Te Tusi a Maleko 12:1-44
12 Tenā ne kamata ei a ia o faipati atu ki a latou e auala i tala fakatusa: “E isi se tagata ne ‵toki tena togavine+ kae ‵pui ne ia kae keli se lua ke tuku i ei te mea ‵tau uaina kae fakatu ne ia se taoa i ei,+ tenā ne liisi ei ne ia te togavine ki tino fai fatoaga kae fano ki se isi fenua.+
2 I te okoga ki te ‵tau e tau ei a fuagavine, uga atu ei ne ia tena pologa ki tino fai fatoaga ke puke mai ne fuagavine mai i a latou.
3 Kae ne puke ne latou a ia o ta kae uga atu ke fano e aunoa mo se mea.
4 Ne toe uga atu ne ia te suā pologa ki a latou, kae ne pago ne latou tena ulu kae fakamasiasi ne latou a ia.+
5 Kae ne toe uga atu ne ia te suā tino, kae ne tamate ne latou a ia, ne toe uga atu foki a tino e tokouke, kae ne ‵ta ne latou a nisi tino kae tamate ne latou a nisi tino.
6 Toe tokotasi eiloa tena tino e ‵toe, ko tena tama fagasele.+ Ne uga fakamuli atu ne ia ki a latou kae fai aka penei, ‘Ka āva eiloa latou ki taku tama.’
7 Ne fai aka a pati a tino fai fatoaga, ‘Tenei eiloa tena sui.+ O‵mai ke tamate ne tatou a ia, ko maua ei ne tatou a tena tofi.’
8 Tenā ne puke ei ne latou a ia kae tamate, kae ‵pei ki tua mo te togavine.+
9 Se a la te mea ka fai ne te tino i o ia te togavine? Ka vau eiloa a ia o tamate a tino fai fatoaga konā kae tuku atu te togavine ki nisi tino.+
10 E a, e seki fai‵tau eiloa koutou ki te tusi faitau tenei: ‘A te fatu telā ne tiakina ne tufuga fai fale ko fai nei mo fatu tulimanu tafasili i te aoga.*+
11 Ne aumai eiloa te mea tenei mai i a Ieova,* kae ko oko eiloa i te fakaofoofogia ki omotou mata’?”+
12 Ona ko te mea tenā, ne ma‵nako latou o puke* a ia, kae ne ma‵taku latou i te vaitino, me e iloa ne latou me ne faipati a ia e uiga ki a latou i se tala fakatusa. Tenā ne tiakina ei ne latou a ia kae olo kea‵tea.+
13 Ne uga atu ne latou ki a ia a nisi Falesaio mo nisi tino o te potukau a Helota, ke ‵po ne latou a ia i ana pati.+
14 I te lotou okoatuga, fai atu ei ki a ia: “Te Faiakoga, e iloa ne matou i a koe e faipati ki te mea tonu, kae e se sona taumafai koe ke fakafiafia atu ki nisi tino, me i a koe e se kilo ki foliga i tua o te tino, kae akoako ne koe a auala o te Atua e ‵tusa mo te munatonu. E mata, e saoloto i te tulafono* ke ‵togi atu a lafoga foitino ki a Kaisala io me ikai?
15 E ‵tau o ‵togi ne matou io me e se ‵tau o ‵togi?” Ne iloa ne Iesu te lotou togafiti, fai atu ei ki a latou: “Kaia e tofotofo ei ne koutou au? Aumai ki a au se tenali* e tasi ke onoono aka au ki ei.”
16 Ne aumai ne latou ki a ia se tenali, ana muna ki a latou: “I o oi te ata mo te igoa tenei?” Ne fai atu latou ki a ia: “I o Kaisala.”
17 Fai atu ei a Iesu: “Toe ‵togi atu a mea a Kaisala ki a Kaisala,+ kae ko mea a te Atua ki te Atua.”+ Kae ne ofo latou i a ia.
18 Ne olo atu a te kau Satukaio kolā e fai mai me e seai se toetu,+ kae fesili atu ki a ia:+
19 “Te Faiakoga, ne tusi mai a Mose ki a matou me kafai e mate se taina o se tagata kae e seai sena tama, e ‵tau o avaga tena taina mo tena avaga ko te mea ke maua ne tama‵liki ma tena taina.+
