Ne ‵toki ne koe a fuaga e uke, kae mu‵tana au mea ne tau.+ A koe ne kai kae e se makona. A koe ne inu kae e se lotomalie. A koe ne pei ou gatu, kae e se mafanafana i ei se tino. A te tino telā ne galue ke maua se ‵togi ne tuku tena peofuga ki se taga e ‵fonu i pūga.’”
7 “Konei a pati a Ieova o kautau ne fai mai, ‘Ke na tuku atu otou loto ki* otou amioga.’
8 “‘Olo ki luga i te mauga o aumai a lakau.+ Kae faite te fale,+ ko te mea ke fiafia au ki ei kae ke vikia ei au,’+ ko muna a Ieova.”
9 “‘A koutou ne fakamoe‵moe ke maua a mea e uke kae mu‵tana fua a mea ne maua; kae i te taimi ne aumai ei ne koutou ki te fale, ne ‵pusi ne au kea‵tea.+ Se a te pogai?’ ko te folafolaga a Ieova o kautau. ‘Me i toku fale ko maofa valevale, kae ko tino taki tokotasi o koutou e tele‵tele eiloa o fai faka‵lei olotou fale.+
10 Tela la, ne taofi aka ne te lagi i luga o koutou a tena ‵sau, kae taofi aka ne te laukele ana fuataga.
11 Ne kalaga atu faeloa au ki se tau la ke poko i te lalolagi, i mauga, i fuaga, i uaina ‵fou, i sinu, i mea kolā e ola aka mai i te laukele, i tino mo lafu manu, mo galuega katoa a otou lima.’”
12 A Selupapelu+ te tama tagata a Salatielu+ mo Iosua te tama tagata a Iosataka,+ te faitaulaga sili, mo te ‵toega o tino katoa ne faka‵logo ki te leo o Ieova te lotou Atua mo pati a Hakai te pelofeta, me i a Ieova te lotou Atua ne uga mai ne ia a ia; kae ne kamata o ma‵taku a tino ona ko Ieova.
13 Tenā ne fai atu ei ne Hakai, te avefekau a Ieova, a te fekau tenei ki tino e ‵tusa eiloa mo tena tiute mai i a Ieova: “‘Au e fakatasi atu ki a koutou,’+ ko te folafolaga a Ieova.”
14 Tenā ne fakamalosi aka ei ne Ieova te loto+ o Selupapelu te tama tagata a Salatielu, te kovana o Iuta,+ mo te loto o Iosua+ te tama tagata a Iosataka, te faitaulaga sili, mo loto o te ‵toega o tino katoa; kae ne o‵mai latou kae kamata o ga‵lue ki te fale o Ieova o kautau, te lotou Atua.+
15 Ne fai a te mea tenei i te po 24 o te ono o masina i te lua tausaga o te pulega a te Tupu ko Taliu.+
Fakamatalaga mai lalo
^ Tena uiga “Ne Fanau i te Taimi o se ‵Kaiga Fiafia.”
^ Io me “faletapu.”
^ Io me “toe faite.”
^ Io me “Mafaufau faka‵lei ki.”
^ Io me “Mafaufau faka‵lei ki.”