20 E isi ne tautaina e tokofitu. Ne avaga te toekimua kae i te taimi ne mate ei, e seai sena tamaliki.
21 Ne avaga te tokolua mo te fafine tenā kae ne mate foki e aunoa mo se tamaliki, kae e penā foki te tokotolu.
22 Kae ko te tokofitu katoa konā e seai ne olotou tama‵liki. Fakamuli ifo, mate ei te fafine.
23 I te taimi o te toetu ko oi ka fai mo fai te avaga a tou fafine? Me ne a‵vaga katoa a te tokofitu konā mo ia.”
24 Ne tali atu a Iesu ki a latou: “E mata, e se tenei te mea e ‵se ei koutou, me e se iloa ne koutou a Tusitusiga Tapu io me ko te ‵mana o te Atua?+
25 Me i te taimi e toe‵tu aka ei a tino mai te mate, a tāgata ka se a‵vaga e pelā foki mo fāfine, kae ka fai a latou e pelā mo agelu i te lagi.+
26 Kae e pelā mo te faka‵tuga o tino ‵mate, e a, e seki fai‵tau koutou ki te tusi a Mose, ki te tala e uiga ki te lakau ‵ka, i pati a te Atua ki a ia: ‘Au ko te Atua o Apelaamo, ko te Atua o Isaako, ko te Atua foki o Iakopo’?+
27 A ia e se ko te Atua o tino ‵mate, kae ko te Atua o tino ola. Ko oko eiloa te ‵se o koutou.”+
28 E isi se failautusi ne fanatu kae lagona ne ia a latou e kinau; ne iloa ne ia me ne tali atu a ia ki a latou i se auala ‵lei, fesili atu ei a ia: “Se a te fakatonuga e tulaga muamua* i tulafono katoa?”+
29 Ne tali atu a Iesu: “Tenei a te fakatonuga e tulaga muamua, ‘Faka‵logo mai e Isalaelu, a Ieova* te ‵tou Atua, ko Ieova* tokotasi eiloa,
30 kae e ‵tau mo koe o alofa ki a Ieova tou Atua mo tou loto kātoa mo tou ola kātoa mo tou mafaufau kātoa mo tou malosi kātoa.’+
31 A te lua o fakatonuga, ‘E ‵tau mo koe o alofa ki tou tuakoi e pelā mo koe ki a koe eiloa.’+ E seai eiloa se tulafono e sili atu i tulafono konei.”
32 Ne fai atu te failautusi ki a ia: “Te Faiakoga e fetaui eiloa au pati mo te munatonu, ‘E tokotasi eiloa a Ia, kae e seai aka foki se isi atua i ana tafa’;+
33 kae ko te tino e alofa ki a ia mo tena loto kātoa, mo tena mafaufau kātoa, mo tena malosi kātoa, kae alofa ki tena tuakoi e pelā mo ia ki a ia eiloa, e sili fakafia atu i lō taulaga ‵sunu mo taulaga katoa kolā e ofo atu.”+
34 I te iloaga ne Iesu me ne tali mai te tagata tenā mo te poto, fai atu ei ki a ia: “Ko se ‵mao koe mai te Malo o te Atua.” Kae ne seki toe ai se tino ne loto toa o toe fesili atu ki a ia.+
35 Kae i te taimi ne akoako atu ei a Iesu i te faletapu, ne fai atu a ia: “Kaia e fai mai ei a failautusi me i te Keliso ko te tama a Tavita?+
36 E auala i te agaga tapu,+ ne fai mai a Tavita, ‘Ne fai atu a Ieova* ki toku Aliki: “Sagasaga i toku feitu fakaatamai ke oko ki te taimi e tuku ei ne au ou fili mai lalo i ou vae.”’+
37 Ne taku ne Tavita a ia ki te Aliki, kae e fai la pefea a ia mo fai tena tama?”+
Ne fakalogo‵logo atu ki a ia a te vaitino mo te fia‵fia.
38 Kae i ana akoakoga ne fai atu ei a ia: “Ke fakaeteete koutou i failautusi kolā e ma‵nako o oloolo sāle mo olotou gatu ‵loa kae ke fakatalofa atu a tino ki a latou i maketi+
39 kae ke ‵nofo latou i nofoga tafa ki mua i sunako mo toe koga ma‵luga i ‵kaiga i afiafi.+
40 E ‵faomālō ne latou a fale o fāfine ko ‵mate olotou avaga kae ma‵nako ke onoono atu a tino ki olotou ‵talo ‵loa. Ka maua eiloa ne latou konei se fakasalaga telā e ‵mafa atu.”
41 Ne sagasaga a ia ki lalo i te koga telā e lavea ei ne ia a pusa tupe+ kae ne kamata o onoono atu ki te vaitino kolā e lafo olotou tupe ki loto i pusa tupe, kae e tokouke a tino mau‵mea ne lafo ne latou a tupe siliva e uke.+
42 Ne fanatu se fafine mativa ko mate tena avaga kae lafo ki loto i ei a tupe fo‵liki e lua kolā e se taulia malosi.*+
43 Ne kalaga atu a Iesu ki ana soko kae fai atu ki a latou: “Au e fai ‵tonu atu ki a koutou, me e uke atu a tupe ne lafo ne te fafine mativa tenei ko mate tena avaga i lō tupe a tino katoa kolā ne lafo ki loto i pusa tupe.+
44 Me ne lafo ne latou katoa konā mai i olotou tupe silia, kae ko te fafine tenā ne lafo atu eiloa ne ia ana mea katoa kolā e ola ei a ia.”+
Fakamatalaga mai lalo
^ Eleni, “te ulu o te tulimanu.”
^ Io me “puke fakapagota.”
^ Io me “‵lei.”
^ Io me “tafasili i te tāua.”
